ខេត្តព្រះសីហនុ ៖ ប្រជាពលរដ្ឋរស់នៅមូលដ្ឋានសង្កាត់កោះរ៉ុង ក្រុង-ខេត្តព្រះសីហនុ បានចោទក្រុមហ៊ុនរ៉ូយ៉ាល់ គ្រុប (Royal Group) របស់លោកឧកញ៉ា គិត ម៉េង ថា បានបិទផ្លូវមិនឲ្យពួកគេ អាចធ្វើដំណើរឆ្លងកាត់នៅលើកោះរ៉ុង ត្រង់ចំណុចឆ្នេរសុខសាន្ត បានទូលំទូលាយដូចពេលមុនទៀតទេ។ ពួកគេអះអាងថា ផ្លូវក្រាលគ្រួសក្រមហម មានទីតាំងនៅចំណុចឆ្នេរសុខសាន្ត ឬផ្លូវឆ្លងកាត់សណ្ឋាលំដាប់ផ្កាយប្រាំមានឈ្មោះថា រ៉ូយ៉ាល់ ស៊ែន កោះរ៉ុង (Royal Sands Koh Rong) របស់ក្រុមហ៊ុនរ៉ូយ៉ាល់គ្រុប ត្រូវបានកង សន្តិសុខ ឬបុគ្គលិកក្រុមហ៊ុននេះ បិទរនាំងបាំងផ្លូវ មិនឲ្យមធ្យោបាយធ្វើដំណើរអាចឆ្លងកាត់ទេ។
ត្រង់ចំណុចនេះ អាជ្ញាធរខេត្តព្រះសីហនុ បានសន្យាថា នឹងលើកយករណីនេះទៅដោះស្រាយជូនប្រជាពលរដ្ឋ ឈានដល់មានផ្លូវធ្វើដំណើរឆ្លងកាត់ឲ្យបានទូលំទូលាយដូចដើមឡើងវិញ។
ភ្ញៀវទេសចរ ពិសេសប្រជាពលរដ្ឋមានលំនៅឋានរស់នៅក្នុងភូមិសុខសាន្ត និងភូមិកោះតូចជាដើម នៃសង្កាត់កោះរ៉ុង បានឲ្យអ្នកយកព័ត៌មានគេហទំព័រ CEN.COM.KH ប្រចាំនៅលើកោះរ៉ុងដឹងកាលពីព្រឹកថ្ងៃសៅរ៍ ទី២៤ ខែមីនា ឆ្នាំ២០១៨ថា ពួកគេត្រូវកងសន្តិសុខ ឬបុគ្គលិកក្រុមហ៊ុនរ៉ូយ៉ាល់គ្រុប ហាមមិនឲ្យធ្វើដំណើរឆ្លងកាត់ផ្លូវលំក្រាលក្រួសក្រហម ចេញចូលពីភូមិសុខសាន្ត ឆ្លងឆ្ពោះទៅភូមិកោះតូច និងចេញចូលទៅទីតាំងផ្សេងៗ ឲ្យបានទូលំទូលាយដូចពេលមុនទៀតទេ ព្រោះត្រូវក្រុមហ៊ុននេះ បានធ្វើរបងបិទផ្លូវលំ មិនឲ្យឆ្លងកាត់នៅម្តុំបរិវេណសំណង់សណ្ឋាគារលំដាប់ផ្កាយប្រាយ របស់ក្រុមហ៊ុននេះ នៅតាមបណ្តោយឆ្នេរសុខសាន្ត។
ផ្តើមពីបញ្ហានេះ ទាំងភ្ញៀវទេសចរជាតិ-អន្តរជាតិ ពិសេសប្រជាពលរដ្ឋរស់នៅលើកោះរ៉ុងទាំងមូល បានសំណូមពរដល់ អភិបាល ខេត្តព្រះសីហនុ លោក យន្ត មីន ជាពិសេសសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ឲ្យជួយអន្តររាគមន៍ទៅក្រុមហ៊ុនរ៉ូយ៉ាល់គ្រុប របស់ លោកឧកញ៉ា គិត ម៉េង ដើម្បីឲ្យបើកផ្លូវ ដែលក្រុមហ៊ុននេះបានបិទ ផ្តល់ជូនភ្ញៀវទេសចរ និងប្រជាពលរដ្ឋធ្វើដំណើរឆ្លងកាត់ក្នុងមូលដ្ឋានកោះរ៉ុងឲ្យបានដូចពេលមុនវិញ។
