ខេត្តព្រះសីហនុ ៖ ប្រតិបត្តិករបំរើសេវាកម្មទេសចរណ៍ ពិសេសភ្ញៀវទេសចរជាតិ-អន្តរជាតិ ដែលចូលទៅទស្សនានៅតាមឆ្នេរនានា នៃសង្កាត់កោះរ៉ុងក្រុង-ខេត្តព្រះសីហនុ បានរិះគន់ថា បរិស្ថានឆ្នេរសុខសាន្ត អាចត្រូវបំផ្លាញ ព្រោះរាល់ថ្ងៃនេះ មានសំណង់បឹងហ្គាឡូ និងផ្ទះសំណាក់មួយចំនួន ត្រូវបានគេសាងសង់នៅលើឆ្នេរខ្សាច់ និងបង្ហូរទឹកស្អុយចូលទឹកសមុទ្រ ដោយមិនឆ្លងកាត់អាងចម្រោះទឹក ស្អាតជាមុននោះទេ។
ភ្ញៀវទេសចរជាតិ-អន្តរជាតិភាគច្រើន ដែលចូលទៅដល់ឆ្នេរសុខសាន្ត បានបង្ហាញការព្រួយបារម្ភខ្លាចបរិស្ថានអនាម័យតាមឆ្នេរខ្សាច់ នៃឆ្នេរសុខសាន្ត ស្ថិតនៅលើសង្កាត់កោះរ៉ុង ត្រូវបំផ្លាញ ដោយសារការបង្ហូរកាកសំណល់ ឬទឹកស្អុយចូលសមុទ្រ ព្រោះរាល់ថ្ងៃនេះសង្កេតឃើញថា មានបុគ្គល ឬប្រជាពលរដ្ឋខ្លះបានសង់សំណង់រឹងមាំដូចជាផ្ទះសំណាក់ ឬបឹងហ្គាឡូ នៅលើឆ្នេរខ្សាច់ និងបង្ហូរទឹកស្អុយចូលសមុទ្រអនាធិបតេយ្យ។
ភ្ញៀវទេសចរ បានឲ្យដឹងថា សំណង់បឹងហ្គាឡូ ឬផ្ទះសំណាក់ មួយចំនួន នៅភូមិសុខសាន្ត នៅបន្តបើកធ្វើអាជីវកម្ម នៅលើឆ្នេរខ្សាច់សក្បុស និងបានបង្ហូរទឹកស្អុយចូលទឹកសមុទ្រ នៅតាមឆ្នេរសុខសាន្ត ដោយមិនបានឆ្លងកាត់អាងចម្រោះទឹកស្អាតឲ្យបានត្រឹមត្រូវនោះទេ។
ប្រតិបត្តិករ និងភ្ញៀវទេសចរទាំងនោះ បានសំណូមពរដល់រដ្ឋបាលក្រុង-ខេត្តព្រះសីហនុ ពិសេសថ្នាក់ដឹកនាំគណៈកម្មាធិការជាតិគ្រប់គ្រង និងអភិវឌ្ឍន៍តំបន់ឆ្នេរសមុទ្រកម្ពុជា ជួយមានវិធានការចុះរុះរើសំណង់រឹងមាំដែលសង់នៅលើឆ្នេរខ្សាច់ នៃឆ្នេរសុខសាន្ត ហើយទប់ស្កាត់ការបង្ហូរទឹកស្អុយចូលសមុទ្រ ដើម្បីជួយសង្គ្រោះឆ្នេរនេះឲ្យបានទាន់ពេល។
បុគ្គលិកក្រុមហ៊ុនទេសរណ៍មួយចំនួន ឲ្យដឹងថា សោភណ្ឌភាពនៅតាមឆ្នេរសមុទ្រ ពិសេសឆ្នេរនៅតាមបណ្តាកោះនានា មានកោះរ៉ុង និងកោះរ៉ុងសន្លឹមជាដើមថា ពិតជាទទួលបានការគាំទ្រច្រើនពីភ្ញៀវទេសចរ ពិសេសភ្ញៀវអន្តរជាតិ ដែលចូលមកទស្សនាខេត្តនេះនាពេលកន្លងមក។ ទន្ទឹមគ្នានេះ ភ្ញៀវទេសចរមួយចំនួន ក៏បានរិះគន់ទៅលើអនាម័យបរិស្ថានឆ្នេរខ្សាច់ ឬឆ្នេរសមុទ្រមួយចំនួននៅលើកោះរ៉ុង ត្រូវគេបំផ្លាញ ដោយសារប្រជាពលរដ្ឋ ឬអាជីវករមួយចំនួនប្រកបរបរនៅតាមឆ្នេរមួយចំនួនមានឆ្នេរកោះតូច និងឆ្នេរសុខ សាន្តជាដើម។ ភ្ញៀវទេសចរចោទថា មានអាជីវករមួយចំនួនកំពុងប្រកបរបរនៅតាមឆ្នេរកោះតូច និងឆ្នេរសុខសាន្ត គឺ មិនទាន់បានចូលរួមថែរក្សាអនាម័យជាមួយអាជ្ញាធរនោះទេ ដោយបានសង់សំណង់រឹងមាំនៅលើឆ្នេរខ្សាច់ និងបង្ហូរទឹកស្អុយចូលសមុទ្រជាដើម។
