ភ្នំពេញ ៖ យុវជនម្នាក់ស្លាប់ និងរងរបួសធ្ងន់ម្នាក់ ក្នុងគ្រោះថ្នាក់ចរាចរបើកម៉ូតូវ៉ាជែង ហើយជ្រុលទៅបុករថយន្តកុងតឺន័រ សណ្តោងរ៉ឺម៉ក ក្រោយពីពួកគេជិះម៉ូតូត្រឡប់ មកពីជួបស្រីស្នេហ៍វិញ នៅវេលាម៉ោង៥និង៤៥នាទីល្ងាច ថ្ងៃអាទិត្យទី២៥ ខែមីនា ឆ្នាំ២០១៨ នៅលើកំណាត់ផ្លូវជាតិលេខ៣ ទល់មុខវត្តព្រៃព្រីង ស្ថិតក្នុងភូមិអង្គតាគៀត សង្កាត់កន្ទោក ខណ្ឌ ពោធិ៍សែនជ័យរាជធានីភ្នំពេញ។
ជនរងគ្រោះដែលស្លាប់ឈ្មោះ សេង អាយុ២៣ឆ្នាំ ជាកម្មករសំណង់ និង ឈ្មោះ សួន អាយុ១៨ឆ្នាំ របួសធ្ងន់។ រថយន្តម៉ាក HYUNDAI ពណ៌ខៀវ ពាក់ស្លាកលេខភ្នំពេញ 3A-2713 ធ្វើដំណើរពីជើងទៅត្បូង។ ចំណែកម៉ូតូរងគ្រោះម៉ាក់ហុងដាឌ្រីម០១២ ពណ៌ខៀវ ពាក់ស្លាកលេខព្រៃវែង 1F-4001។ មុនពេលមានហេតុការណ៍នេះកើតឡើង យុវជនទាំងពីរនាក់ និងមិត្តភក្តិជាច្រើននាក់ បាននាំគ្នាដឹកស៊ីស្រវឹងជោក។ ក្នុងពេលគ្រោះថ្នាក់នោះ សមត្ថកិច្ចក៏បានរកឃើញថ្នាំញៀនចំនួន២កញ្ចប់តូច និងលុយ ដុល្លារចំនួន៨០ដុល្លារផងដែរ នៅក្នុងកាបូបជនរងគ្រោះដែលស្លាប់។ តាមការសនិ្នដ្ឋានរបស់សមត្ថកិច្ចថា ពួកគេទើបត្រឡប់ពីលក់ថ្នាំញៀនឲ្យគេនៅម្តុំណាមួយ មិនមែនត្រឡប់ពីជួបស្រីស្នេហ៍នោះទេ។
ម្តាយមីងរបស់សព បាននិយាយថា មុនពេល កើតហេតុនេះ គឺក្មួយប្រុសគាត់ឈ្មោះ សេង អាយុ២៣ឆ្នាំ ជាងសំណង់ បានមកលេងផ្ទះរបស់គាត់ ហូបចុកផឹកស៊ីតិចតួច នៅផ្ទះគាត់ ជាមួយនិងកូនប្រុសគាត់។ ស្រាប់តែក្រោយមកឮថា ក្មួយប្រុសខ្ចីម៉ូតូកូនគាត់ថា ទៅជួបសង្សារមួយភ្លែត ហើយក៏បានបបួលកូនប្រុសគាត់ទៅជាមួយផងដែរ។ កូនប្រុសគាត់ ក៏បានប្រកែកមិនព្រមទៅទេ តែគេបបួលទៅទាល់តែបាន។ ក្រោយមកទើបមានគេទូរស័ព្ទប្រាប់ថា អាសេង និងអាសួន ជួបគ្រោះថ្នាក់ចរាចរណ៍ស្លាប់ហើយ។
មុនពេលកើតហេតុ បានឃើញម៉ូតូ១គ្រឿងនេះ ជិះឌុបគ្នា២នាក់ ធ្វើដំណើរពីជើងមកយ៉ាងលឿន វ៉ាជែងពេញផ្លូវ លុះមកដល់ចំណុច កើតហេតុមុខវត្តព្រៃព្រីង បុករថយន្តសណ្តោងរ៉ឺម៉កស្លាប់ភ្លាមម្នាក់ និងម្នាក់ទៀតរងរបួសធ្ងន់។ អ្នកបើកបររថយន្តរត់គេចខ្លួនបាត់៕ ដោយ ៖ បញ្ញាស័ក្តិ