ស្ថានីយ៍ទូរសទស្សន៍ និងវិទ្យុកូរ៉េខាងត្បូងនៅថ្ងៃម្សិលមិញនេះ (២៣ មីនា) ឲ្យដឹងថា ឆាកនយោបាយប្រទេសនេះ ផ្ទុះឡើងនូវប្រតិកម្មជាច្រើនផ្សេងៗគ្នា ជុំវិញការដែលអតីតប្រធានាធិបតីកូរ៉េខាងត្បូង Lee Myung-bak ត្រូវបានចាប់ខ្លួនកាលពីយប់ថ្ងៃទី ២២ មីនា ។
អតីតប្រធានាធិបតីកូរ៉េខាងត្បូង Lee Myung-bak
គណបក្សប្រជាធិបតេយ្យកាន់អំណាចអះអាងថា គេគោរពសេចក្តីសម្រេចចិត្តរបស់តុលាការ ព្រមជាមួយនោះក៏សង្ឃឹមថា អគ្គរដ្ឋអាជ្ញា បន្តប្រឹងប្រែងឆ្លុះបញ្ចាំងនូវការមន្ទិលសង្ស័យទាំងឡាយទាក់ទងដល់អតីតប្រធានាធិបតី Lee ។
ផ្ទុយទៅវិញ គណបក្សសេរីភាពដែលជាបក្សប្រឆាំងចាត់ទុកថា នេះគឺជាទង្វើឃោរឃៅ ហើយជារឿងមួយគួរឲ្យព្រួយបារម្ភ ព្រមជាមួយនោះបានសម្តែងនូវក្តីសង្ឃឹមថា នឹងពុំកើតមានរបៀបសងសឹកនយោបាយបែបនេះ នាថ្ងៃអនាគតទៀត។ ក្រៅពីគណបក្សសេរីភាព គណបក្សនយោបាយដទៃទៀតចាត់ទុកថា ការត្រូវឃាត់ខ្លួនអតីតប្រធានាធិបតី Lee វាជារឿងធម្មតាមួយ ។
គណបក្សអនាគតសច្ចៈធម៌ សង្ឃឹមថា អគ្គរដ្ឋអាជ្ញា និងតុលាការ នឹងបង្កើនល្បឿនស៊ើបអង្កេតបញ្ជាក់ច្បាស់លាស់ពីទោសកំហុសរបស់អតីតប្រធានាធិបតី Lee ខណៈពេលដែលគណបក្សប្រជាធិបតេយ្យ និងសន្តិភាពសង្កត់ធ្ងន់ថា អគ្គរដ្ឋអាជ្ញាចាំបាច់ត្រូវបើកទូលាយក្របខណ្ឌស៊ើបអង្កេតទាក់ទិនដល់រាល់មន្ទិលសង្ស័យទាក់ទិនដល់លោក Lee ។ គណបក្សយុត្តិធម៌ថ្លែងថា បញ្ហាដែលនៅសល់គឺការវិនិច្ឆ័យទោសយ៉ាងតឹងរឹងដោយផ្អែកលើច្បាប់។
ក្នុងពេលជាមួយគ្នានោះ អ្នកនាំពាក្យវិមានប្រធានាធិបតីកូរ៉េខាងត្បូង Kim Eui-kyum ពុំបានបង្ហាញគោលជំហរលើបញ្ហានេះទេ។
គួររំលឹកឡើងវិញថា នៅថ្ងៃ ២២ មីនា តុលាការសង្កាត់កណ្តាលសេអ៊ូល បានចេញដីការឃុំខ្លួនអតីតប្រធានាធិបតី Lee Myung-bak ព្រោះមានកង្វល់ថា គាត់អាចបំផ្លាញភស្តុតាងដែលទាក់ទង។ អតីតប្រធានាធិតី Lee ត្រូវបានចាប់បញ្ជូនទៅកាន់មជ្ឈមណ្ឌលឃុំខ្លួនប៉ែកខាងកើតក្រុងសេអ៊ូល៕ ចន្ទ្រា
