ខេត្តកំពង់ស្ពឺ ៖ ព្រានព្រៃ ដែលបានបាញ់សម្លាប់សត្វទន្សោង មួយក្បាលនៅក្នុងព្រៃសហគមប្រាំបីមុំ ស្រុកថ្ពង ខេត្តកំពង់ស្ពឺ ត្រូវបានកម្លាំងសមត្ថកិច្ចអភិរក្សសត្វព្រៃសហការជាមួយកងរាជអាវុធហត្ថស្រុកថ្ពងធ្វើការចាប់ខ្លួនបាននៅថ្ងៃទី២៣ ខែមីនា ឆ្នាំ២០១៨។
លោកវរសេនីយ៍ទោ ឆន ជា អធិការរងនគរបាលស្រុកថ្ពង បានប្រាប់ឲ្យដឹង ថា ករណីក្រុមព្រានព្រៃបាញ់សម្លាប់សត្វទន្សោងមួយក្បាល ត្រូវបានកម្លាំងខាងអភិរក្សសត្វព្រៃ និងកងរាជអាវុធហត្ថបង្ក្រាបបានភ្លាមៗ ក្រោយពេលបាញ់សម្លាប់ជនល្មើសម្នាក់ក្នុង ចំណោមបក្ខពួកត្រូវបានឃាត់ខ្លួនជាមួយនឹងរថយន្តម៉ាតូយូតាវីហ្គោមួយគ្រឿងផងដែរ ។ ជនល្មើសមានឈ្មោះ សូ ស៊ីណា ភេទប្រុស អាយុ៣៨ឆ្នាំ មានទីលំនៅភូមីអង្គ្រង ឃុំស្វាយទាប ខេត្តស្វាយរៀង និង ដកហូតបានវត្ថុតាងសាច់សត្វទន្សោងទម្ងន់ ១២០គីឡូក្រោម និងរថយន្តមួយគ្រឿងម៉ាកតូយូតា វីហ្គោរ ពណ៌ទឹកមាស ពាក់ស្លាកលេខ ភ្នំពេញ 2M-7435។
សូមបញ្ជាក់ថា ករណីព្រានព្រៃបាញ់សម្លាប់សត្វព្រៃដ៏កម្រ និងជិតផុតពូជនេះបានកើតមានឡើងនៅក្នុងព្រៃសហគមប្រាំបីមុំ ឃុំប្រាំមុំ ស្រុកថ្ពង ខេត្តកំពង់ស្ពឺ កាលពីយប់ថ្ងៃទី២២ ខែមីនា ឆ្នាំ២០១៨ ។
មន្ត្រីជំនាញកំពុងសាកសួរ ដើម្បីកសាងសំណុំរឿងបញ្ជូនជនល្មើសទៅកាន់សាលាដំបូងខេត្តកំពង់ស្ពឺ ដើម្បីផ្តន្ទាទោសតាមផ្លូវច្បាប់៕ ដោយ ៖ បញ្ញាស័ក្តិ