ពលរដ្ឋដែលមានវ័យចំណាស់នៅជប៉ុនជាច្រើន មានចេតនាបំពានច្បាប់ដើម្បីបានរស់នៅក្នុងគុក ដោយហេតុថា ពួកគេធុញទ្រាន់នឹងសង្គមខាងក្រៅ ហើយការរស់នៅពីក្រោយ “ចំរឹងដែក” វាហាក់ស្រួលជាង។
ជប៉ុនជាមហាអំណាចសេដ្ឋកិច្ចមួយ ប៉ុន្តែអំឡុងពេលថ្មីៗនេះគេឃើញមានបាតុភូតចម្លែកមួយបានកើតឡើង ដោយហេតុថា អត្រាមនុស្សវ័យចំណាស់បំពានច្បាប់កាន់តែកើនឡើងមិនឈប់ឈរ
ជាប្រទេសមួយដែលពលរដ្ឋ ១/៤ គឺជាមនុស្សចាស់ស្ថិតក្នុងវ័យ ៦៥ឆ្នាំឡើងធ្វើឲ្យស្ថានភាពបែបនេះក្លាយជាបញ្ហាមួយកាន់តែគួរឲ្យចាប់អារម្មណ៍ចំពោះរដ្ឋការជប៉ុន។
តាមគេហទំព័រ Bloomberg មានភាពជាក់ស្តែងមួយបង្ហាញថា ការចោទប្រកាន់ទោសក្នុងកម្រិតស្រាលចំពោះមនុស្សវ័យកាន់តែចំណាស់ កាន់តែកើនឡើងច្រើនប្រៀបទៅនឹងវ័យដទៃៗទៀត។ សមាមាត្រនោះបានកើនឡើង ៤ដង ក្នុងប៉ុន្មានទស្សវត្សរ៍មកនេះ។
បាតុភូតមិនប្រក្រតីខាងលើផ្តើមចេញពីគោលនយោបាយថែទាំមនុស្សចាស់នៅជប៉ុន ខណៈពេលដែលពួកគេពុំទទួលបានការយកចិត្តទុកដាក់ពីក្រុមគ្រួសារ និងសង្គម។ គេហទំព័រដដែលបង្ហាញឲ្យឃើញថា ចំនួនមនុស្សចាស់ដែលរស់នៅឯកោម្នាក់ឯងនាប្រទេសជប៉ុន បានកើនឡើង ៦០០% ចាប់ពីឆ្នាំ ១៩៨៥-២០១៥។
ពាក់កណ្តាលក្នុងចំណោមអ្នកដែលត្រូវចាប់ដោយសារទោសលួចកំប៉ិកកំប៉ុក គឺដោយសារគេសារភាពខ្លួនឯងថា ពុំមានគ្រួសារ ឬពុំសូវមានទំនាក់ទំនងជាមួយសាច់ញាតិ។ ចំពោះពួកគេជីវិត នៅពីក្រោយរបាំងដែក វាស្រស់ស្អាតជាងជីវិតនៅសង្គមខាងក្រៅ។
របាយការណ៍មួយបានបង្ហាញថា ក្នុងចំណោមមនុស្សម្នាក់ក្នុង ៥នាក់ ដែលជាប់ពន្ធនាគារក្នុងអាយុមជ្ឈិមវ័យ មាន៩/១០ ករណី ជាស្ត្រីវ័យចំណាស់ ត្រូវចាប់ឃុំព្រោះតែបទលួចកំប៉ិកកំប៉ុក។
អ្នកស្រី Yumi Muranaka អនុរក្សនៃពន្ធនាគារសម្រាប់នារី Iwakuni បានចែករំលែកលើគេហទំព័រ Bloomberg ថា ៖ ពួកគេអាចមានគ្រួសារ ប៉ុន្តែពួកគេពុំមានអារម្មណ៍ថា វាជាសម្បុកដ៏កក់ក្តៅមួយឡើយ។
នៅពន្ធនាគារនេះ ចំណាយសម្រាប់ការងារផ្សេងៗគឺ ២២ម៉ឺនដុល្លារ អាមេរិក ។ ប៉ុន្តែតួលេខនេះនៅមានចំនួនច្រើនជាងដោយសារតម្រូវការអំពីសុខាភិបាល និងសំណូមពរនៃការថែទាំពិសេសចំពោះមនុស្សចាស់។
ទណ្ឌិតស្ត្រីនៅនេះ ត្រូវបានទទួលប្រយោជន៍សុខាភិបាល ហើយគេមានអារម្មណ៍ថា វាជាសហគមន៍មួយដែលពុំអាចរកឃើញនៅខាងក្រៅ។
បញ្ហាខាងលើពិតជាមានសភាពធ្ងន់ធ្ងរ ហើយរដ្ឋាភិបាលប្រទេសនេះ កំពុងប្រកាសអាសន្ន។ ជប៉ុនបាននឹងកំពុងប្រឹងប្រែងប្រឆាំងតបគ្រោះ “ទណ្ឌិតវ័យចំណាស់” តាមរយៈការកែសម្រួលប្រព័ន្ធសុខុមាលភាព ប៉ុន្តែរលកនៃបញ្ហាកំណើនឧក្រិដ្ឋជនវ័យចំណាស់វាហាក់ដូចជាមិនអាចបញ្ចប់បានក្នុងពេលមួយខ្លីនោះទេ៕ ចន្ទ្រា