ជាងនេះទៀត ក៏មានអាជីវករខ្លះ បាននាំយកតុកៅអី និងសម្ភារៈផ្សេងៗទៀត មកដាក់ប្រកបអាជីវកម្មនៅលើឆ្នេរខ្សាច់តែម្តង ដែលជាហេតុនាំឲ្យឆ្នេរសមុទ្រខេត្តព្រះសីហនុមួយចំនួន ត្រូវបំផ្លាញបរិស្ថាន និងប៉ះពាល់ដល់សោភណ្ឌភាពឆ្នេររួមមាន៖ ឆ្នេរកោះតូច និងឆ្នេរសុខសាន្ត នៃសង្កាត់កោះរ៉ុងជាដើមភ្ញៀវទេសចរមួយចំនួន ដែលបានចូលមកទស្សនាខេត្តព្រះសីហនុ នៅថ្ងៃទី២៤ ខែមីនា ឆ្នាំ២០១៨នេះ បានបង្ហាញការព្រួយបារម្ភខ្លាចបរិស្ថានឆ្នេរមួយចំនួននៅលើកោះរ៉ុង មានឆ្នេរកោះតូច និងឆ្នេរសុខសាន្តជាដើម ត្រូវបំផ្លាញ ហើយភ្ញៀវទេសចរជាតិ-អន្តរជាតិ អាចលែងចាប់អារម្មណ៍ចូលមកទស្សនាខេត្តព្រះសីហនុនាថ្ងៃខាងមុខ បើអាជ្ញាធរពាក់ព័ន្ធខេត្តព្រះសីហនុ មិនមានវិធានការរុះរើសំណង់រឹងមាំ ដែលសង់នៅលើឆ្នេរខ្សាច់ និងក្នុងទឹកសមុទ្រ ដើម្បីការពារបរិស្ថានឆ្នេរទាំងនោះចោល ឲ្យបានឆាប់ទេ។
ចំណែកអ្នកឃ្លាំមើលផែនការអភិវឌ្ឍសង្គមមួយចំនួន ប្រចាំខេត្តព្រះសីហនុ ក៏ព្រួយបារម្ភខ្លាចឆ្នេរមួយចំនួននៅលើកោះរ៉ុង ត្រូវបំផ្លាញ ដោយសំណង់រឹងមាំ និងការលួចបង្ហូរទឹកស្អុយចូលសមុទ្រ ដោយមិនឆ្លងកាត់អាងចម្រោះទឹកស្អាតជាមុននេះដែរ។
អ្នកឃ្លាំមើលសង្គមសង្កេតថា នៅតាមតំបន់ឆ្នេរមួយចំនួននាខេត្តព្រះសីហនុ រួមមាន៖ ឆ្នេរអូរឈើទាល ឆ្នេរអូរត្រេះ និងឆ្នេរនៅលើដីកោះ មានឆ្នេរកោះតូច និងឆ្នេរសុខសាន្តជាដើម ឃើញមានអាជីវករខ្លះ បាននាំយកតុ កៅអី ទៅដាក់បម្រើភ្ញៀវនៅលើឆ្នេរខ្សាច់ ដើម្បីលក់ដូរចំណីអាហារផ្សេងៗគ្មានសណ្ដាប់ធ្នាប់នោះទេ។ ជាងនេះទៀត ក៏ឃើញមានអាជីវករខ្លះបានសង់សំណង់រឹងមាំនៅលើឆ្នេរខ្សាច់ ហើយបានបង្ហូរទឹកស្អុយចូលទៅក្នុងសមុទ្រ ដោយគ្មានរបៀបរៀបរយ។
ផ្តើមពីបញ្ហានេះ ក្រុមអ្នកឃ្លាំមើលសង្គម ដែលស្រលាញ់បរិស្ថាន បានបង្ហាញការព្រួយបារម្ភចំពោះការបំពុលបរិស្ថាននៅតាមឆ្នេរមួយចំនួន នាខេត្តព្រះសីហនុ និងស្នើដល់អាជីវករ ឬប្រជាពលរដ្ឋរស់នៅតាមឆ្នេរសមុទ្រទាំងអស់ ត្រូវរួមសហការគ្នាថែរក្សាបរិស្ថានឆ្នេរខ្សាច់ឲ្យមានអនាម័យទាំងអស់គ្នា ជាមួយរដ្ឋបាលខេត្តព្រះសីហនុ។
