ប្រភពពីទីភ្នាក់ងារព័ត៌មាន Yonhap កាលពីថ្ងៃទី ២២ មីនា ឲ្យដឹងថា រដ្ឋាភិបាលកូរ៉េខាងត្បូង បានស្នើជាផ្លូវការទៅកាន់កូរ៉េខាងជើង ដើម្បីរួមគ្នារៀបចំកិច្ចចរចាថ្នាក់មន្ត្រីជាន់ខ្ពស់រវាងកូរ៉េទាំងពីនៅថ្ងៃ ២៩ មីនា នាអគារឯកភាពនៅភូមិផ្អាកសង្គ្រាម Panmunjom ដើម្បីពិភាក្សាការងាររៀបចំជំនួបកំពូលអន្តរកូរ៉េនៅអំឡុងចុងខែមេសាក្រោយនេះ។
ពលទាហានកូរ៉េខាងជើងកំពុងឈរយាមនៅតំបន់
ក្រសួងឯកភាពកូរ៉េខាងត្បូងឲ្យដឹងថា ៖ “ឆ្លងតាមខ្សែរយៈទាក់ទងនៅភូមិផ្អាកសង្គ្រាម Panmunjom នៅព្រឹកថ្ងៃ ២២ មីនា រដ្ឋាភិបាលកូរ៉េខាងត្បូងបានស្នើសុំកូរ៉េខាងជើងរៀបចំកិច្ចចរចាថ្នាក់មន្ត្រីជាន់ខ្ពស់រវាងភាគីទាំង២ នៅថ្ងៃទី ២៩ មីនា ដើម្បីបម្រុងសម្រាប់កិច្ចប្រជុំកំពូលត្បូង-ជើង ឆ្នាំ ២០១៨”។
ក្រសួងនេះក៏នៅបានឲ្យដឹងបន្ថែមថា សមាសភាពប្រតិភូកូរ៉េខាត្បូងរួមមាន ៣រូប ដឹកនាំដោយរដ្ឋមន្ត្រីក្រសួងឯកភាព Cho Myong-kyun ។ ក្រសួងដដែលឲ្យដឹងបន្ថែមថា ៖ “រដ្ឋាភិបាលកូរ៉េខាងត្បូងលើកឡើងនូវផែនការបំណងត្រៀមបម្រុងឲ្យបានម៉ត់ចត់នូវលក្ខណៈចាំបាច់ ក៏ដូចជាខ្លឹមសារពិភាក្សាផ្សេងទៀតជាមួយកូរ៉េខាងជើង បំណងធ្វើយ៉ាងណាឲ្យជំនួបកំពូលអន្តរកូរ៉េទទួលបានជោគជ័យ។
វិមានប្រធានាធិបតីកូរ៉េខាងត្បូងមុននេះ១ថ្ងៃ ក៏បានឲ្យដឹងថា សមាសភាពភាគីកូរ៉េខាងត្បូង ៣ រូប រួមមាន រដ្ឋមន្ត្រីក្រសួងឯកភាព Cho Myong-kyun មន្ត្រីម្នាក់មកពីវិមានប្រធានាធិបតី និងស្ថាប័នចារកម្មជាតិ៕ សូយន