ភ្នំពេញ ៖ កម្លាំងនគរបាលអន្ដោប្រវេសន៍ បន្ដឃាត់ខ្លួនជនជាតិវៀតណាម ចំនួន ១៣នាក់ ក្នុងនោះស្រី ១១នាក់ បានលួចចូលមកស្នាក់នៅ និងប្រមុខរបរដោយខុសច្បាប់គ្មានលិខិតឆ្លងដែននៅកម្ពុជាដោយរកស៊ីនៅតាមហាងកោសជប់ ម៉ាស្សា។
ក្រុមប្រតិបត្តិការចម្រុះនាយកដ្ឋានស៊ើបអង្កេត និងអនុវត្តនិតិវិធី នៃអគ្គនាយកដ្ឋានអន្តោប្រវេសន៍ នៅរសៀលថ្ងៃទី២១ ខែមីនា ឆ្នាំ ២០១៨ នេះ សហការជាមួយស្នងការដ្ឋាន នគរបាលរាជធានីភ្នំពេញ សមត្ថកិច្ចពាក់ព័ន្ធ ដើម្បីចុះត្រួតពិនិត្យគោលដៅ ហាងម៉ាស្សា ស្ថិតតាមបណ្តោយផ្លូវលេខ២៨០ និងផ្លូវលេខ២៧៨ សង្កាត់បឹងកេងកង២ ខណ្ឌចំការមន រាជធានីភ្នំពេញ។
ប្រតិបត្តិការនេះដោយមានការសម្របសម្រួលពី លោក សៀង សុខ ព្រះរាអាជ្ញារងនៃអយ្យការអមសាលាដំបូងរាជធានីភ្នំពេញ និងបានពិនិត្យឃើញមានជនជាតិវៀតណាម ចំនួន១៣នាក់។
ជនជាតិវៀតណាមទាំង១៣នាក់នេះ ត្រូវបានបញ្ជូនទៅកាន់អគ្គនាយកដ្ឋានអន្តោប្រវេសន៍ ដើម្បីធ្វើការណែនាំ និងត្រួតពិនិត្យឯកសារ៕ ដោយ ៖ បញ្ញាស័ក្តិ
