ភ្នំពេញ ៖ ទាក់ទងនឹងផលិតផលដំឡូងមី លោករដ្ឋមន្ត្រីកសិកម្ម បានគូសបញ្ជាក់ថា កម្ពុជាមានផ្ទៃដីដាំដុះដំឡូងមីចំនួនប្រមាណជាង ៦០០ពាន់ហិកតា និងទទួលបានទិន្នផលជាង ១៤លានតោន ក្នុងឆ្នាំ២០១៧ ហើយរាជរដ្ឋាភិបាលបានឯកភាពលើការវិនិយោគសាង សង់រោងចក្រកែច្នៃ ដំឡូងមីរបស់ក្រុមហ៊ុនមកពីហុងកុង ហើយសង្ឃឹមថា នឹងអាចស្រូបយកវត្ថុធាតុដើមនេះ បានមួយភាគធំ ពី បណ្តាខេត្តដែលមានសក្តានុពលដាំដុះដំឡូងមីនេះ ដើម្បីធ្វើការកែច្នៃរួចនាំចេញ។
នារសៀលថ្ងៃអង្គារ ទី២០ ខែមីនា ឆ្នាំ២០១៨ នៅទីស្តីការក្រសួង លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានអនុញ្ញាតឲ្យលោកស្រី LADAWAN WONGSRIWONG ជាអ្នកប្រឹក្សាយោបល់ថៃ ទាក់ទងនិងសេដ្ឋកិច្ច សង្គមក្នុងស្រុកនិងអន្តរ ជាតិ និងសហការីចូលជួបសម្តែងការគួរសម និងពិភាក្សាការងារ ទាក់ទងដំណើរការ នៃការនាំចេញវត្ថុធាតុដើមដំឡូងមី និងបញ្ហាពាក់ព័ន្ធមួយចំនួន នៃការនាំចេញផលិតផលនេះកន្លងមក។
មានមតិស្វាគមន៍ លោករដ្ឋមន្ត្រី បានថ្លែងអំណរគុណចំពោះរាជរដ្ឋាភិបាល និងប្រជាជនថៃ ដែលកន្លងមក តែងតែគាំទ្រផលិតផលកសិកម្មរបស់កម្ពុជា ចំពោះការធ្វើពាណិជ្ជកម្ម នាឆ្នាំកន្លងមក បានជួបបញ្ហាប្រឈមជាចម្បងនោះ គឺការបន្ទាបតម្លៃពីឈ្មួញ ធ្វើឲ្យផលិតផលដំឡូងមី មានការកកស្ទះគ្មានទីផ្សារ កសិករប្រឈម និងការខាតបង់ យ៉ាងច្រើន ជាងនេះទៅទៀត ដោយសារកម្ពុជានៅមិនទាន់មានហេដ្ឋារចនាសម្ព័ន្ធ ឬលទ្ធភាពគ្រប់គ្រាន់ក្នុងការកែច្នៃ ធ្វើឲ្យទីផ្សារ និងតម្លៃនៃវត្ថុធាតុដើមនេះ ត្រូវរំពឹងទៅលើតែប្រទេសជិតខាង។ ដើម្បីដោះស្រាយបញ្ហានេះ ថ្មីៗនេះរាជរដ្ឋាភិបាល បានឯកភាពលើការវិនិយោគសាងសង់រោងចក្រកែច្នៃ ដំឡូងមីរបស់ក្រុមហ៊ុនមួយមកពីហុងកុង ដែលមានគម្រោងសាងសង់រោងចក្រកែច្នៃឲ្យបាន៥ ទៅ ១០រោងចក្រ ហើយសង្ឃឹមថា នឹងអាចស្រូបយកវត្ថុធាតុដើមនេះ បានមួយភាគធំ ពីបណ្តាខេត្តដែលមានសក្តានុពលដាំដុះដំឡូងមីនេះ ដើម្បីធ្វើការកែច្នៃរួចនាំចេញ។ ទន្ទឹមនិងនេះ រាជរដ្ឋាភិបាលបានដាក់ចេញនូវយន្តការកំណែទម្រុង ដើម្បីអភិវឌ្ឍវិស័យកសិកម្មសម្រាប់រយៈពេលវែងគឺត្រូវកំណត់តំបន់ដាំដុះ ប្តូរពូជដំណាំ និងធ្វើផែនការដាំដុះឲ្យបានសមស្របតាមតម្រូវការទីផ្សារ។
