ភ្នំពេញ ៖ ភាគរយនៃថង់ប្លាស្ទិក ក្នុងបរិមាណសំរាម ដែលប្រមូលបាន តាមរយៈការបោសសំអាតតាមផ្លូវ ក្នុងទីក្រុងធំៗក្នុងព្រះរាជាណាចក្រកម្ពុជា ដែលទីក្រុងមានសំរាមថង់ប្លាស្ទិកច្រើនជាងគឺក្នុងទីក្រុងភ្នំពេញ ត្រូវប៉ាន់ជា១០លានថង់ជារៀងរាល់ថ្ងៃ។
នៅថ្ងៃទី២៣ ខែមីនា ឆ្នាំ២០១៨ ក្រសួងបរិស្ថានរៀបចំពិធីផ្សព្វផ្សាយខ្លឹមសាសំខាន់ៗនៃអនុក្រឹត្យ១៦៨ស្តីពីគ្រប់គ្រងថង់ប្លាស្ទិក ផ្សព្វផ្សាយឯកសារសេចក្តីព្រាងសារាចរអន្តរក្រសួងស្តីពីការអនុវត្តអនុក្រឹត្យស្តីពីការគ្រប់គ្រងថង់ប្លាស្ទិក និងប្រកាសអន្តរក្រសួងពីការកំណត់កម្រៃបន្ថែម លើការផ្តល់ប្លាស្ទិកដល់អតិថិជន។
នាឱកាសនោះ លោករដ្ឋមន្ត្រី សាយ សំអាល់ បានស្នើសុំដល់ដៃគូគ្រប់ស្ថាប័ន ជាពិសេសក្រុមហ៊ុនឯកជន ពីការប្រើប្រាស់ និងនាំចូលសារធាតុប្លាស្ទិក ពីព្រោះផ្លាស្ទិកជាបញ្ហាមួយលំបាក និងជារឿងធំសម្រាប់ពិភពលោកដែកត្រូវយកចិត្តទុកដាក់លើបញ្ហានេះ។
លោករដ្ឋមន្ត្រី បានសំណូមពរដល់ គ្រប់អ្នកពាក់ព័ន្ធចូលរួមគិតគូរ ធ្វើយ៉ាងណាកាត់បន្ថយថង់ប្លាស្ទិក និងសំរាមនៅក្នុងទីក្រុង និងចូលរួមបញ្ចេញ នូវមតិយោបល់ ក្នុងការប្រមូលធាតុចូល ដើម្បីឱ្យការអនុវត្តអនុក្រឹត្យ១៦៨សម្រេចនេះមាននិរន្តរភាព។
លោក ហេង ណារ៉េត អគ្គនាយក នៃអគ្គនាយកដ្ឋានគាំពារបរិស្ថាន បានអោយដឹងថា ភាគរយនៃថង់ប្លាស្ទិក ក្នុងបរិមាណសំរាមដែលប្រមូលបានតាមរយៈការបោសសំអាតផ្លូវក្នុងទីក្រុងធំៗ មានប្រមាណ ១៧,៣ភាគរយ ក្នុងទីក្រុងភ្នំពេញ, ២០,៧ភាគរយ ក្នុងខេត្តសៀមរាប និង ៣៤ភាគរយ នៅក្នុងខេត្តព្រះសីហនុ ដោយក្នុងទីក្រុងភ្នំពេញ ត្រូប៉ាន់ប្រមាណថាមានថង់ប្លាស្ទិកប្រមាណជា១០លានថង់ជារៀងរាល់ថ្ងៃ។
គូសបញ្ជាក់ដែរថា ការផ្តល់ថង់ប្លាស្ទិកស្តើងមានដៃយួរដល់អតិថិជននៅតាមបណ្តាមជ្ឈមណ្ឌលពាណិជ្ជកម្ម និងផ្សារទំនើបនឹងត្រូវគិតកម្រៃបន្ថែម ចាប់ពីថ្ងៃទី១០ ខែមេសា ឆ្នាំ២០១៨ ខាងមុខនេះ៕ ដោយ ៖ បញ្ញាស័ក្តិ