ភ្នំពេញ ៖ លោក យិន សារឿន ចៅក្រមស៊ើបសួរ នៃសាលាដំបូងរាជធានីភ្នំពេញ បានចេញដីកាបង្គាប់ឱ្យឃុំខ្លួនស្ត្រីម្នាក់ ជាបណ្តោះ អាសន្ន ពាក់ព័ន្ធករណី ប៉ុនប៉ងឃាតកម្មដាក់ថ្នាំបំពុលសម្លាប់ប្តីដើម នៅថ្ងៃទី២៥ ខែមីនា ឆ្នាំ២០១៨។
លោក ស៊ឺ មុនីរ័ត្ន តំណាងអយ្យការនៃសាលាដំបូងរាជធានីភ្នំពេញ បានបើកការស៊ើបសួរ និងសម្រេចចោទប្រកាន់លើឈ្មោះ ម៉េត ជិន ភេទស្រី អាយុ៣៨ឆ្នាំ ទីលំនៅផ្ទះជួលលេខ១៦ ភូមិតាងួន សង្កាត់កាកាប ខណ្ឌពោធិសែនជ័យ រាជធានីភ្នំពេញ មុខរបរ រកស៊ីលក់ដូរ ពីបទ ប៉ុនប៉ងឃាតកម្ម ដោយប្រើថ្នាំពុល និងបោះបង់អនីតិជន លើប្តីឈ្មោះ ស៊ឹម ស៊ុយ ភេទប្រុស អាយុ៤០ឆ្នាំ យោងតាមមាត្រា ២៧ មាត្រា២០១ និងមាត្រា ៣២១ នៃក្រមព្រហ្មទណ្ឌ ។
សមត្ថកិច្ចកងរាជអាវុធហត្ថរាជធានីភ្នំពេញ បានចាប់ខ្លួនជនត្រូវចោទ ឈ្មោះ ម៉េត ជិន កាលពីថ្ងៃទី២៤ ខែមីនា ឆ្នាំ២០១៨ ក្រោយពីសមត្ថកិច្ចទទួលពាក្យបណ្តឹងរបស់ជនរងគ្រោះជាប្តីថា ជនត្រូវចោទជាប្រពន្ធ បានដាក់ថ្នាំពុលប៉ុនប៉ងសម្លាប់ និងបានលួចលុយរត់ គេចខ្លួនទៅតាមប្រុសថ្មី ៕ ដោយ ៖ បញ្ញាស័ក្តិ