តម្លៃក្រចក ១គីឡូក្រាម អាចកើនដល់ទៅជាង ១៥០០ដុល្លារ នាប្រទេសចិន ខណៈពេលដែលប្រទេសដទៃបែរជានាំគ្នាគ្រវាត់ចោលទំនិញ ដែលចំណេញងាយៗយ៉ាងនេះសោះ។
បុរសសញ្ជាតិចិនម្នាក់បានទៅទិញថ្នាំព្យាបាល ជំងឺរលាកបំពង់កពីឱសថស្ថានមួយកាលពីថ្ងៃទី ១៩ ខែមីនា ឆ្នាំ ២០១៨ ។ គាត់ពិតជាស្រឡាំងកាំង ខណៈពេលដោយចៃដន្យគាត់បានឃើញអក្សរតូចៗបោះពុម្ពលើប្រអប់ថ្នាំបញ្ជាក់ថា ក្នុងសមាសធាតុផ្សំ រួមមានទាំងក្រចកដៃមនុស្ស។ បុរសរូបនេះ លែងហ៊ានផឹកព្រោះគិតថា អ្នកផលិតអាចមានការភ័ន្តច្រឡំ ។
ក្រោយមកគាត់បានទៅកាន់ហាងថ្នាំខាងលើ ហើយទាមទារយកលុយវិញ។ នៅទីនេះ បុគ្គលិកលក់ បានបកស្រាយពន្យល់ថា ក្នុងវេជ្ជសាស្ត្របុរាណចិន ក្រចកដៃរបស់មនុស្សក៏ជាវត្ថុធាតុដើមសម្រាប់កែច្នៃឱសថ ហើយមានប្រសិទ្ធភាពព្យាបាលជំងឺល្អណាស់ ។
ប្រអប់ថ្នាំដែលមានបោះពុម្ពបញ្ជាក់ថា មានទុកសមាសធាតុផ្សំពីក្រចកដៃមនុស្ស។
ទាក់ទងនឹងបញ្ហានេះ សាស្ត្រាចារ្យ Jimin នៃសកលវិទ្យាល័យវេជ្ជសាស្ត្របុរាណ ទីក្រុង Chengdu ឲ្យដឹងថា ៖ តាំងពីរជ្ជកាលថាង ក្រចកដៃត្រូវបានចាត់ទុកជាប្រភេទឱសថអាចព្យាបាលជំងឺរលាកបំពង់ក ពងទឹកក្នុងភ្នែក នោមចេញឈាម និងរលាកផ្លូវមូត្រ។ ចំណែកក្នុងវេជ្ជសាស្ត្រទំនើប គេយកក្រចកដៃរបស់យើងដើម្បីកែច្នៃទៅជាឱសថច្រើនប្រភេទសម្រាប់ឃាត់ឈាមបានយ៉ាងមានប្រសិទ្ធភាព។
នៅបណ្តារោងចក្រឱសថ នៅប្រទេសចិន គេកំពុងប្រមូលទិញក្រចកដៃមនុស្សនៅតាមតំបន់ជនបទក្នុងតម្លៃប្រមាណ ១៥០០ដុល្លារ ក្នុង១គីឡូក្រាម ។ គេឲ្យដឹងបន្ថែមទៀតថា ចំពោះមនុស្សធម្មតាម្នាក់ ក្រចកដៃដុះចេញបានប្រវែងប្រហែលពី 2-5 cm ហើយបន្ទះក្រចកនីមួយៗដែលកាត់ចេញ មានទម្ងន់ពី 1-2 g ។ ប្រសិនបើចង់ទទួលបានក្រចកដៃ ១គីឡូក្រាមនោះ គេត្រូវចំណាយពេល១យ៉ាងវែងអន្លាយ។ នេះឯងក៏ជាមូលហេតុនាំឲ្យក្រចកដៃវាថ្លៃយ៉ាងនេះ។
មិនត្រឹមតែក្រចកដៃទេ សូម្បីតែទឹកនោមរបស់ក្មេងប្រុស ក៏ត្រូវបានចាត់ទុកថា ជា “ឱសថទេព” នៅចិនដែរ។ ក្នុងរូបគឺជាស៊ុតប៉ូវដែលគេចំហុយដោយទឹកនោមក្មេងប្រុស។
ក្រុមអ្នកជំនាញការឲ្យដឹងថា ក្រៅពីក្រចកដៃ ក្នុងសរីរាង្គរបស់មនុស្សក៏នៅមានរបស់មួយចំនួនដែលមានតម្លៃសម្រាប់វេជ្ជសាស្ត្របុរាណ ជាអាទិ៍ ទឹកនោមក្មេងប្រុស ទឹកដោះម្តាយ សុក ទឹកមាត់ និងសូម្បីតែឈាមមករដូវរបស់មនុស្សស្រី៕ លីសា
