បាត់ដំបង ៖ មន្ត្រីជំនាញកាំកុងត្រូលខេត្តបាត់ដំបង សហការជាមួយ អគ្គនាយកដ្ឋានពិសោធន៍ និងកម្លាំងចម្រុះចុះទៅត្រួតពិនិត្យស្ថានីយ៍ប្រេងឥន្ទនៈចំនួន៧កន្លែង នៅទីរួមខេត្តបាត់ដំបងដោយបានរកឃើញ ស្ថានីយ៍ប្រេងទាំងនោះ លក់ប្រេងមិនគ្រប់បរិមាណ និងមិនមានគុណភាពតាមស្តង់ដារ។ ការចុះត្រួតពិនិត្យនេះធ្វើឡើងនៅថ្ងៃទី២១ ខែមីនា ឆ្នាំ២០១៨នេះ ។
លោក ហាក់ សុខរិន ប្រធានសាខាកាំកុងត្រូលខេត្តបាត់ដំបង បានថ្លែងថា មន្ត្រីសាខាកាំកុងត្រូលខេត្តបាត់ដំបង បានសហការជាមួយមន្ត្រីមន្ទីរពិសោធន៍ចល័ត និងផ្នែកប្រេងឥន្ធនៈ រួមជាមួយមន្ត្រី នៃមន្ទីរពាណិជ្ជកម្ម និងអាជ្ញាធរដែនដី បានចុះត្រួតពិនិត្យស្ថានីយ៍ប្រេងឥន្ទនៈ មួយចំនួននៅក្នុងក្រុងបាត់ដំបង ខេត្តបាត់ដំបង ។ ក្នុងការត្រួតពិនិត្យដោយឧបករណ៍ពិសោធន៍ប្រេងឥន្ធនៈចំនួន៧ស្ថានីយ៍បានរកឃើញស្ថានីយ៍ចំនួន៥ ដែលបានលួចបន្លំទាំងបរិមាណ គុណភាព និង២ស្ថានីយ៍ទៀត បានលួចបន្លំបរិមាណ ។
លោកប្រធានសាខាកាំកុងត្រូល បានបន្តថា បន្ទាប់ពីបានរកឃើញលទ្ធផលទាំងនេះ មន្ត្រីជំនាញអគ្គនាយកដ្ឋានកាំកុងត្រូលបានធ្វើការណែនាំ ដល់ពួកគេ និងធ្វើកិច្ចសន្យា បញ្ឈប់សកម្មភាពនូវការកេងបន្លំបែបនេះបន្តទៀត។ លោកបានអំពាវនាវ ដល់ម្ចាស់ស្ថានីយ៍ប្រេងឥន្ធនៈទាំងនោះ បញ្ឈប់ការកេងបន្លំទាំងបរិមាណ និងគុណភាពក្នុងការលក់ជូនអតថិជន៕ ដោយ ៖ បញ្ញាស័ក្តិ
