ភ្នំពេញ ៖ វិទ្យាស្ថានជាតិប្រៃសណីយ៍ ទូរគមនាគមន៍ បច្ចេកវិទ្យាគមនាគមន៍និងព័ត៌មាន (NIPTICT) កំពុងរៀបចំកម្មវិធី ពានរង្វាន់បច្ចេកវិទ្យាគមនាគមន៍និងព័ត៌មាន( ICT) កម្ពុជា ឆ្នាំ២០១៨ ដែលជាកម្មវិធីប្រកួតប្រជែងដ៏ធំមួយ ដើម្បីបង្ហាញនូវសមិទិ្ធផលជោគជ័យនានា លើការធ្វើនវានុវត្តន៍ ក្នុងវិស័យបច្ចេកវិទ្យាគមនាគមន៍ និងព័ត៌មាន នៅព្រះរាជាណាចក្រកម្ពុជា។ បេក្ខជនអាចដាក់ពាក្យចូលរួមប្រកួតប្រជែងមកពី ក្រុមហ៊ុនឯកជនក្នុងស្រុក ក្រុមហ៊ុនចាប់ផ្តើមធុរកិច្ច (Start-up) សង្គមស៊ីវិល អង្គការក្រៅរដ្ឋាភិបាល ឬ ស្ថាប័នរដ្ឋពាក់ព័ន្ធផ្សេងៗ មុនថ្ងៃទី១៥ ខែឧសភា ឆ្នាំ២០១៨។
ក្នុងសន្និសីទសារព័ត៌មាន កាលពីរសៀល ថ្ងៃទី២១ ខែ មីនា ឆ្នាំ២០១៨នៅទីស្តីការក្រសួងប្រៃសណីយនិងទូរគមនាគមន៍ វិទ្យាស្ថានជាតិប្រៃសណីយ៍បានប្រកាសការប្រកួតប្រជែងពានរង្វាន់ICTកម្ពុជាលើកទី៤ ដែលជាកម្មវិធីប្រកួតប្រជែងដ៏ធំមួយដើម្បីបង្ហាញនូវសមិទ្ធិផលជោគជ័យនានាលើការធ្វើនវានុវត្តន៍(ការច្នៃប្រឌិតថ្មី)ក្នុងវិស័យបច្ចេកវិទ្យាគមនាគមន៍និងព័ត៌មាននៅព្រះរាជាណាចក្រកម្ពុជា។
ក្នុងឱកាសនោះដែរ លោក ខូវ មករា អនុរដ្ឋលេខាធិការក្រសួងប្រៃសណីយនិងទូរគមនាគមន៍ បានមានប្រសាសន៍ថា កម្មវិធីប្រកួតប្រជែងពានរង្វាន់បច្ចេកវិទ្យាគមនាគមន៍និងព័ត៌មាន ពិតជាមានសារសំខាន់ណាស់ ដើម្បីលើកស្ទួយគំនិតច្នៃប្រឌិតវិស័យICTនៅកម្ពុជា ឱ្យកាន់តែរីកចម្រើន និងបង្កើតឱកាសដល់ពលរដ្ឋខ្មែរ ដែលមានចំណេះដឹងផ្នែកបច្ចេកវិទ្យា បង្ហាញសមត្ថភាព និងជំនាញរបស់ខ្លួន ដើម្បីអភិវឌ្ឍន៍ប្រទេស។ កម្មវិធីប្រកួតប្រជែងនេះ មិនត្រឹមតែមានកេរ្តិ៍ឈ្មោះក្នុងស្រុកប៉ុណ្ណោះទេ តែថែមទាំងមានឈ្មោះនៅអន្តរជាតិផងដែរ។
លោក ស៊ុន រ៉ាពីត អនុប្រធានវិទ្យាស្ថានជាតិប្រៃសណីយ ទូរគមនាគមន៍ និងបច្ចេកវិទ្យាទូរគមនាគមន៍និងព័ត៌មានបានឱ្យដឹងថា គម្រោងដែលមានលក្ខណៈច្នៃប្រឌិត និងនវានុវត្តន៍ អាចចុះឈ្មោះចូលរួមប្រកួតប្រជែងការចាប់ផ្តើមចុះឈ្មោះក្នុងកម្មវិធីប្រកួត ប្រជែង ពានរង្វាន់ ICT កម្ពុជា ត្រូវបានបើកចាប់ពីថ្ងៃទី២១មីនាតទៅ។ ស្ថាប័នរដ្ឋ ក្រុមហ៊ុនឯកជន ក្រុមហ៊ុនចាប់ផ្តើមធុរកិច្ច (Start-up) ឬអង្គការមិនមែនរដ្ឋាភិបាល អាចផ្ញើមកនូវព័ត៌មានពី សេវាកម្ម ផលិតផល ឬដំណោះស្រាយក្នុងផ្នែក ICT របស់ខ្លួន ដើម្បីចូលរួមកម្មវិធីប្រកួតប្រជែង។ លោកបន្តថា ចាប់ពីឆ្នាំ ២០១៥ វិទ្យាស្ថានជាតិ NIPTICT បានរៀបចំកម្មវិធីប្រកួតប្រជែង ពានរង្វាន់ ICT កម្ពុជា នេះឡើងក្នុងគោលបំណងជំរុញលើកទឹកចិត្ត និងលើកកម្ពស់ផលិតផល ឬគម្រោង ដ៏ឆ្នើមនៅកម្ពុជា។ ម្ចាស់ជ័យលាភីចំនួន៣រូប នឹងទទួលពានរង្វាន់ជាទឹកប្រាក់រហូត ដល់ទៅមួយម៉ឺនដុល្លារ ជ័យលាភីលេខ១ បីពាន់ដុល្លារជ័យលាភីលេខ២ និងពីរពាន់ដុល្លារជ័យលាភីលេខ៣ រីឯជ័យលាភីល្អផ្តាច់គេក្នុងវិស័យនីមួយៗនឹងទទួលពានរង្វាន់ជាទឹកប្រាក់ពីរពាន់ដុល្លារ ដែលពានរង្វាន់នេះនឹងជួយឱ្យអាជីវកម្មរបស់ពួកគេឈានឡើងបានមួយកម្រិតទៀត។ រង្វាន់មិនត្រូវបានផ្តល់ជូនត្រួតគ្នាសម្រាប់ម្ចាស់ជ័យលាភីឡើយ។ ម្ចាស់ជ័យលាភីទទួលបានតែរង្វាន់ធំបំផុតតែមួយគត់។ ក្នុងឆ្នាំ២០១៧ ក្រុមហ៊ុនដែលទទួលបានជ័យលាភីទាំង៣ គឺ ១/ JAILBREAK The Game បង្កើតឡើងដោយ Direct Play ដែលនេះជាហ្គេម សម្រាប់លេងតាមទូរស័ព្ទដែលបានរចនាឡើងបន្ទាប់ពីខ្សែភាពយន្តខ្មែរ មានចំណងជើងថា Jailbreak ២/ Bong Pheak បង្កើតឡើងដោយ Open Institute។ Bong Pheak គឺជាសេវាកម្មការងារដែលបានបើកដំណើរការនៅខែតុលាឆ្នាំ២០១៦ ដែលដាក់បង្ហាញនូវការងារគ្មានជំនាញ និងការងារប្រើជំនាញតិចតួច ៣/ប្រព័ន្ធចុះបញ្ជីរថយន្តស្វ័យប្រវត្តិដោយក្រសួងសាធារណការ និងដឹកជញ្ជូន ដែលប្រព័ន្ធថ្មីនេះអនុញ្ញាតឱ្យពលរដ្ឋចុះឈ្មោះរថយន្តរបស់ពួកគេតាមរយៈកម្មវិធីអនឡាញ ដែលអាចសន្សំសំចៃពេលវេលា និងថវិកា និងលុបបំបាត់ជាលំដាប់នូវការបង់ប្រាក់ក្រៅផ្លូវការ។ កម្មវិធីនេះអនុញ្ញាតឱ្យគ្រប់ស្ថាប័នទាំងអស់បង្ហាញពីភាពច្នៃប្រឌិត។
លោកបណ្ឌិត សេង សុភាព ប្រធានវិទ្យាស្ថានជាតិNIPTICT បានមានប្រសាសន៍ថា “នវានុវត្តន៍អាចចាប់ផ្តើមចេញពីគ្រប់មជ្ឈដា្ឋនទាំងអស់។ ហេតុដូច្នេះហើយទើបកម្មវិធីប្រកួតប្រជែង នឹងផ្តួចផ្តើមឲ្យមានពានរង្វាន់ សម្រាប់ពហុវិស័យ ដែលអនុញ្ញាតឲ្យក្រុមហ៊ុន Star-up ក្រុមហ៊ុន ឯកជន ស្ថាប័នរដ្ឋនិងអង្គការមិនមែនរដ្ឋាភិបាលចូលរួមបង្ហាញពីភាពច្នៃប្រឌិតរបស់ពួកគេ”។ លោកបានឱ្យដឹងទៀតថា បេក្ខជនអាចដាក់ពាក្យប្រកួតប្រជែង ក្នុងវិស័យផ្សេងៗចំនួន៦រួមមាន ការចាប់ផ្តើមធុរកិច្ច មាតិកាឌីជីថល វិស័យឯកជន ការទទួលខុសត្រូវក្នុងសង្គម វិស័យសាធារណៈ និងការស្រាវជ្រាវនិងអភិវឌ្ឍន៍។