ទាក់ទិនបញ្ហានេះ អ្នកយកព័ត៌មានគេហទំព័រ CEN.COM.KH ប្រចាំខេត្តព្រះសីហនុ មិនទាន់អាចទាក់ទង តំណាងក្រុមហ៊ុនរ៉ូយ៉ាល់គ្រុប ដើម្បីស្នើសុំការបំភ្លឺជុំវិញមតិប្រជាពលរដ្ឋចោទក្រុមហ៊ុននេះ ថាបានបិទផ្លូវលំ ក្រាលគ្រួសក្រហម មិនឲ្យពួកគាត់ធ្វើដំណើរឆ្លងកាត់ ក្នុងភូមិសាស្ត្រមួយចំនួន នៃសង្កាត់កោះរ៉ុង មានដូចជា៖ ផ្លូវចេញចូលពីភូមិកោះតូច ឆ្ពោះទៅភូមិសុខសាន្ត និងឆ្ពោះទៅកាន់ភូមិផ្សេងៗទៀត បាននៅឡើយទេ នៅព្រឹកថ្ងៃសៅរ៍ ទី២៤ ខែមីនា ឆ្នាំ២០១៨។
ចំណែក លោក យន្ត មីន អភិបាលខេត្តព្រះសីហនុ ក៏មិនទាន់ស្នើសុំធ្វើអត្ថាធិប្បាយបានដែរ ព្រោះលោកកំពុងជាប់រវល់ប្រជុំ មិនទាន់មានពេលវេលា ដើម្បីបំភ្លឺរឿងនេះទេ។
យ៉ាងនេះក្តី លោក នួន ប៊ុនថុល នាយកទីចាត់ការអន្តរវិស័យសាលាខេត្តព្រះសីហនុ បានទទួលស្គាល់ថា ពិតជាមានប្រជាពលរដ្ឋផ្តល់ព័ត៌មករូបលោកលើករណីក្រុមហ៊ុនរ៉ុយ៉ាល់គ្រុប របស់លោកឧកញ៉ា គិត ម៉េង បានបិទផ្លូវលំ មិនឲ្យប្រជាពលរដ្ឋ និងភ្ញៀវទេសចរធ្វើដំណើរឆ្លងកាត់នៅម្តុំបរិវេណសំណង់សណ្ឋាគារ នៅចំណុចឆ្នេរសុខសាន្ត នៃសង្កាត់កោះរ៉ុងពិតប្រាកដមែន។ លោកបន្តថា ករណីនេះលោកស្នើដល់ប្រជាពលរដ្ឋ ដែលរង់ផលប៉ះពាល់ពីការប្រើប្រាស់ផ្លូវធ្វើដំណើរទាំងអស់រស់នៅលើកោះរ៉ុង ឲ្យដាក់ពាក្យបណ្តឹមកកាន់អាជ្ញាធរសង្កាត់កោះរ៉ុង ដើម្បីសម្របសម្រួល ឬដោះស្រាយមួយដំណាក់កាលសិន ប៉ុន្តែលោក បើនៅតែមិនមានដំណោះស្រាយទៀត អាជ្ញាធរសង្កាត់ នឹងបន្តរាយការណ៍ជូន ថ្នាក់ដឹកនាំរដ្ឋបាលក្រុង-ខេត្តព្រះសីហនុ ឬឈានដល់សុំកិច្ចអន្តរាគមន៍ពីថ្នាក់ដឹកនាំក្រសួងស្ថាប័នពាក់ព័ន្ធ នៃរាជរដ្ឋាភិបាលកម្ពុជា ឲ្យជួយអន្តរាគមន៍បើកផ្លូវធ្វើដំណើរ ដែលត្រូវក្រុមហ៊ុនរ៉ូយ៉ាល់គ្រុប នៅលើកោះរ៉ុង បើកផ្លូវជូនប្រជាពលរដ្ឋ និងភ្ញៀវទេសចរ អាចប្រើប្រាស់ឲ្យបានទូលំទូលាយដូចដើមឡើងវិញ។
