ព្រំដែនកម្ពុជា -ថៃ ៖ សាធារណជនចង់អោយមានការសម្អាតបរិស្ថានរួមគ្នានាស្ពានមិត្តនិងក្រោមស្ពានរថភ្លើងនៅច្រកទ្វារអន្តរជាតិប៉ោយប៉ែត-ខ្លងលឹក ជាប្រចាំ។
សាធារណជនស្នើដូច្នេះ បន្ទាប់ពីអាជ្ញាធរដែនដី សមត្ថកិច្ច កងកម្លាំងនិងមហាជននៃក្រុងប៉ោយប៉ែត ខេត្តបន្ទាយមានជ័យ ប្រទេសកម្ពុជានិងស្រុកអារញ្ញប្រាថេត ខេត្តស្រះកែវ ប្រទេសថៃ បានបើកយុទ្ធនាការសម្អាតបរិស្ថាន អនាម័យរួមគ្នានាស្ពានមិត្តនិងក្រោមស្ពានរថភ្លើងនៅច្រកទ្វារអន្តរជាតិប៉ោយប៉ែត-ខ្លងលឹក កាលពីថ្ងៃទី២៣ខែ មីនា ឆ្នាំ ២០១៨ ម្ដិលមិញ។
សកម្មភាព រួមគ្នានេះ ដឹកនាំដោយលោក ផនផុត ផេនផាត អភិបាលខេត្តស្រះកែវ, លោកអោម ចន្ថា អភិបាលរងខេត្តបន្ទាយមានជ័យ និងចូលរួមពីលោក សាន ស៊ានហូ អភិបាលក្រុងប៉ោយប៉ែត លោក សៅយ៉ានីត ស៊ុរិយៈគុណ ណៈអយុទ្ធិយ៉ា អភិបាលស្រុកអារញ្ញប្រាថេត ព្រមទាំងមានការចូលរួមពីមន្ត្រីរាជការសុីវិល សមត្ថកិច្ចជំនាញសុីវិល កងកម្លាំង លោកគ្រូអ្នកគ្រូ សិស្សានុសិស្ស បុគ្គលិកក្រុមហ៊ុន បុគ្គលិកអង្គការកម្ពុជានៃក្តីសង្ឃឹមចាងភាគីកម្ពុជាមានជិត៤០០នាក់ និងភាគីថៃមានជិត១០០នាក់។
លោកសាន ស៊ានហូ អភិបាលក្រុងប៉ោយប៉ែតបាននិយាយថា: ក្រុងប៉ោយប៉ែតនាឆ្នាំ២០១៨នេះ ការប្រលងប្រណាំងទីក្រុងស្អាត ទទួលបានផ្កាលរំដួល២ទង មានន័យថាបានល្អជាងឆ្នាំមុនៗដែលបានតែរំដួលតែ១ទង ។នោះអាចបញ្ជាក់ថា ការងារសណ្តាប់ធ្នាប់ របៀបរៀបរយ បរិស្ថាន អនាម័យដែលក្រុងប៉ោយប៉ែតជាប់ទីក្រុងស្អាតនោះ គឺជាការខិតខំប្រឹងប្រែងធ្វើការស្តារនិងអភិវឌ្ឍន៍លើការងារនេះ ក៏ដូចជាការងារសេដ្ឋកិច្ច សង្គមកិច្ច ។
ចំណែកលោក សៅយ៉ានីត ស៊ុរិយៈគុណ ណៈអយុទ្ធិយ៉ា អភិបាលស្រុកអារញ្ញប្រាថេត និយាយថា: បំណងនៃសកម្មភាពរួមគ្នានេះ ក្នុងបំណងពង្រឹងពង្រីកទំនាក់ទំនង កិច្ចសហប្រតិបត្តិការ មេត្រីភាព សាមគ្គីភាព លើការលើកកម្ពស់អនាម័យ បរិស្ថាន សណ្តាប់ធ្នាប់រួមតាមបណ្តោយព្រំដែន ច្រកព្រំដែនដើម្បីថែរក្សាការពារសុខុមាលភាព គុណតម្លៃជីវិតរបស់ពលរដ្ឋនៃស្រុក ខេត្តនិងប្រទេសទាំង២ ក៏ដូចភ្ញៀវទេសចរជាតិ អន្តរជាតិ។
