កណ្តាល ៖ លោក ស៊ុន ចាន់ថុល បានថ្លែងថា បើកម្ពុជាមិនអាចបញ្ចប់ភ្លើងសង្គ្រាម មិនអាចរកឃើញសន្តិភាពបាននោះទេ ដូច្នេះសុខសន្តិភាព គឺជាបុព្វហេតុដ៏ចម្បងសម្រាប់ការអភិវឌ្ឍជាតិ ដែលរងភាពខ្ទេចខ្ទាំ ដោយសារភ្លើងសង្គ្រាម ឲ្យឈានមកកាន់យុគសម័យថ្មី ដែលមានការរីកចម្រើនដូចពេលបច្ចុប្បន្ន។
ថ្ងៃអាទិត្យទី២៥ ខែមីនា ឆ្នាំ២០១៨ ក្នុងពិធីបញ្ចុះខណ្ឌសីមាព្រះវិហារវត្តពាមឃ្លាំង ឋិតនៅក្នុងឃុំលើកដែក ស្រុកកោះធំ ខេត្តកណ្តាល ក្រោមអធិបតីភាពសម្តេចព្រះមហាសុមេធាធិបតីកិត្តិឧទ្ទេសបណ្ឌិត នន្ទ ង៉ែត សម្តេចព្រះសង្ឃនាយក នៃព្រះរាជាណាចក្រកម្ពុជា និងឯកឧត្តម ស៊ុន ចាន់ ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន និងជាប្រធានក្រុមការងារចុះជួយស្រុកកោះធំ ។
លោកទេសរដ្ឋមន្ត្រីបានគូសបញ្ជាក់ពីសុខសន្តិភាព ក្រោមការដឹកនាំដ៏ភ្លឺស្វាងរបស់សម្តេចអគ្គមហា សេនាបតីតេជោ ហ៊ុន សេន នាយករដ្ឋមន្ត្រីនៃព្រះរាជាណាចក្រកម្ពុជា បានធ្វើឱ្យស្រុកកោះធំ ក៏ដូចជា ប្រទេសជាតិទាំងមូល មានលទ្ធភាពពេញលេញក្នុងការ អភិវឌ្ឍហេដ្ឋារចនាសម្ព័ន្ធ ផ្លូវថ្នល់ ស្ពាន ប្រព័ន្ធធារាសាស្ត្រ សាលារៀន មន្ទីរពេទ្យ វត្តអារាម ដើម្បីលើកកម្ពស់កម្រិតជីវភាពរស់នៅរបស់ប្រជា ពលរដ្ឋ ធានាបាននូវសុខសន្តិភាព សុវត្ថិភាព និងសណ្តាប់ធ្នាប់សាធារណៈ ពិសេសធ្វើឱ្យស្រុកកោះធំ មានការរីកចម្រើន និងជាក្តីសង្ឃឹមទៅអនាគត។
លោកបានថ្លែងបន្តថា នេះសបញ្ជាក់ឱ្យឃើញពីការយកចិត្តទុកដាក់ និងគិតគូររបស់ថ្នាក់ដឹកនាំរាជរដ្ឋាភិបាលលើវិស័យ អាណាចក្រ ក៏ដូចជាវិស័យពុទ្ធសាសនា និងជាសមិទ្ធផលដ៏ល្អប្រណិតថ្មីមួយទៀតរបស់វត្តពាម ឃ្លាំងមង្គល ដែលបានកើតចេញពីសទ្ធាជ្រះថ្លា របស់ព្រះសង្ឃ ពុទ្ធបរិស័ទ ព្រមទាំងសប្បុរសជនគ្រប់ មជ្ឍដ្ឋាន ដើម្បីឧទ្ទិសជូនព្រះពុទ្ធសាសនា ដែលជាសាសនារបស់រដ្ឋ។
លោក ស៊ុន ចាន់ថុល បានថ្លែងថា បើកម្ពុជាមិនអាចបញ្ចប់ភ្លើងសង្គ្រាម រកពន្លឺសុខសន្តិភាព និងការបង្រួបបង្រួមជាតិទេនោះ កម្ពុជាមិនអាចរកឃើញភាពសុខសាន្ត និងការរីកចម្រើន ដូចពេលបច្ចុប្បន្ននោះឡើយ។
លោក ស៊ុន ចាន់ថុល បានថ្លែងថា សម្តេចតេជោ ហ៊ុន សែន គឺជារដ្ឋបុរសរបស់ជាតិកម្ពុជាមួយរូប ដែលមិនត្រឹមតែតស៊ូវាយផ្តួលរំលំរបបប្រល័យពូជសាសន៍ប៉ុលពតឲ្យខ្ចាត់ខ្ចាយនោះទេ តែជានិច្ចកាលសម្តេចតែងបានតម្កល់តម្លៃប្រយោជន៍ជាតិ និងប្រជាជនជាធំជានិច្ច ដោយបានដាក់ចេញនូវនយោបាយឈ្នះឈ្នះនាំមកនូវជោគជ័យធំបំផុតសម្រាប់កម្ពុជា។
លោក ស៊ុន ចាន់ថុល បានអំពាវនាវដល់ប្រជាពលរដ្ឋខ្មែរទាំងនៅក្នុងស្រុកកោះធំ និងនៅទូទាំងប្រទេសត្រូវរួមគ្នាការពារ និងថែរក្សាឲ្យបាននូវសុខសន្តិភាពនេះ ដោយមិនត្រូវជឿតាមការអុចអាលញុះញង់ពីក្រុមជនអគតិណាមួយឈានទៅបង្កវិនាសកម្មបំផ្លាញនូវសមិទ្ធផលដែលកម្ពុជាកំពុងមាននោះឡើយ៕ ដោយ ៖ បញ្ញាស័ក្តិ