បន្ទាប់ជម្រុះជុំទី១ បេក្ខជនដែលជាប់វគ្គជម្រុះទាំងអស់ នឹងត្រូវបានជ្រើសរើស ឲ្យធ្វើបទបង្ហាញអំពីគម្រោងរបស់ពួកគេ ទៅកាន់ចៅក្រម ដែលមានសមាសភាព មកពីក្រុមហ៊ុនឯកជន ស្ថាប័នរដ្ឋ សង្គមស៊ីវិល និងអ្នកតំណាងឧស្សាហកម្មក្នុងវិស័យICT ក្នុងវគ្គពាក់កណ្តាលផ្តាច់ព្រ័ត្រ។ មានតែបេក្ខជន១២រូបប៉ុណ្ណោះ នឹងត្រូវបានជ្រើសចូលប្រកួតប្រជែង ក្នុងវគ្គផ្តាច់ព្រ័ត្រ។ គម្រោងប្រកួតប្រជែងនឹងត្រូវបានវាយតម្លៃដោយផ្អែកលើភាពច្នៃប្រឌិត អត្ថប្រយោជន៍ដល់សង្គម គុណភាពនិងភាពទុកចិត្តបាននៃផលិតផលនិងកម្រិតប្រើប្រាស់បច្ចេកវិទ្យានៅក្នុងគម្រោង។ ជ័យលាភី៦រូប នឹងត្រូវជ្រើសតរើស ដែលក្នុងនោះជ័យលាភីមួយរូប សម្រាប់មួយវិស័យ។ ក្នុងចំណោមជ័យលាភីទាំង៦រូប នឹងមានតែជ័យលាភី៣រូបប៉ុណ្ណោះ ដែលត្រូវជ្រើសរើស សម្រាប់ពានរង្វាន់ចុងក្រោយ ដែលនឹងប្រព្រឹត្តទៅនៅថ្ងៃទី១៥ ខែមិថុនា ឆ្នាំ២០១៨ខាងមុខ ក្រោមអធិបតីភាពលោករដ្ឋមន្ត្រីក្រសួងប្រៃសណីយនិងទូរគមនាគមន៍។
លោកថូម៉ាស់ ហាន់ (Thomas Hundt) អគ្គនាយកប្រតិបត្តិក្រុមហ៊ុនSmart Axiata បានសម្តែងការជឿជាក់ថាពានរង្វាន់ICTកម្ពុជា ផ្តល់ឱកាសពិសេស សម្រាប់បណ្តាស្ថាប័ន និងបុគ្គលនានា ក្នុងការបង្ហាញផលិតផលនវានុវត្ត៍ ជំនាញ និងការនាំមុខទៅកាន់ឌីជីថល តាមរយៈគំរូអាជីវកម្មថ្មីៗ ដែលផ្តល់អត្ថប្រយោជន៍ដល់សង្គមជាតិ។ លើលទ្ធផលនៃកម្មវិធីប្រកួតប្រជែងនេះ នឹងពង្រឹង លើកទឹកចិត្ត និងកសាងយុគសម័យបច្ចេកវិទ្យារបស់កម្ពុជា ឆ្ពោះទៅកាន់យុគសម័យឌីជីថល និង ICT ឱ្យស្របជាមួយប្រទេសក្នុងតំបន់។
សូមបញ្ជាក់ថា កាលពីឆ្នាំ២០១៧ បេក្ខជនចំនួន១២ ទទួលបានឱកាសចូលរួមក្នុងកម្មវិធីពានរង្វាន់ ICT អាស៊ាន ឆ្នាំ២០១៧ ដែលត្រូវបានរៀបចំឡើងនៅខេត្តសៀមរាប ព្រះរាជាណាចក្រកម្ពុជា ដែលក្នុងនោះក្រុមរបស់កម្ពុជាចំនួន៣ បានទទួលបានមេដាយមាសបី ក្នុងពាន់រង្វាន់ ICT អាស៊ាន គឺក្រុមហ៊ុន BookmeBus ក្នុងវិស័យការបង្កើតធុរកិច្ច កម្មវិធី Bong Pheak ក្នុងវិស័យការទទួលខុសត្រូវក្នុងសង្គម និង Sokhakrom ក្នុងវិស័យឯកជន។ បេក្ខជនចូលរួមប្រកួតប្រជែងក្នុងឆ្នាំ២០១៨ ក៏មានឱកាសចូលរួមក្នុងថ្នាក់តំបន់ផងដែរ។
បេក្ខជនជ័យលាភីICTឆ្នាំ២០១៧ មកពីក្រុមហ៊ុន DirectPlay លោក ឈួម ពិសិដ្ឋ និងលោក ជា ឡង់ដា មកពី BookMe Bus ក៏បានចែករំលែកបទពិសោធន៍របស់ខ្លួន ក្នុងការប្រកួតកាលបីឆ្នាំមុន និងបានចាត់ទុកកម្មវិធី ប្រកួតប្រជែងនេះ ជាឱកាសល្អសម្រាប់ក្រុមហ៊ុនតូចៗ និងក្រុមហ៊ុនទើបចាប់ផ្តើមអាជីវកម្មដំបូង បង្ហាញនូវសមត្ថភាពនិងស្នាដៃ៕ ដោយ៖បញ្ញាស័ក្តិ
