បុរសសញ្ជាតិម៉ាឡេស៊ីម្នាក់ បានដាក់ពាក្យបណ្តឹងក្រោយពេលគាត់បានប្រើប្រាស់ទង់ជាតិដើម្បីតុបតែងពិធីជប់លៀងកណ្តាលវាលមួយរងការចោទប្រកាន់ថា ជាទង់ជាតិអាមេរិក ជាប់បន្ថែមនិមិត្តសញ្ញារបស់អង្គការភេរវកម្ម IS ។
ទង់ជាតិម៉ាឡេស៊ី
តាមពាក្យបណ្តឹងកាលពីខែកញ្ញាឆ្នាំទៅមិញ របស់បុគ្គលិកនៃផ្នែកគ្រប់គ្រងការរៀបចំព្រឹត្តិការណ៍ទៅកាន់ FBI ដោយចោទប្រកាន់ថា ពលរដ្ឋម៉ាឡេស៊ី Munir Zanial ដែលជាវិស្វករម្នាក់នៅអាមេរិក សង្ស័យថាបានរៀបចំពិធីជប់លៀងកណ្តាលវាលមួយសំដៅប្រមូលផ្តុំអ្នកគាំទ្រពួក IS។
មូលហេតុដែលបុគ្គលិកនេះមានការភ័ន្តច្រឡំ គឺដោយសារភ្ញៀវចូលរួមទាំង៤៥នាក់ សុទ្ធសឹងជាជនអ៊ីស្លាម ក្នុងនោះមានភ្ញៀវស្រីម្នាក់ថែមទាំងបានបិទស្បៃបាំងមុខ។ នៅក្នុងពិធីជប់លៀងតាមបុគ្គលិកនោះគឺឃើញមានទង់ជាតិម៉ាឡេស៊ី ហើយបុគ្គលិកនោះច្រឡំថា វាជាទង់ជាតិអាមេរិក ដោយបិទបន្ថែមនិមិត្តសញ្ញា IS ។
ប្រហែល ១ខែ ក្រោយមក ភ្នាក់ងារពិសេសម្នាក់របស់ FBI បានប្រកាសប្រាប់ដល់លោក Munir អំពីការស៊ើបអង្កេតទាក់ទិនដល់ព័ត៌មានដែលបុគ្គលិកគ្រប់គ្រងការរៀបចំព្រឹត្តិការណ៍រាយការណ៍ដូចពោលខាងលើ។ ក៏ប៉ុន្តែលទ្ធផលនៃការស៊ើបអង្កេត បង្ហាញឲ្យឃើញថា ទង់ដែលប្រើក្នុងពិធីជប់លៀងនោះតាមពិតទៅជាទង់ជាតិម៉ាឡេស៊ី ហេតុនេះ FBI មានគម្រោងបិទករណីស៊ើបអង្កេត។
ប៉ុន្តែដល់ខែមករា ឆ្នាំ ២០១៨ ពេលលោកចង់រៀបចំព្រឹត្តិការណ៍ដូចខាងលើស្រាប់តែត្រូវបានគេហាមឃាត់ ពេលសាកសួរមូលហេតុទើបដឹងថា គេនៅ “មន្ទិលសង្ស័យ” ចំពោះពិធីជប់លៀងកាលពីលើកមុន។
សម្រង់ឯកសារឲ្យដឹងថា ក្នុងពិធីជប់លៀងលើកមុន និងមានវត្តមានទង់ជាតិម៉ាឡេស៊ី គឺសំដៅអបអរទិវាបុណ្យជាតិលើកទី ៦០ របស់ម៉ាឡេស៊ី។ បញ្ហានេះធ្វើឲ្យលោក Munir មានការតានតឹងខ្វាយខ្វល់យ៉ាងខ្លាំងជុំវិញឥទ្ធិពលមកលើការរស់នៅរបស់លោក។ ក្នុងពាក្យបណ្តឹងបក លោកបានលើកឡើងថា ៖ ខ្ញុំទទួលអារម្មណ៍រងការរើសអើងជាតិសាស និងសាសនា ៕ សូយន