ភាគីទាំង២ បរិស្ថាន អនាម័យគឺជាបញ្ហាចម្បងចំពោះសុខភាពប្រជាពលរដ្ឋ សោភ័ណភាពក្រុង ជាពិសេសនៅមាត់ច្រកទ្វារព្រំដែនអន្តរជាតិនេះ ក៏ជាមុខមាត់ កិត្តិយសស្រុក ខេត្តនិងប្រទេសទាំង២ អោយបានល្អ ស្អាតប្រសើរឡើងវិញកុំអោយដូចកន្លងមកនិងបច្ចប្បន្ន។
ព្រោះដូចដែលយើងឃើញហើយ អូរជ្រៅជាអូរព្រដែននេះ ក៏ដូចជានៅក្រោមស្ពាននៃផ្លូវរថយន្តឬស្ពានមិត្តភាពកម្ពុជា ថៃនិងស្ពាននៃផ្លូវដែកនៃច្រកព្រំដែនអន្តរជាតិប៉ោយប៉ែត-ខ្លងលឹ រងការបំពុលបរិស្ថានយ៉ាងធ្ងន់ធ្ងរទាំងសំណល់រឹង សំណល់រាវនិងសំណល់ខ្យល់ពុលពីភាគីទាំង២ ដូចជាផ្សាររោងក្លឿ សំណង់ផ្ទះ អគារ.និងមនុស្ស.នៃភាគីថៃនិង ដូចជា ប្លុកកាស៊ីណូនានា សំណង់ ផ្ទះនិងមនុស្សនៃភាគីកម្ពជា។
ពោលគឺបើលោកអ្នកបានឆ្លងកាត់ឆ្លងនេះ លោកអ្នកនឹងបានឃើញកាកសំណល់សម្រាម ទឹកកខ្វក់ ក្លិនស្អុយ ឆ្អេះឆ្អាប គួរអោយខ្ពើបរអើមនិងព្រួបារម្ភយ៉ាងខ្លាំង ហើយក៏គួរអោយខ្មាសអៀនផងដែរ ។
ហេតុដូច្នេះ ភាគីទាំង២ បានអំពាវនាវនិងសំណូមពរដល់ប្រជាពលរដ្ឋ អាជីវករនិងអ្នកពាក់ព័ន្ធទាំងឡាយសូមតាំងចិត្តនិងចូលរួមពេញបន្ទុកលើការគ្រប់គ្រង វេចខ្ចប់ទុកដាក់សម្រាមក្នុងធុងសម្រាមអោយបានស្អាតជាប្រចៃ ដើម្បីងាយស្រួលក្រុមហ៊ុននិងអាជ្ញាធរ សមត្ថកិច្ចចុះទៅប្រមូល និងកើបប្រមូលយកចេញទៅទីលានចាក់សម្រាម ។ហើយក៏ សូមកុំបញ្ចេញចោលនូវកាកសំណល់រាវដែលកខ្វក់ ដែលមិនឆ្លងកាត់ការធ្វើចម្រោះ។
ព្រោះថា អូរព្រំដែននេះ ក៏ជាផ្នែកខាងលើជាប្រភពបង្ហូរទឹកចូលស្ទឹងសិរីសោភ័ណដែលស្ថិតក្នុងខ្សែទឹកខាងក្រោម។ ហេតុនេះ បើទឹកនេះ ហូរទៅផ្នែកខាងក្រោម វានឹងបំពុលទឹក ហើយបង្កប៉ះពាល់សុខភាព អាយុជីវិតបងប្អូនប្រជាពលរដ្ឋកម្ពុជារាប់មឺុនសែននាក់ដែលយកទឹកស្ទឹងទៅបរិភោគនិងប្រើប្រាស ៕ ដោយ ៖ បន្ទាយ