បន្ទាយមានជ័យ ៖ ដើមឈើរាប់រយពាន់ដើម ស្ថិតលើផ្ទៃចំនួន ៣០៧ ហិចតាក្នុងសហគមន៍តំបន់ការពារធម្មជាតិ ភូមិត្រពាំងធ្លក ឃុំបន្ទាយឆ្មារ ស្រុកថ្មពួក ខេត្តបន្ទាយមានជ័យកាលពីថ្ងៃទី២០ ខែមីនា ឆ្នាំ២០១៨ ត្រូវបានព្រះសង្ឃស្ម័គ្រចិត្តធ្វើធម្មយាត្រាលើកទី ២៨ ដោយសហការជាមួយមន្ដ្រីបរិស្ថាន អាជ្ញាធរដែនដី លោកគ្រូ អ្នកគ្រូ សិស្សានុសិស្ស ពលរដ្ឋរាប់រយនាក់ នៅខេត្តបន្ទាយមានជ័យ បានធ្វើពិធីបំបួស ។
លោក យឹម លី ប្រធានមន្ទីរបរិស្ថានខេត្តបន្ទាយមានជ៏យបានអោយដឹងថាព្រៃឈើមានសារៈសំខាន់ណាស់បេលយប់ វាស្រូបយកឧស្ម័នកាបូនិច លុះពេលថ្ងៃវាបានបញ្ចេញអុកស៊ីសែន ។ ហើយគោលបំណងនៃសកម្មភាពធ្វើឡើងតាមជំនឿសាសនានិងប្រពៃណីនេះ គឺដើម្បីផ្សារភ្ជាប់ទៅនឹងការងារសង្គម. កិច្ចការអភិរក្ស និងជម្រុញដាំដើមឈើឡើងវិញផង និងបង្កើនការអភិវឌ្ឍន៍ធនធានមនុស្សអោយស្គាល់បាប បុណ្យ ល្អ អាក្រក់ ហើយខិតខំចូលរួមការងារនេះផង។
ពោលគឺសមស្របតាមទស្សនាទាននិងការណែនាំរបស់លោក សាយ សំអាល់ រដ្ឋមន្ដ្រីក្រសួងបរិស្ថានដែលបានដឹនាំ ឧបត្ថម្ភ គាំទ្រមន្ដ្រីឧទ្យាននុរក្សនៅតាមតំបន់ការពារធម្មជាតិ រួមមានសម្ភារៈជាច្រើនដូចជា មធ្យោបាយធ្វើដំណើរ សំលៀកបំពាក់ឯកសណ្ឋាន ថ្នាំសង្កូវនិងសម្ភារៈប្រើប្រាស់ជាច្រើនទៀត។
ព្រះសង្ឃស្ម័គ្រចិត្តនិមន្យមកក្នុងក្បួនធម្មយាត្រាលើកទី២៨នេះថ្លែងថា ៖ ការបំបួសដើឈើនេះធ្លាប់បានធ្វើ ហើយបានជាលទ្ធផលល្អច្រើនលើការការពារថែរក្សា អភិរក្សដើមឈើ និងព្រៃឈើ។
លោកធម្មបណ្ឌិត ហេង មុនីចិន្ដា នាយកអង្គការពុទ្ធសាសនាដើម្បីអភិវឌ្ឍន៍ (BFD) ដែលដឹកនាំព្រះសង្ឃស្ម័គ្រចិត្តចូលរួមធម្មយាត្រាបានមានប្រសាសន៍ថា ៖ ក្នុងការធ្វើពិធីបំបួសដើមឈើ ដើម្បីអោយបានគង់វង្សយូរអង្វែងនិងជួយបង្កើនប្រសិទ្ធភាពការងារប៉ុណ្ណោះទេ តែវាអាជាកត្តាមួយមានសារៈប្រយោជន៍ក្នុងការបង្កើនជំនឿជឿជាក់ លើកទឹកចិត្តប្រជាពលរដ្ឋសហគមន៍ អោយចូលរួមយ៉ាងសកម្មនិងធ្វើអោយគាត់កាន់តែយល់ច្បាស់ពីសិទ្ធិ តួនាទី ភារៈកិច្ច និងការទទួលខុសត្រូវរបស់ខ្លួនក្នុងការចូលរួមគ្រប់គ្រងលើវិស័យគាំពារបរិស្ថាន ក៏ដូចជាចូលរួមចំណែកមួយ ជួយលើកស្ទួយជីវភាពរស់នៅប្រចាំថ្ងៃ ។
សូមបញ្ជាក់ថា ប្រតិភូព្រះសង្ឃធម្មយាត្រានេះ ក៏បានចូលទស្សនាប្រាសាទបន្ទាយឆ្មារមៅស្រុកថ្មពួក ហើយមានសូត្រធម៌បួងសួងនៅមុខរូបចម្លាក់អវតារលោកិស្វរៈផងដែរ៕ ដោយ ៖ បន្ទាយ