ក្រចេះ ៖ បុរសដៃដល់ម្នាក់ ដែលបានយកពូថៅ មកកាប់លើជនរងគ្រោះ បណ្តាលឲ្យមុតរយៈរងរបួសធ្ងន់ធ្ងរនោះ ត្រូវបានកម្លាំងនគរបាលស្រុកស្នួល ចាប់ខ្លួន បន្ទាប់ពីជននេះ បានប្រើហឹង្សាមកលើជនរងគ្រោះ យ៉ាងចាស់ដៃ កាលពីយប់ថ្ងៃទី២២ ខែមីនា នៅនឹងមុខផ្ទះជនដៃដល់ ក្នុងភូមិចឹង ឃុំឃ្សឹម ស្រុកស្នួល។
ក្រោយការចាប់ខ្លួនជនល្មើសដៃដល់ឈ្មោះ ធី សុផល អាយុ២៩ឆ្នាំ បានឆ្លើយថា មូលហេតុដែលរូបគេបានកាប់លើជនរងគ្រោះ ដោយសារតែរូបគេមានគំនិតប្រច័ណ្ឌនឹងជនរងគ្រោះមកលើប្រពន្ធរបស់ខ្លួន។ ករណីហឹង្សាដោយសារ ភ្លើងប្រច័ណ្ឌ បណ្ដាលឲ្យមនុស្សម្នាក់ដេកពេទ្យ និងម្នាក់ទៀតដេកគុក។
យោងតាមរបាយការណ៍នគរបាលស្រុកស្នួល បានឲ្យដឹងថា ករណីហឹង្សាដោយចេតនានេះ បង្កដោយជនសង្ស័យ បានធ្វើសកម្មភាព យកពូថៅកាប់ទៅលើជនរងគ្រោះ ឈ្មោះ សាន់ សារឿន ភេទប្រុស អាយុ៥០ឆ្នាំ រស់នៅភូមិជាមួយគ្នា កំពុងអង្គុយលេងក្នុងផ្ទះ។ ជនរងគ្រោះ ត្រូវបានជនដៃដល់ កាប់ចំនួន ២ពូថៅ បណ្ដាលឲ្យរងរបួសធ្ងន់គឺត្រូវរយះចំស្មា និងថ្ពាល់ ហើយត្រូវបានក្រុមគ្រួសារ បញ្ជូនទៅសង្គ្រោះព្យាបាលនៅមណ្ឌលសុខភាព ឃុំឃ្សឹម ស្រុកស្នួល។
ក្រោយពីកើតហេតុ កម្លាំងជំនាញអធិការដ្ឋាននគរបាលស្រុកស្នួល សហការជាមួយ កម្លាំងប៉ុស្ដិ៍រដ្ឋបាល និងប្រជាការពារភូមិ បានឃាត់ខ្លួនជនសង្ស័យមកសួរនាំនៅអធិការដ្ឋានស្រុក ។
ក្រោមការសួរចម្លើយពីកម្លាំងជំនាញ ជនសង្ស័យ បានសារភាពថា ខ្លួនបានផឹកស្រាស អស់ជាច្រើនលីត្រស្រវឹងក៏មានចិត្តខឹងជាមួយជនរងគ្រោះជាខ្លាំង បានយកពូថៅទៅកាប់ជនរងគ្រោះតែម្តង បណ្ដាលឲ្យដួលទៅនឹងដី ឃើញដូច្នេះខ្លួនក៏ព្យាយាមរត់ចេញពីកន្លែងកើតហេតុ ។
បច្ចុប្បន្ន ជនសង្ស័យ ត្រូវបានឃាត់ខ្លួនបណ្ដោះអាសន្ន នៅអធិការដ្ឋាននគរបាលស្រុកស្នួល ដើម្បីកសាងសំណុំរឿង បញ្ជូនទៅការិយាល័យជំនាញខេត្ត ដើម្បីបំពេញនីតិវិធីបន្ដ៕ ដោយ ៖ បញ្ញាស័ក្តិ
