គេដឹងឈ្មោះសមាជិកម្នាក់គត់ ក្នុងប្រតិភូភាគីកូរ៉េខាងជើង គឺលោក Choe Kang Il ។
រដ្ឋមន្ត្រីការបរទេសហ្វាំងឡង់ Timo Soini ឲ្យដឹងថា ក្រុមអ្នកការទូតកូរ៉េខាងជើង និងអាមេរិក បានដំណើរការកិច្ចពិភាក្សាសម្ងាត់នៅ Helsinki ប៉ុន្តែពុំមានការពិភាក្សាអំពីរឿងរំសាយនុយក្លេអ៊ែរនៅឧបទ្វីបកូរ៉េទេ ។
តាមគេហទំព័រ Helsinki YLE.fi, លោក Timo បានប្រាប់ស្ថានីយ៍ទូរទស្សន៍ MTV ថា បញ្ហារំសាយនុយក្លេអ៊ែរពុំមានស្ថិតក្នុងរបៀបវារៈ នៃជំនួបរវាងបណ្តាប្រតិភូកូរ៉េខាងជើង កូរ៉េខាងត្បូង និងអាមេរិក ដែលប្រព្រឹត្តទៅនៅអគារ Königstedt នៅ Vantaa ជិត Helsinki ។
Choe Kang Il អគ្គនាយករងទទួលបន្ទុកអាមេរិកខាងជើង នៃក្រសួងការបរទេស បានចូលរួមក្នុងបណ្តាកិច្ចពិភាក្សានៅហ្វាំងឡង់ផងដែរ។
តាមការបង្ហើបរបស់លោក Timo មានមនុស្ស ១៨នាក់ ចូលរួមក្នុងអង្គប្រជុំនេះ ក្នុងនោះមានកូរ៉េខាងជើង កូរ៉េខាងត្បូង និងអាមេរិក ដោយប្រតិភូនីមួយៗមានសមាជិក ៦នាក់។
តំណាងកូរ៉េខាងជើងតែមួយគត់ត្រូវបានស្គាល់ឈ្មោះគឺលោក Choe Kang Il ក្នុងពេលដែលប្រតិភូកូរ៉េខាងត្បូង រួមមានបណ្តាអតីតឯកអគ្គរដ្ឋទូត និងបណ្តាទីប្រឹក្សាសន្តិសុខជាតិ។
រដ្ឋាភិបាលអាមេរិក បានចាត់អតីតអគ្គរដ្ឋទូត ៣រូប និងបណ្តាញជំនាញការអំពីអាស៊ីបូព៌ាទៅកាន់ Helsinki រួមមានអ្នកស្រី Kathleen Stephens, អតីតឯកអគ្គរដ្ឋទូតអាមេរិក ប្រចាំសេអ៊ូល ដែលចេះភាសាកូរ៉េយ៉ាងច្បាស់លាស់។
តាមប្រធានាធិបតីហ្វាំងឡង់ Sauli Niinistö តួនាទីរបស់ហ្វាំងឡង់ ស្ថិតក្នុងកម្រិតរៀបចំការប្រព្រឹត្តទៅនៃព្រឹត្តិការណ៍នេះ៕ សូយន
