ប៉ូលិសជប៉ុនបានចាប់ស្ត្រីតៃវ៉ាន់ ៣រូប ក្រោមបទចោទប្រកាន់ថា បានរត់ពន្ធមាស ១០,៥គីឡូក្រាម ចូលមកក្នុងជប៉ុនដោយលាក់ក្នុងអាវទ្រនាប់។
ភស្តុតាងនៃការរត់ពន្ធមាស
តាម Taiwan News ហេតុការណ៍ចម្លែកនេះកើតឡើងនៅថ្ងៃទី ១១ វិច្ឆិកា ឆ្នាំ២០១៧ ខណៈពេលដែលភ្នាក់ងារអន្តោប្រវេសន៍ជប៉ុន បានពិនិត្យឃើញស្ត្រីគួរឲ្យសង្ស័យ ៣ នាក់ ហើយក្រោយការឆែកឆេរគេក៏បានឃើញអ្នកទាំង ៣ នាំដុំមាសសណ្ឋានដូចជាសុដន់ មានទម្ងន់ ១០,៥គីឡូក្រាម។
តាមការស៊ើបអង្កេតដំបូង គឺពួកគេលួចនាំមាសចូលមកប្រទេសជប៉ុនមែន។ ក្យូដូ ចុះផ្សាយព័ត៌មាននៅថ្ងៃទី ១៩ មីនា កន្លងមក បញ្ជាក់ថា ប៉ូលិសជប៉ុនបានចាប់ខ្លួនមុខសញ្ញាទាំង ៣ ជាផ្លូវការនៅថ្ងៃ ២៨ ខែកុម្ភៈ។ ស្ត្រីទាំង ៣ មានឈ្មោះ Shu-Fen Chiu, អាយុ ៤៧ឆ្នាំ Yu-Ting Chiu, អាយុ២០ឆ្នាំ, Hui-Ying Chang, អាយុ៤៧ឆ្នាំ ក្រោមបទចោទប្រកាន់ជាផ្លូវការថា បានប្រព្រឹត្តអំពើរត់ពន្ធមាសចូលមកជប៉ុន។ ប្រការដែលជនល្មើសទាំងនេះបានធ្វើគឺ មាសទាំងនេះត្រូវបានគេច្នៃឲ្យមូលដូចសុដន់ រួចដាក់បញ្ចូលក្នុងសន្ទះអាវទ្រនាប់របស់ពួកគេ។ “សុដន់នីមួយៗ” មានវិជ្ជមាត្រ ១១ សង់ទីម៉ែត្រ និងទម្ងន់ប្រមាណ ១,៧៥ គីឡូក្រាម។ ជនល្មើសទាំង ៣ បានសារភាពថា គេទទួលដឹកជញ្ជូនរបស់នេះឲ្យបុរសម្នាក់ ដោយទទួលបានកម្រៃម្នាក់ៗ ៦៨០ ដុល្លារ ៕ ចន្ទ្រា