ចិញ្ចៀនពេជ្រ ២០ carat បានរបូតចេញពីនាងដៃរបស់ Paris Hilton នៅពេលនាងកំពុងរាំកាលពីព្រឹកថ្ងៃ ២៣ ម្សិលមិញ ក្នុងក្លឹបរាត្រីដ៏អ៊ូអរមួយនាទីក្រុង Miami រដ្ឋផ្លរីដា។ សាក្សីនិយាយថា “Paris នាងលើកដៃគ្រវីរាំ ប៉ុន្មាននាទីក្រោយចិញ្ចៀនដ៏ធំរបស់នាងបានខ្ទាតចេញបាត់ ។ នាងពិតជាស្លន់ស្លោរ ព្រោះតែក្លឹបរាត្រីងងឹត និងកុះករថែមទៀត ហើយវេលាទៀបភ្លឺនោះ អ្វីគ្រប់យ៉ាងពិតជារាយប៉ាយពាសពេញ។
អង្គរក្សរបស់ Paris ចាប់ផ្តើមរុករកក្នុងតំបន់ VIP រួមជាមួយគូដណ្តឹង Chris Zylka រួមនឹងមិត្តភក្តិស្និទ្ធស្នាលមួយចំនួនទៀត មនុស្សមួយចំនួនពណ៌នាថា ពួកគេលូនលើកម្រាលព្រំ លូនចូលក្រោមតុ ក្រោមជើងអ្នកដទៃ ដើម្បីស្វែងរកចិញ្ចៀននេះ ដែលរបូតចេញពីដៃរបស់នាង ក្រោយពីរុករកមួយសន្ទុះពួកគេឃើញវាធ្លាក់ក្នុងធុងទឹកកកនៅចន្លោះតុពីរ ។ Paris អររហូតស្រែកយំពេលដែលគូដណ្តឹងនោះយកចិញ្ចៀនមកពាក់ឲ្យនាងវិញ៕ លីសា