ជាការឆ្លើយតបនូវអ្វីដែលលោករដ្ឋមន្ត្រីបានលើកឡើង លោកស្រី LADAWAN WONGSRIWONG បានគាំទ្រនូវទស្សននិងគោលនយោបាយរបស់ក្រសួង ដែលផ្តោតលើការដាំដុះ និងនាំចេញជាប្រព័ន្ធ ដើម្បីធានាបានទាំងបរិមាណ និងគុណភាព។ ព្រមជាមួយគ្នានេះដែរ លោកស្រីសូមសាទរចំពោះព័ត៌មាន ដែលថាមានក្រុមហ៊ុនហុងកុង មកបណ្តាក់ទុនវិនិយោគសាងសង់ រោងចក្រកែច្នៃដំឡូងមី នេះគឺជាដំណោះស្រាយទីផ្សារមួយ យ៉ាងល្អ សម្រាប់ផលិតផលដំឡូងមី និងអាចរក្សាបាននូវតម្លៃមួយសមស្រប តាមរយៈការធ្វើកសិកម្មតាមកិច្ចសន្យា។ លោកស្រី នឹងពាំនាំដំណឹងនេះ ទៅជម្រាបប្រាប់ភាគីថៃ ពិសេសឈ្មួញដែលកំពុងទិញវត្ថុធាតុដើមដំឡូងមីពីកម្ពុជា ឲ្យត្រៀមលក្ខណៈធ្វើការប្រកួតប្រជែង ឈរលើគោលការណ៍ទីផ្សារសេរី។ ដើម្បីបន្តនិរន្តរភាព នៃការផលិត និងការនាំចេញ លោកស្រី បានស្នើឲ្យភាគីកម្ពុជា ជួយធ្វើការផលិត ក្នុងទិសដៅពីរយ៉ាង ទី១ គឺដើម្បីផ្គង់ផ្គង់ឲ្យរោងកែច្នៃ ក្នុងស្រុក បំណងរក្សាបាននូវភាពជឿជាក់ នៃអ្នកវិនិយោគ និងទី២ ផលិតដើម្បីនាំចេញ ជាវត្ថុធាតុដើមទៅប្រទេសភូមិផងរបងជាមួយ ដើម្បីចំណងមិត្តភាព និងកិច្ចសហប្រតិបត្តិការល្អសម្រាប់ជាប្រយោជន៍នៃប្រទេសទាំងពីរ។
លោករដ្ឋមន្ត្រី បានផ្តល់យោបល់ជូនភាគីថៃ គឺគួរបង្កើតក្រុមការងារ ដែលមានសមាជិករដ្ឋាភិបាល និងវិស័យឯកជន ទាំងពីរប្រទេសរួមគ្នាពិគ្រោះ ដោះស្រាយនូវរាល់បញ្ហា ដែលកើតមានឡើង ក្នុងបំណងជួយជំរុញ ការនាំចេញវត្ថុធាតុដើមនេះ ទៅកាន់ទីផ្សារថៃ ឲ្យអស់លទ្ធភាព។ ក្រៅពីនេះ ឈ្មួញប្រមូលទិញដំឡូងមី គួរតែធ្វើកិច្ចសន្យាដាំដុះ ដើម្បីឲ្យកសិករកម្ពុជា មានភាពជឿជាក់កក់ក្តៅក្នុងការដាំដុះ៕ ដោយ៖បញ្ញាស័ក្តិ