កំពត ៖ សម្តេចតេជោ ហ៊ុន សែន បានបញ្ជាឲ្យសមត្ថកិច្ចតាមរកបុគ្គលម្នាក់ ដែលសង្ស័យបន្លំខ្លួនធ្វើជាសង្ឃមានឈ្មោះថា សង្ឃម៉ារី ដែលកំពុងចល័តពីកែប ទៅកំពត និងទៅតាកែវ ធ្វើសកម្មភាពដើរនិយាយភូតកុហកអកុសលប្រាប់ប្រជាពលរដ្ឋលើបញ្ហាប្រទេសជាតិ។
លោកឧត្តមសេនីយ៍ទោ ម៉ៅ ច័ន្ទមធុរិទ្ធ ស្នងការនគរបាលខេត្តកំពត បានប្រាប់ថា នាព្រឹកថ្ងៃទី២១ ខែមីនា ឆ្នាំ២០១៨នេះ បន្ទាប់ពីបទបញ្ជាផ្ទាល់មាត់របស់សម្តេចតេជោកម្លាំងសមត្ថកិច្ចនគរបាលបានឃាត់ខ្លួនបុគ្គល ឈ្មោះ សង្ឃម៉ារី បានហើយនៅភូមិព្រែកគ្រឹះ ឃុំព្រែកគ្រឹះ ស្រុកកំពង់ត្រាច ខេត្តកំពត។
បុគ្គលឈ្មោះ សង្ឃម៉ារី នេះ បានទៅដើរភូតកុហកប្រជាពលរដ្ឋលើបញ្ហាប្រទេសជាតិ នៅតាមខេត្ត ក្នុងនោះមានខេត្តកែប ខេត្តកំពតជាដើម ពីដំណើរទស្សនកិច្ចរបស់សម្តេចតេជោ ហ៊ុន សែន ទៅប្រទេសអូស្ត្រាលី ដោយនិយាយថា ទទួលភាពបរាជ័យទាំងស្រុង ហើយត្រូវបានកម្លាំងសមត្ថកិច្ចនាំខ្លួនជននេះ ទៅស្នងការដ្ឋាននគរបាលខេត្ត ដើម្បីបន្តការសួរនាំចាត់វិធានការបន្តទៀត។
ក្នុងកម្មវិធីជួបជាមួយកម្មកររោងចក្រ កាលពីព្រឹកថ្ងៃទី២១មីនានេះ សម្តេចតេជោ ហ៊ុន សែន បានថ្លែងថា បុគ្គលរូបនេះ បានធ្វើសកម្មភាពភូតកុហកប្រជាពលរដ្ឋពីសកម្មភាពរបស់សម្តេច ដូចជាថាសម្តេចរត់គេចពីអ្នកព័ត៌មាន ពេលបំពេញទស្សនកិច្ចនៅក្នុងប្រទេសអូស្ត្រាលី។
សេចក្តីរាយការណ៍បឋមឱ្យដឹងថា នៅរសៀលថ្ងៃដដែលនេះ បុគ្គលម្នាក់ដែលស្លៀកពាក់ជាសង្ឃ និងមានឈ្មោះគណនីហ្វេសប៊ុកថា សង្ឃម៉ារី ត្រូវបានដោះលែងវិញហើយ ក្រោយពីសមត្ថកិច្ចខេត្តបានឃាត់ខ្លួន នាំមកសាកសួរអស់រយៈពេលជាច្រើនម៉ោង កាលពីព្រឹកថ្ងៃទី២១ មីនា នេះ ។ ការសម្រេចដោះលែងរបស់ព្រះរាជអាជ្ញាក៏បានតម្រូវឱ្យបុគ្គលរូប ត្រូវធ្វើកិច្ចសន្យាបញ្ឈប់រាល់សកម្មភាពដែលគាត់ធ្លាប់ធ្វើ កាលពីកន្លងមក ។
សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានបញ្ជាផ្ទាល់មាត់ទៅអភិបាលខេត្តកែប លោក កែន សត្ថា ឲ្យស្វែងរកបុគ្គលម្នាក់ដែលស្លៀកពាក់ជាសង្ឃ និងមានឈ្មោះគណនីហ្វេសប៊ុកថា សង្ឃម៉ារី ដែលតែងតែបង្ហោះសារភូតកុហករឿងប្រទេសជាតិ ។ បុគ្គលនេះពូកែខាងភូត ហើយបុគ្គលនេះមិនច្បាស់ថា ទើបចូលបួស ឬក៏បួសជាសង្ឃយូរហើយ ឬក៏គ្រាន់តែកោសក់ ហើយគ្រងស្បង់បោកបញ្ឆោតគេ ។
សម្តេចតេជោ ហ៊ុន សែនមានប្រសាសន៍ថា “អាម្សៀរនេះ អានេះមេភូត ឪភូត អត់មានវត្តពិតប្រាកដ ខ្ញុំបញ្ជាឲ្យរកអាម្នាក់នេះ។ បុគ្គលរូបនេះ គឺតែងតែចល័តពីកែប ចូលកំពត ជួនទៅចល័តពីកំពតចូលតាកែវ ។ តាមមើលអាមួយនឹង កែន សត្ថា អភិបាលខេត្តកែប តាមរកអាមួយហ្នឹងថ្ងៃហ្នឹង ។ ប្រមុខដឹកនាំបានបន្តថា លោកសង្ឃពិតប្រាកដឬអត់ ? សង្ស័យកោសក់ ហើយដាក់ស្បង់ តែ បើមិនមែនលោកសង្ឃពិតប្រាកដ ក៏ស្រួលតែម្តងទៅ ។ បុគ្គលឈ្មោះ សង្ឃម៉ារី មិនត្រឹមតែភូតកុហករឿងធម្មតាទេ តែបានភូតកុហកថា សម្តេចត្រូវអូស្ត្រាលីចាប់ខ្លួន ជាដើម ប៉ុន្តែអានេះភូត មហាភូត ភូតសុទ្ធតែរឿងប្រទេសជាតិ” ៕ ដោយ៖បញ្ញាស័ក្តិ