បន្ទាយមានជ័យ ៖ សម្តេចតេជោ ហ៊ុន សែន បានប្រកាសដាច់ខាតក្នុងការការពារ និងរក្សាសន្តិភាពដល់ប្រទេសកម្ពុជា មិនឲ្យនណាម្នាក់មកបំផ្លាញសន្តិភាពដែលយើងរកបានដោយកម្រនោះឡើយ។
សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ក្នុងពិធីបើកការដ្ឋានសាងសង់ និងធ្វើឲ្យប្រសើរឡើងនូវកំណាត់ផ្លូវជាតិ លេខ៥ ពីខេត្តបាត់ដំបងឆ្ពោះទៅកាន់ក្រុងសិរីសោភ័ណ ខេត្តបន្ទាយមានជ័យ នៅព្រឹកថ្ងៃចន្ទ ទី២៦ ខែមីនា ឆ្នាំ២០១៨ នេះ បានថ្លែងថា កម្ពុជានៅតែរក្សាជំហរគោរពលទ្ធិប្រជាធិបតេយ្យ សេរីពហុបក្ស ហើយការបោះឆ្នោតជាតិយើងនឹងប្រព្រឹត្តិធ្វើឡើងជាធម្មតា គឺនៅថ្ងៃទី២៩ កក្កដា ឆ្នាំ២០១៨ ខាងមុខនេះដោយគ្មានការកែប្រែឡើយ
សម្តេចតេជោ ហ៊ុន សែន បានរំលឹកអំពីសង្គ្រាមផ្ទៃក្នុងរបស់ប្រទេសកម្ពុជា ជាពិសេសក្នុងរបបប្រល័យពូជសាសន៍ប៉ុលពត ហើយនៅក្នុងពេលនោះខេត្តបាត់ដំបង និងខេត្តបន្ទាយមានជ័យ គឺជាសមរភូមិក្តៅ ដែលពួកខ្មែរក្រហមបានតាំងទីលំនៅនៅទីនេះ ។ ពេលនោះតំបន់នេះ បានក្លាយទៅជាតំបន់គ្រោះថ្នាក់បំផុតដែលគ្មាននណាអាចចូលបាននោះទេ។ ប៉ុន្តែដោយសាតែការដាក់ចេញនូវគោលនយោបាយ ឈ្នះ-ឈ្នះ របស់សម្តេចតេជោ គឺបានធ្វើឲ្យក្រុមខ្មែរក្រហមព្រមចុះចូលធ្វើសមាហរណកម្មមករួមរស់ជាមួយរាជរដ្ឋាភិបាលដើម្បីបញ្ចប់សង្គ្រាម និងស្វែងរកសុខសន្តិភាពជូនជាតិមាតុភូមិ។
ដោយសារតែសន្តិភាពនេះហើយ ទើបយើងអាចកសាងអភិវឌ្ឍន៍សមិទ្ធផលជាតិបានបន្តបន្ទាប់ដូចថ្ងៃនេះ ហើយបច្ចុប្បន្ននេះខេត្តបាត់ដំបង និងខេត្តបន្ទាយមានជ័យ គឺពោពេញដោយសុខសន្តិភាព និងការអភិវឌ្ឍរីកចម្រើនជាបន្តបន្ទាប់ផងដែរ។
សម្តេចតេជោនាយករដ្ឋមន្ត្រី ក៏បានមានប្រសាសន៍ផងដែរថា ការកសាងនិងធ្វើឲ្យប្រសើរឡើងលើកំណាត់ផ្លូវជាតិលេខ៥នេះ គឺមិនមែនធ្វើតែ១កំណាត់នោះទេ គឺរាជរដ្ឋាភិបាលនឹងសាងសងជាបន្តបន្ទាប់ទៀត ដូចជាថ្ងៃនេះបើការសាងសង់កំណាត់ផ្លូវពីក្រុងបាត់ដំបងទៅសិរីសោភ័ណ បន្ទាប់មកនឹងសាងសង់ពីព្រែកក្តាមមកខេត្តពោធិសាត់ និងបន្ទាប់មកពីខេត្តបាត់ដំបងទៅដល់ព្រំដែនកម្ពុជា-ថៃទៀតផង។ ជាមួយគ្នានោះផងដែររដ្ឋាភិបាលនឹងមានគម្រោងធ្វើឲ្យប្រសើរឡើងនូវបណ្តាផ្លូវជាតិផ្សេងៗមួយចំនួនទៀតនាពេលខាងមុខ។
នៅក្នុងអំឡុងពេលនៃការសាងសង់កំណាត់ផ្លូវនេះ សម្តេចតេជោនាយករដ្ឋមន្ត្រី ក៏សូមឲ្យប្រជាពលរដ្ឋ មេត្តាយោគយល់ក្នុងការធ្វើដំណើរ ព្រោះអាចមានការំខានដោយគ្រឿងចក្រសាងសងផ្សេងៗ ជាមួយគ្នានោះសម្តេចតេជោក៏សូមឲ្យប្រជាពលរដ្ឋទាំងអស់ចូលរួមគោរពច្បាប់ចរាចរណ៍ទាំងអស់គ្នាផងដែរ។
សម្តេចតេជោនាយករដ្ឋមន្ត្រី បានថ្លែងអំណរគុណចំពោះបងប្អូនប្រជាពលរដ្ឋ និងរដ្ឋាភិបាលជប៉ុន ដែលបានចូលរួមចំណែកយ៉ាងសំខាន់ក្នុងការងារអភិវឌ្ឍន៍ហេដ្ឋារចនាសម្ព័ន្ធប្រទេសកម្ពុជា។
ឆ្លៀតក្នុងឱកាសដ៏វិសេសវិសាលនេះ សម្តេចតេជោ ហ៊ុន សែន នាយករដ្ឋមន្ត្រី បានជូនពរដល់បងប្អូនប្រជាពលរដ្ឋទាំងអស់ក្នុងឱកាសពិធីបុណ្យចូលឆ្នាំខ្មែរប្រពៃណីជាតិខាងមុខ សូមជួបតែសេចក្តីសុខសេចក្តីចម្រើនគ្រប់ៗគ្នា៕ ដោយ ៖ បញ្ញាស័ក្តិ