បញ្ហានេះដែរ លោក យន្ត មីន អភិបាលខេត្តព្រះសីហនុ កន្លងមកបានបំផុសដល់មន្ត្រីនៅតាមស្ថាប័នពាក់ព័ន្ធក្រោមឱវាទខេត្ត ភ្ញៀវទេសចរ ប្រជាពលរដ្ឋ និងអាជីវករបម្រើសេវាទេសចរណ៍ នៅតាមតំបន់ឆ្នេរទាំងអស់ ត្រូវចូលរួមសហការគ្នាថែរក្សាអនាម័យបរិស្ថានឆ្នេរ ឲ្យបានជាប្រចាំ ទាំងនៅទីសាធារណៈ ឆ្នេរនៅលើដីគោក និងឆ្នេរនៅលើដីកោះជដើម។
ចំណែកសំណង់សង់នៅលើឆ្នេរសមុទ្រ ឬក្នុងទឹកសមុទ្រ លោក យន្ត មីន ក៏ធ្លាប់បានបញ្ជាក់ថា សំណង់រឹងមាំគ្រប់ប្រភេទ អាជ្ញាធរនឹងមិនអនុញ្ញាតឲ្យមានសង់ថ្មីទៀតទេ ប៉ុន្តែសម្រាប់សំណង់ដែលត្រូវប្រជាពលរដ្ឋសាងសង់រួចកន្លងមក ត្រូវរក្សាឲ្យនៅសភាពធម្មតាសិន ដោយរង់ចាំដោះស្រាយនៅពេលក្រោយទៀត។
យ៉ាងណាក៏ដោយចុះ លោក យន្ត មីន ឲ្យដឹងថា រាល់ថ្ងៃនេះទាំងមន្ត្រីថ្នាក់ដឹកនាំ នៅតាមស្ថាប័នរដ្ឋនានា នៃរដ្ឋបាលខេត្តព្រះសីហនុ ពិសេសថ្នាក់ដឹកនាំគណៈកម្មាធិការជាតិអភិវឌ្ឍន៍តំបន់ឆ្នេរសមុទ្រកម្ពុជា បានយកចិត្តទុកដាក់ទៅលើការងារថែរក្សាអនាម័យឆ្នេរនេះ ដោយយកចិត្តទុកដាក់។ ជាងនេះ ក៏ស្នើប្រជាពលរដ្ឋ និងអ្នកជាប់ពាក់ព័ន្ធត្រូវចូលរួមសហការថែរក្សាបរិស្ថានតំបន់ឆ្នេរនៅខេត្តព្រះសីហនុ ឲ្យមានសោភណ្ឌភាពជារៀងរហូត ដើម្បីរួមចំណែកទាក់ទាញកំណើនភ្ញៀវទេសចរ ឲ្យចូលមកទស្សនាខេត្តនេះច្រើនថែមទៀតនៅថ្ងៃខាងមុខ។
យ៉ាងនេះក្តី ភ្ញៀវទេសចរដែលចូលទៅទស្សនាតាមឆ្នេរសុខសាន្ត និងឆ្នេរកោះតូច នៃសង្កាត់កោះរ៉ុង ជាបន្តបន្ទាប់មកនេះ មានការព្រួយបារម្ភ ខ្លាចឆ្នេរខ្សាច់ទាំងពីរខាងលើ ត្រូវបំផ្លាញនៅពេលដ៏ខ្លីខាងមុខ ប្រសិនបើរដ្ឋបាលខេត្តព្រះសីហនុ មិនរុះរើសំណង់រឹងមាំ និងមិនទប់ស្កាត់ការលួចបង្ហូរទឹកស្អុយចូលសមុទ្រ ដោយមិនឆ្លងកាត់អាងចម្រោះទឹកស្អាតជាមុនឲ្យបានឆាប់ទេ។
ឆ្នេរសមុទ្រខេត្តព្រះសីហនុ មានប្រវែងជាង ១៧១គីឡូម៉ែត្រ (១៧១.៣៥) និងមានកោះចំនួន ៣២ មានជីវចម្រុះធម្មជាតិស្រស់ស្អាត ដែលជាសក្ដានុពលក្នុងការអភិវឌ្ឍពង្រីកវិស័យទេសចរណ៍នាមូលដ្ឋានខេត្តព្រះសីហនុ ក៏ដូចជានៅកម្ពុជានាថ្ងៃអនាគត។
ខេត្តព្រះសីហនុ ទើបទទួលបានជ័យលាភីឈ្នះការប្រកួតប្រជែងទីក្រុងស្អាត ដោយទទួលបានផ្ការំដួល ៣ទង ពីសម្តេចអគ្គមហា សេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា កាលពីថ្ងៃពុធ ទី២៨ ខែកុម្ភៈ ឆ្នាំ២០១៨៕ ដែន សីមា
