ខេត្តកំពង់ចាម ៖ គ្រោះថ្នាក់ចរាចរណ៍វាពិតជាបានធ្វើអោយប៉ះពាល់យ៉ាងធ្ងន់ធ្ងរទៅលើសង្គមគ្រួសារនិងសង្គមជាតិ ។ដូច្នេះហើយ ទើបរាជរដ្ឋាភិបាលក៏ដូចជាអាជ្ញាធរដែនដី ដែលជាម៉ែ ជាឱរបស់ប្រជាពលរដ្ឋតែងតែស្នើសូមឲ្យប្រជាពលរដ្ឋទាំងអស់ចូលរួម គោរពច្បាប់ចរាចរណ៍ទាំងអស់គ្នា ដើម្បីធ្វើយ៉ាងណាកាត់បន្ថយអោយបាននូវ គ្រោះថ្នាក់ចរាចរណ៍នេះអោយនៅកម្រិតទាបប៉ផុត។
លោកគួច ចំរើន អភិបាលខេត្តកំពង់ចាម ក្នុងនាមជាអាណាព្យាបាលប្រជាពលរដ្ឋពាក់ព័ន្ធ នឹងបញ្ហានេះបានជំរុញឲ្យប្រជាពលរដ្ឋ យកចិត្តទុកដាក់ខ្ពស់ពីបញ្ហាគ្រោះថ្នាក់ចរាចរណ៍ ដោយកត្តាគ្រោះថ្នាក់ចរាចរណ៍នៅក្នុងប្រទេសកម្ពុជា គឺជារឿងសំខាន់បំផុតនៅក្នុងពេលបច្ចុប្បន្ន ដែលប្រមុខរាជរដ្ឋាភិបាលកម្ពុជា កំពុងតែយកចិត្ដទុកដាក់បំផុត ទៅលើបញ្ហានេះ។
ជាក់ស្ដែង លោក គួច ចំរើន អភិបាលខេត្តកំពង់ចាម នៅក្នុងពិធីសម្ពោធដាក់អោយប្រើប្រាស់ ជាផ្លូវការនៅសាលាធម្មសភា និងសមិទ្ធផលនានា នៅវត្តរដ្ឋមាលា ហៅវត្តជាលាចចារ ស្ថិតនៅភូមិជាលា ឃុំជាលា ស្រុកបាធាយ ខេត្តកំពង់ចាម នាថ្ងៃអាទិត្យ ទី ២៥ ខែមីនាឆ្នាំ ២០១៨នេះ បានមានប្រសាសន៍ ឲ្យប្រជាពលរដ្ឋនៅក្នុងខេត្តកំពង់ចាម យកចិត្តទុកដាក់ខ្ពស់ អំពីបញ្ហាគ្រោះថ្នាក់ចរាចរនេះ ដោយលោកអភិបាល បានបញ្ជាក់ថា បញ្ហាគ្រោះថ្នាក់ចរាចរ កំពុងកើតឡើងនៅក្នុងខេត្តកំពង់ចាម ក្នុងបណ្ដាស្រុកនានា ដោយ ឡែកនាពេលកន្លងទៅ នៅក្នុងស្រុកបាធាយ បញ្ហាគ្រោះថ្នាក់ចរាចរ មានអត្រាខ្ពស់ជាងបណ្ដាស្រុកផ្សេងៗ។ នេះដោយសារតែការបើកបររបស់ពួកគាត់ មិនមានការប្រុងប្រយ័ត្ន បើកបរហួសល្បឿនកំណត់ បើកបរដោយភាពស្រវឹង និងកត្តាជាច្រើនទៀត។
ដូច្នេះទេ លោក ស្នើសូមឲ្យប្រជាពលរដ្ឋទាំងអស់ ចូលរួម គោរពច្បាប់ចរាចរទាំងអស់គ្នា ដើម្បីធ្វើយ៉ាងណា កាត់បន្ថយអោយបាននូវគ្រោះថ្នាក់ចរាចរនេះ អោយនៅកម្រិតទាបបំផុត៕ ដោយ ៖ បញ្ញាស័ក្តិ