ភ្នំពេញ ៖ ក្នុងឱកាសប្រារព្ធទិវា ព្រៃឈើអន្តរជាតិ បណ្តាញសហគមន៍ព្រៃឡង់ទាំងបួនខេត្ត បានសាទរដល់សាធារណជនទូទៅចូលរួមចំណែកការពារព្រៃឈើនៅកម្ពុជា ក៏ដូចជាបង្ការ និងទប់ស្កាត់បម្រែបម្រួលអាកាសធាតុ ជាពិសេសចំពោះរាជរដ្ឋាភិបាលកម្ពុជា ដែលបានយកចិត្តទុកដាក់ចំពោះ កិច្ចការពារធនធានធម្មជាតិ ដែលកំពុងប្រឈមនឹងការបាត់បង់នាពេលបច្ចុប្បន្ន។
ក្នុងសេចក្តីថ្លែងការណ៍ ស្តីពី ទិវា ព្រៃឈើអន្តរជាតិ នៅថ្ងៃទី២១ ខែមីនា ឆ្នាំ២០១៨ បានបញ្ជាក់ថា “នៅក្នុងឱកាសនៃការប្រារព្ធទិវា ព្រៃឈើអន្តរជាតិ យើងខ្ញុំទាំងអស់គ្នាជាសមាជិកបណ្តាញសហគមន៍ព្រៃឡង់ទាំងបួនខេត្ត សូមសម្តែងនូវការសាទរ និងសូមលើក ទឹកចិត្តដល់សាធារណជនទូទៅចូលរួមអបរអរ និងរួមចំណែកជាមួយរាជរដ្ឋាភិបាលកម្ពុជា ដើម្បីការពារព្រៃឈើនៅក្នុងព្រះរាជា ណាចក្រកម្ពុជា ក៏ដូចជាបង្ការ និងទប់ស្កាត់បម្រែបម្រួលអាកាសធាតុសាកល”។
ទិវាព្រៃឈើអន្តរជាតិនេះ ត្រូវបានមហាសន្និបាតអង្គការសហប្រជាជាតិបានអនុម័តនូវ សេចក្តីសម្រេចរួមមួយ (A/RES/67/200) កាលពីថ្ងៃទី ២១ ខែធ្នូ ឆ្នាំ ២០១២ ដែលបានប្រកាសជាសាកលថា ថ្ងៃទី២១ ខែមីនា ជារៀងរាល់ឆ្នាំនឹងត្រូវបានចាត់ជាទិវាព្រៃឈើអន្តរជាតិ។
បើតាមសេចក្តីប្រកាសដដែល បានគូសបញ្ជាក់ថា “នៅក្នុងឱកាសនេះ យើងខ្ញុំក៏សូមសម្តែងនូវការសាទរចំពោះរាជ្យរដ្ឋាភិបាលកម្ពុជា ដែលបានយកចិត្តទុកដាក់ចំពោះ កិច្ចការពារធនធានធម្មជាតិ ដែលកំពុងប្រឈមនឹងការបាត់បង់នាពេលបច្ចុប្បន្ន។ ថ្មីៗនេះ នៅថ្ងៃទី៥ ខែមីនា ឆ្នាំ២០១៨ ក្រសួងបរិស្ថាន បានចុះហត្ថលេខាលើកិច្ចព្រមព្រៀងមួយ ជាមួយនឹងអង្គការអភិរក្សអន្តរជាតិ និងក្រុម ហ៊ុន Mitsui & Co.,LTD ស្តីពីគម្រោងការអភិរក្សព្រៃឈើតំបន់ព្រៃឡង់។នៅក្នុងឆ្នាំ២០១៦ រាជរដ្ឋាភិបាលកម្ពុជា បានចុះហត្ថលេខាលើ អនុក្រឹត្យស្តីពីការគ្រប់គ្រងតំបន់ការពារធម្មជាតិចំនួន១៨ដែលមានផ្ទៃដី សរុបចំនួន ២.