សារព័ត៌មានរដ្ឋចិន នៅថ្ងៃព្រហស្បតិ៍នេះបានចេញផ្សាយថា ប្រទេសចិនគួរតែត្រៀមខ្លួនសម្រាប់ធ្វើសកម្មភាពយោធាលើកោះតៃវ៉ាន់ និងដាក់សម្ពាធលើទីក្រុងវ៉ាន់ស៊ីនតោនជុំវិញ កិច្ចសហប្រតិបត្តិការលើកូរ៉េខាងជើង។ នេះបើតាមការចេញផ្សាយរបស់សារព៌តមាន Channel News Asia។
ការជំរុញឲ្យចិនចាត់វិធានការយោធាលើតៃវ៉ាន់កើតមានឡើង ក្រោយពេលអាមេរិចបានចេញច្បាប់ដើម្បីរឹតចំណងមិត្តភាពជាមួយនឹងតៃវ៉ាន់។
ទីក្រុងប៉េកាំងក្តៅក្រហាយយ៉ាងខ្លាំង ក្រោយពេលប្រធានាធិបតីអាមេរិច ដូណាល់ ត្រាំ បានចុះហត្ថលេខាលើច្បាប់កាលពីអាទិត្យមើល ដែលច្បាប់នោះជំរុញឲ្យអាមេរិចបញ្ជូនមន្ត្រីជាន់ខ្ពស់ទៅតៃវ៉ាន់ ដើម្បីជួបប្រជុំជាមួយនឹងមន្ត្រីតៃវ៉ាន់ និងការធ្វើដំណើររបស់មន្ត្រីជាន់ខ្ពស់តៃវ៉ាន់មកអាមេរិចវិញ។
មហាអំណាចអាស៊ី ចិននៅតែចាត់ទុកកោះតៃវ៉ាន់គឺជាផ្នែកមួយរបស់ចិន និងត្រូវរួបរួមគ្នាវិញនៅថ្ងៃអនាគត។ កាលពីថ្ងៃអង្គារកន្លងទៅនេះ ប្រធានាធិបតីចិន ស៊ី ជីងពីងបានថ្លែងថា រាល់ការប៉ុនប៉ងផ្តាច់ខ្លួនចេញរបស់តៃវ៉ាន់ នឹងត្រូវរងទណ្ឌកម្មប្រវត្តិសាស្ត្រ។
កាសែតចិន Global Times និយាយនៅក្នុងវិចារណកថារបស់ខ្លួនថា ចិនត្រូវតែវាយបកវិញប្រឆាំងនឹងច្បាប់នោះ (ច្បាប់អាមេរិចទើបតែអនុម័ត)។
កាសែតថ្លែងថា “ចិនអាចដាក់សម្ពាធលើអាមេរិចតាមរយៈចំនុចដទៃៗនៃកិច្ចសហប្រតិបត្តិការ ដូចជា បញ្ហាឧបទ្វីបកូរ៉េ និងបញ្ហានុយក្លេអ៊ែរអ៊ឺរ៉ងជាដើម។ ចិនក៏អាចប្រឆាំងទៅនឹងអាមេរិចនៅក្នុងអង្គការអន្តរជាតិដែរដូចជា អង្គការសហប្រជាជាតិ”។
“ចិនត្រូវតែត្រៀមខ្លួនដាច់ខាតសំរាប់វិធានការយោធាផ្ទាល់លើតៃវ៉ាន់។ ចិនត្រូវតែធ្វើឲ្យច្បាស់ថាការធ្វើបង្កើនទំនាក់ទំនងផ្លូវការរវាងអាមេរិច និងតៃវ៉ាន់ នឹងនាំឲ្យមានផលវិបាកកាន់តែខ្លាំងដល់តៃវ៉ាន់”៕ សុភ័ក្ត្រ
