ភ្នំពេញ ៖ និស្សិតជំនាញសំណង់ស៊ីវិល សិក្សាស្វែងយល់ពីស្ថាបត្យកម្មអគារវិមានរដ្ឋសភានិស្សិតជំនាញសំណង់ស៊ីវិល និងស្ថាបត្យកម្មនៃសាលាពហុបច្ចេកទេសលីហ្គីស Lea Gis ចំនួន១០០នាក់ បានមកធ្វើទស្សនកិច្ចសិក្សាស្វែងយល់ពីសំណង់ស្ថាបត្យកម្មអគារវិមានរដ្ឋសភា នៅរសៀលថ្ងៃទី២២ ខែមីនា ឆ្នាំ២០១៨ ។ លោក ប៊ូយ សុធន នាយករងសាលាពហុបច្ចេកទេស លីហ្គីស Lea Gis បានមានប្រសាសន៍ថា ដំណើរទស្សនកិច្ចសិក្សានេះ ជាផ្នែកសំខាន់មួយក្នុងការផ្តល់ចំណេះដឹង ដល់និស្សិតដែលកំពុងសិក្សា ទាំងខាងជំនាញសំណង់ស៊ីវិល និងចំណេះដឹងទូទៅអំពីតួនាទីភារៈកិច្ចរបស់រដ្ឋសភា។
ដំណើរទស្សនកិច្ចរបស់និស្សិតជំនាញសំណង់ស៊ីវិល នាពេលនេះ បានទទួលស្វាគមន៍ដោយ លោក ឡេង ប៉េងឡុង អគ្គលេខាធិការរដ្ឋសភា និងមន្ត្រីជំនាញក្រោមឱវាទ។ លោក អគ្គលេខាធិការ បានបង្ហាញដល់និស្សិតពីសំណង់សំខាន់ៗ ក្នុងវិមានរដ្ឋសភា ថា វិមានរដ្ឋសភា មានអគារជាច្រើន ដែលបានចែងជាការិយាល័យថ្នាក់ដឹកនាំ ការិយាល័យតំណាងរាស្ត្រ សាលប្រជុំពេញអង្គ សាលប្រជុំគណៈកម្មាធិការអចិន្ត្រៃយ៍រដ្ឋសភា បន្ទប់ប្រជុំទូទៅ មានច្រើនបន្ទប់ និងផ្នែករដ្ឋបាលរបស់អគ្គលេខាធិការដ្ឋាន សម្រាប់មន្ត្រីបំពេញការងារប្រចាំថ្ងៃ។
ចំពោះតួនាទីរបស់រដ្ឋសភាវិញ លោក ឡេង ប៉េងឡុង បានលើកឡើងថា រដ្ឋសភាមានតួនាទីសំខាន់ៗចំនួនបី ទី១ តួនាទីនីតិកម្ម គឺការតាក់តែងនិងអនុម័តច្បាប់។ តួនាទីសំខាន់ទី២ គឺឃ្លាំមើលការអនុវត្តច្បាប់របស់រាជរដ្ឋាភិបាល។ ចំណែកតួនាទីទី៣ គឺភាពជាតំណាងរបស់ពលរដ្ឋ។
លោក ប៊ូយ សុធន បានវាយតម្លៃខ្ពស់ថា ដំណើរទស្សនកិច្ចនេះ មានសារសំខាន់ណាស់ ក្នុងការសិក្សា ស្វែងយល់ពីសំណង់អគារប្រវត្តិសាស្ត្រ និងបានស្តាប់បទបង្ហាញពី តួនាទីនិងភារកិច្ច ស្ថាប័ននីតិប្បញ្ញត្តិ ថែមទៀត។ លោកនាយករងសាលា លីហ្គីស Lea Gis បានគូសបញ្ជាក់ថា វិមានរដ្ឋសភាជាសំណង់ដ៏ល្អមានលក្ខណៈជាខ្មែរ គឺជាស្នាដៃសំណង់ស្ថាបត្យកម្មរបស់កូនខ្មែរ ក្រោមការដឹកនាំរបស់ សម្តេចអគ្គមហាពញាចក្រី ហេង សំរិន ប្រធានរដ្ឋសភា។ វិមានរដ្ឋសភា មានរចនាបទខ្មែរសម័យទំនើបយ៉ាងស្រស់ស្អាត និងមានបច្ចេកទេសសាងសង់ប្រកបដោយគុណភាពខ្ពស់ ស្របតាមភាពរីកចម្រើននៃសម័យសកលភាវូបនីយកម្ម៕ ដោយ ៖ បញ្ញាស័ក្តិ
