ប៉ូលិសដ៏អង់អាចក្លាហានបារាំងម្នាក់បានប្រគល់ខ្លួនឲ្យខ្មាន់កាំភ្លើង ដើម្បីធ្វើការដោះដូរចំណាប់ខ្មាំងដែលត្រូវខ្មាន់កាំភ្លើងចាប់នៅក្នុងផ្សារទំនើប ស្ថិតក្នុងតំបន់ Trèbes ភាគខាងត្បូងប្រទេសបារាំង។
ហេតុការណ៍នោះកើតឡើង នៅពេលខ្មាំកាំភ្លើងម្នាក់ បានសម្លាប់មនុស្សចំនួន ៣នាក់ និងធ្វើឲ្យ ១៦នាក់ទៀតរងរបួស នៅពេលគេបានលួចឡានមួយគ្រឿង និងបាញ់ប៉ូលិស ព្រមទាំងចាប់មនុស្សធ្វើជាចំណាប់ខ្មាំង។ អាជ្ញាធរបារាំងមើលឃើញការវាយប្រហារនោះជាអំពោះភេរវកម្ម។
រដ្ឋមន្ត្រីក្រសួងមហាផ្ទៃបារាំង លោក Gérard Collomb បាននិយាយថា មន្ត្រីប៉ូលិសម្នាក់ បានប្រគល់ខ្លួន ដើម្បីជាការដោះដូរជាមួយនឹងចំណាប់ខ្មាំងស្ត្រីម្នាក់ ដែលត្រូវខ្មាន់កាំភ្លើងចាប់ក្នុងផ្សារទំនើប។
នៅពេលប៉ូលិសចូលទៅក្នុងផ្សារទំនើប គេបានឮសម្លេងបាញ់ប្រហារគ្នា។ ប៉ូលិសរូបនោះបានបើកទូរស័ព្ទរបស់គាត់ ដូច្នេះប៉ូលិសដទៃអាចឮសម្លេងពីការទំនាក់ទំនងរបស់គាត់ជាមួយនឹងខ្មាន់កាំភ្លើង។ ក្រោយពេលឮស្នូរកាំភ្លើង ប៉ូលិសជាច្រើនបានចូលទៅ។
ខ្មាន់កាំភ្លើងត្រូវបានបាញ់សម្លាប់ ហើយមន្ត្រីប៉ូលិសដ៏ក្លាហាននោះ ដែលត្រូវគេស្គាល់ឈ្មោះថា Arnaud Beltrame ទទួលរងរបួសយ៉ាងធ្ងន់ធ្ងរ។
ក្រសួងមហាផ្ទៃបារាំងបានកំណត់អត្តសញ្ញាណរបស់ខ្មាន់កាំភ្លើង Redouane Lakdim អាយុ ២៦ឆ្នាំ។
ការវាយប្រហារនោះត្រូវបានក្រុមរដ្ឋអ៊ីស្លាម ISIS ថាជាទំនួលខុសត្រូវរបស់ខ្លួន។ ចំណែកប្រធានាធិបតីបារាំង លោក Emmanuel Macron ការអះអាងរបស់ក្រុម ISIS កំពុងតែត្រូវបានវិភាគ៕ សុភ័ក្ត្រ