ខណៈពេលដែលការឈ្លោះប្រកែកគ្នាឈានដល់កម្រិតកំពូលភាគីខាងស្រីបានស្រែកខ្លាំងៗទៅកាន់គូស្នេហ៍របស់ខ្លួនថា ៖ បងឯងទៅស្លាប់ឲ្យបាត់ទៅ។ ស្មានពុំដល់ថា ប៉ុន្មាននាទីក្រោយមកសម្តីនេះក៏ក្លាយជាការពិត ។
គ្រឿងផ្សំដែលពុំអាចខ្វះបាន ដើម្បីសាងឡើងរឿងនិទានស្នេហ៍មួយ នោះការឈ្លោះប្រកែកគ្នារបស់គូស្នេហ៍ថ្មីថ្មោងទាំងឡាយ ជារឿងពុំអាចចៀសវាងបាន ពេលខ្លះវាធ្វើឲ្យចំណងស្នេហ៍នោះកាន់តែរឹងមាំ ប៉ុន្តែពេលខ្លះវាបន្សល់ទុកនូវអនុស្សាវរីយ៍ខ្លោចផ្សាអស់មួយជីវិត។
មុននេះប៉ុន្មានថ្ងៃ មានគ្រោះថ្នាក់ចរាចរណ៍យ៉ាងអាណោចអាធ័មមួយបានកើតឡើងនៅរដ្ឋធានីបាងកក ។ ជនរងគ្រោះគឺជាយុវជនវ័យក្មេងម្នាក់អាយុប្រហែលជា ២០ឆ្នាំ ការប៉ះទង្គិចជាមួយរថយន្តក្នុងទិសតែមួយ បានធ្វើឲ្យយុវជននេះ ដួលទៅលើថ្នល់ ហើយស្លាប់តែម្តង ព្រោះគាត់ពុំបានពាក់មួកសុវត្ថិភាព។
ដំបូងឡើយមនុស្សដែលធ្វើចរាចរណ៍តាមផ្លូវនោះបានងាកមើល ហើយថែមទាំងរិះគន់ចំពោះមរណៈភាពនេះដោយគិតថា មិនព្រមពាក់មួកសុវត្ថិភាព។
ទិដ្ឋភាពគួរអាណោចអាធ័មដែលប្លន់យកជីវិតយុវជនអាយុ ២០ឆ្នាំ ។ ប៉ុន្តែបន្ទាប់ពីបានឃើញទិដ្ឋភាពនារីជាសង្សារស្រែកទ្រហោរយំរាយរ៉ាប់ក្បែរសាកសពយុវជននោះ ទើបគេដឹងពីមូលហេតុដែលគាត់ពុំបានពាក់មួកការពារ។ វាក៏ជាមូលហេតុបណ្តាលឲ្យមានការព្រាត់ប្រាស់ដ៏សែនឈឺចាប់នេះ។
តាមនោះ មុនពេលគ្រោះថ្នាក់កើតឡើង យុវជននេះនិងសង្សារ បានមានជម្លោះយ៉ាងតានតឹងមួយ។ មូលហេតុផ្តើមពីយុវជននោះពុំអាចទៅទទួលមិត្តស្រីតាមការសន្យា ព្រោះចៃដន្យមានកិច្ចការរវល់។ នាងជាសង្សាររៀបរាប់ទាំងទឹកភ្នែកថា “ហេតុអ្វីបានជាខ្ញុំពុំអាចរក្សាស្មារតីឲ្យនឹងនរបាន!? ហេតុអ្វីបានជាខ្ញុំចេះតែជេរគាត់រហូត!? ខ្ញុំពិតជាសាហាវណាស់ ព្រោះដោយសារតែខ្ញុំប្រើពាក្យថា ៖ បងឯងទៅស្លាប់ឲ្យបាត់ទៅ ! បងឯងទៅស្លាប់ទៅ ! ពុំស្មានថា ឥឡូវគឺវាដូច្នេះមែន។
ក្នុងនាមជាសង្សារពេលទៅដល់កន្លែងកើតហេតុ សង្សាររបស់នាងបានទៅកាន់ពិភពថ្មីបាត់ហើយ។
ពេលនេះដំណក់ទឹកភ្នែក ការស្តាយស្រណោះ បានក្លាយជារឿងគ្មានន័យទាំងអស់ …ដល់នេះទើបគេដឹងថា យុវជនវ័យក្មេងបានជិះម៉ូតូដោយពុំមានពាក់មួកសុវត្ថិភាពក្នុងល្បឿនលឿនដោយអារម្មណ៍របស់គាត់កំពុងរងការវាយប្រហារយ៉ាងធ្ងន់ធ្ងរ ជាហេតុបណ្តាលឲ្យកើតឡើងនូវរឿងដូចនារីជាសង្សារបាននិយាយ បងឯងទៅស្លាប់ទៅ! បងឯងទៅស្លាប់ទៅ! ៕ ចន្ទ្រា