គួររំលឹកថា កាលពីថ្ងៃទី១២ ខែធ្នូ ឆ្នាំ២០១៥ ក្រុមហ៊ុន រ៉ូយ៉ាល់ គ្រុប របស់លោកឧកញ៉ា គិត ម៉េង បានបើកការសាងសង់សណ្ឋាគារលំដាប់ផ្កាយ៥ មានឈ្មោះថា រ៉ូយ៉ាល់ ស៊ែន កោះរ៉ុង (Royal Sands Koh Rong) ដោយក្រុមហ៊ុននេះអះអាងថា បានចំណាយទឹកប្រាក់វិនិយោគប្រមាណ ២០លានដុល្លារសហរដ្ឋអាមេរិក។ ក្នុងអំឡុងពេលបើកការដ្ឋានសាងសង់នោះ សម្តេចក្រឡាហោម ស ខេង និងជារដ្ឋមន្ត្រីក្រសួងមហាផ្ទៃ បានមកចូលរួមសម្ពោធបើកការដ្ឋាន ដែលអំឡុងពេលនោះសំណង់លំដាប់ផ្កាយនេះ ត្រូវមន្ត្រីរដ្ឋបាលក្រុងព្រះសីហនុ អះអាងថា បានធ្វើពិធីសម្ពោធដោយមិនទាន់បានស្នើសុំច្បាប់សាងសង់ឲ្យបានត្រឹមត្រូវជាមុនពីអាជ្ញាធរស្ថាប័នពាក់ព័ន្ធ នៃរដ្ឋបាលក្រុង-ខេត្តព្រះសីហនុនោះទេ។
ឯកសារខ្លះបង្ហាញថា រាជរដ្ឋាភិបាលកម្ពុជា បានផ្ដល់សិទ្ធិវិនិយោគទៅឲ្យក្រុមហ៊ុន រ៉ូយ៉ាល់ គ្រុប របស់ លោកឧកញ៉ា គិត ម៉េង ដើម្បីធ្វើការអភិវឌ្ឍវិស័យទេសចរណ៍នៅលើកោះរ៉ុងមានរយៈពេល ៩៩ឆ្នាំ។ បើយោងតាមប្លង់អភិវឌ្ឍន៍នៅលើកោះរ៉ុងទាំងមូល របស់ក្រុម ហ៊ុនរ៉ូយ៉ាល់គ្រុប ដែលគេចងព្យួរនៅតាមផ្លូវដែលក្រុមហ៊ុននេះបានឈូសឆាយស្ថាបនាផ្លូវឆ្លងកាត់នៅលើកោះរ៉ុងកន្លងមក បាន បង្ហាញថា ផែនទីបង្ហាញទម្រង់ និងទីតាំងក្បាលដីកោះរ៉ុង ក្នុងភូមិសាស្ត្រសង្កាត់កោះរ៉ុង ក្រុងព្រះសីហនុ ជាទ្រព្យឯកជន របស់រដ្ឋនាមូលដ្ឋាននេះ មានទំហំសរុប ៧.៨២៦ហិកតា។
យ៉ាងណាក៏ដោយចុះ ទោះក្រុមហ៊ុននេះធ្លាប់មានវិវាទដីធ្លីមួយចំនួន ជាមួយប្រជាពលរដ្ឋរស់នៅលើកោះរ៉ុងជាបន្តបន្ទាប់ និងបន្តមកដល់បច្ចុប្បន្ននេះក្តី ក៏ប៉ុន្តែថ្មីៗនេះ មានលេចឮព័ត៌មានមកថា ពិធីសម្ភោធសណ្ឋាគារលំដាប់ផ្កាយ៥ មានឈ្មោះថា រ៉ូយ៉ាល់ ស៊ែន កោះរ៉ុង (Royal Sands Koh Rong) របស់ក្រុមហ៊ុន រ៉ូយ៉ាល់ គ្រុប ដែលមាន លោកឧកញ៉ា គិត ម៉េង ជាអគ្គនាយក គ្រោងនឹងបើកសម្ភោធនៅថ្ងៃទី៤ ខែមេសា ឆ្នាំ២០១៨ ហើយ សម្តេចអគ្គមហាសេនាបតីតេជោ ហ៊ុន សែន នឹងអញ្ជើញមកចូលរួមជាអធិបតីដ៏ខ្ពស់ខ្ពស់នៅក្នុងពិធីសម្ភោធនោះថែមទៀត៕ ដែន សីមា