៦៧៤.៥០៣ (ពីរលានប្រាំមួយសែនប្រាំពីរម៉ឺនបួនពាន់ប្រាំរយបី) ហិកតា ឱ្យស្ថិតនៅក្រោមការគ្រប់គ្រង និងអភិរក្សរបស់ក្រសួងបរិស្ថាន។ នៅក្នុងផ្ទៃដីសរុបទាំងនេះ ព្រៃឡង់ក៏ត្រូវបានដាក់ជាព្រៃការពារ ដែនជម្រកសត្វព្រៃ “ព្រៃឡង់” ផងដែរ។
ការសម្រេចខាងលើទាំងនេះបានបញ្ជាក់ពីការប្តេជ្ញាចិត្ត និងការសម្រចចិត្តដ៏ត្រឹមត្រូវ និងឈ្លាសវៃបំផុតរបស់រាជរដ្ឋាភិបាល ក្នុងបុព្វ ហេតុការពារព្រៃឈើ ក៏ដូចជាព្រៃឡង់ដែលជាព្រៃចុងក្រោយនៅ កម្ពុជា និងតំបន់។ យើងខ្ញុំសូមប្តេជ្ញាចិត្ត ចូលរួមចំណែកជាមួយរាជរដ្ឋាភិបាលកម្ពុជា ដើម្បីការពារព្រៃឡង់ឱ្យនៅគង់វង្សសម្រាប់កូនចៅជំនាន់ក្រោយ”។
ស្របពេលដែលរាជរដ្ឋាភិបាលកម្ពុជា ក្រសួងសាមី អង្គការដៃគូ អ្នកពាក់ព័ន្ធ និងបណ្តាញ សហគមន៍ព្រៃឡង់កំពុងខិតខំប្រឹងប្រែង ការពារព្រៃឈើនៅតំបន់ព្រៃការពារដែនជម្រកសត្វព្រៃ ព្រៃឡង់ ក៏ដោយ ក៏បញ្ហាប្រឈមដែលកើតឡើងពីអ្នកចំណូលថ្មី និងប្រជា ពលរដ្ឋដែលរស់នៅជុំវិញព្រៃឡង់មួយចំនួននៅបន្តកាប់រានដីព្រៃយកធ្វើជាកម្មសិទ្ធិ និងជនអាណាធិបតេយ្យមួយចំនួនបន្តលួចចូលកាប់ឈើនៅក្នុងព្រៃឡង់នៅតែបន្តកើតមានគួរឱ្យព្រួយបារម្ភ។
សហគមន៍ព្រៃឡង់ សូមអំពាវនាវដល់ រាជរដ្ឋាភិបាលកម្ពុជា ក្រសួងសាមី អង្គការដៃគូ អ្នកពាក់ព័ន្ធ ក៏ដូចជាសាធារណជនទូទៅមេត្តាខិតខំប្រឹងប្រែងបន្តទៀត ដើម្បីបញ្ឈប់សកម្មភាពបទល្មើសដែលកំពុងបន្តកើតមាននៅក្នុងតំបន់ព្រៃឡង់ និងសូមលើកទឹកចិត្តដល់ប្រជាពលរដ្ឋដែលកំពុងកាប់រានដីព្រៃ និងកាប់ឈើអាណាធិបតេយ្យ មេត្តាបញ្ឈប់សកម្មភាពរបស់ខ្លួន ហើយងាកមកចូលរួមការពារព្រៃឈើជាមួយរាជរដ្ឋាភិបាលកម្ពុជា ក្រសួងសាមី អង្គការដៃគូ អ្នកពាក់ព័ន្ធ និងយើងខ្ញុំជាបណ្តាញសហគមន៍ព្រៃឡង់ដែលជាក្រុមសហគមន៍អ្នកស្ម័គ្រចិត្ត។ យើងរួមគ្នាការពារព្រៃឡង់ ព្រៃឡង់ជាព្រៃរបស់យើងទាំងអស់គ្នា៕ ដោយ៖បញ្ញាស័ក្តិ