ខេត្តព្រះសីហនុ ៖ មន្ត្រីសមាគមអាដហុក ប្រចាំខេត្តព្រះសីហនុ បានឲ្យដឹងថា កាលពីព្រឹក ថ្ងៃទី២៥ ខែមីនា ឆ្នាំ២០១៨ មានស្រី្តមា្នក់អាយុ ២៣ឆ្នាំ ឈ្មោះ ចាន់ ស្រីទី មានមុខរបរលក់ដូរ មានទីលំនៅភូមិបី សង្កាត់លេខ៤ ក្រុងព្រះសីហនុ ខេត្តព្រះសីហនុ ត្រូវប្តីបានវាយឲ្យរបួសជាំខ្មៅ ស្ទើរតែគ្រប់ទីកន្លែងលើដងខ្លួន ជាំក្បាល និងមុខ ដ៏ស្រស់ស្អាត របស់នាង ដោយសារតែប្តីអនីតិសង្វាសរបស់នាង ប្រើខ្សែក្រវ៉ាត់ និងប៉ែលចូកដី វាយមកលើរូបនាង ព្រោះសារភ្លើងប្រច័ណ្ឌ។
អ្នកស្រី ជាប សុធារី អ្នកសម្របសម្រួលសមាគមអាដហុក(ADHOC) ប្រចាំខេត្តព្រះសីហនុ បានឲ្យដឹងថា ស្ត្រីរងគ្រោះឈ្មោះ ចាន់ ស្រីទី ត្រូវបុរសជាប្តីមិនរៀបការឈ្មោះ ភាស បានប្រើអំពើហិង្សាឲ្យមានរបួសស្នាមធ្ងន់ធ្ងរពេញខ្លួន។
សូមជំរាបថា ជនរងគ្រោះ ចាន់ ស្រីទី និងបុរស ម្នាក់ឈ្មោះ ភាស់ អាយុប្រហែល ២៨ឆ្នាំ បានស្ម័គ្ររួមរស់ នៅជាមួយគ្នាជាប្តីប្រពន្ធ ដោយមិនបានរៀបការតាមប្រពៃណីទេ។ ប្រភព ឲ្យដឹងថា ឪពុក និងបងប្អូនស្ត្រីរងគ្រោះ ក៏បានដឹងឮរឿងនេះដែរ ប៉ុន្ដែពួកគាត់ មិនអាចហាមឃាត់កូនស្រីបាន ក៏បណ្តោយតាមចិត្តនាងទៅ ហើយការរស់នៅជាមួយគ្នា របស់ប្តីប្រពន្ធខាងលើនេះ មិនសូវជាបានសេចក្តីសុខប៉ុន្មាននោះទេ ហើយជីវភាពគ្រួសារក៏មិនសូវធូរធារនោះទេ ដោយបុរសជាប្តីប្រកបមុខរបររត់ម៉ូតូឌុប រីឯប្រពន្ធលក់ដូរនៅផ្ទះបន្តិចបន្តួច។
ញាតិជិតខាងស្ត្រីរងគ្រោះ បានឲ្យដឹងទៀតថា មុនថ្ងៃកើតហេតុ ប្តីប្រពន្ធអនីតិសង្វាស់ទាំងពីរនាក់មានទំនាស់គ្នា ដោយសារ ប្រពន្ធឃើញប្តី ទៅលួចមានទំនាក់ទំនងជាមួយស្រីផ្សេង ហើយដល់ពេលប្រពន្ធសួរនាំរឿងនេះ ក៏បង្កបានជាទំនាស់ពាក្យសម្តី គ្នាយ៉ាងខ្លាំង ដោយសារប្តីបដិសេធ។ នាឱកាសនោះ ស្ត្រីរងគ្រោះ បានខឹងហើយសម្រេចចិត្តរៀបចំខោអាវ ចុះចេញពីផ្ទះរបស់ប្តី ទៅរស់នៅជាមួយឪពុកវិញ (ម្តាយស្លាប់)។ ផ្ទះស្ត្រីរងគ្រោះ និងផ្ទះរបស់ប្តីនាង គឺនៅផ្លូវមុខក្រោយឆ្ងាយពីគ្នាប្រហែល ២០០ម៉ែត្រតែប៉ុណ្ណោះ។ បញ្ហានេះ ស្ត្រីរងគ្រោះឈ្មោះ ចាន់ ស្រីទី បានឲ្យដឹងថា នាងបានទៅរស់នៅជាមួយក្រុមគ្រួសារ ឬផ្ទះខាងប្តី បានប្រហែលជិតមួយខែ ដោយនៅព្រឹកថ្ងៃទី២៥ ខែមីនា ឆ្នាំ២០១៨ វេលាម៉ោងប្រហែល ៨ព្រឹក ត្រូវប្តីបានទូរស័ព្ទ ហៅនាងឲ្យទៅផ្ទះ ប៉ុន្ដែជនរងគ្រោះឆ្លើយថា នាងមិនទៅទេ។ ស្ត្រីរងគ្រោះបន្តថា ប្តីនាងបានគំរាមថា បើនាងមិនទៅផ្ទះទេ គាត់នឹងមកវាយដល់ផ្ទះខាងឪពុកក្មេក ឬផ្ទះសាច់ញាតិស្ត្រីរងគ្រោះតែម្តង។ ដោយបារម្ភខ្លាចមានរឿងកាន់តែធំស្ត្រីរងគ្រោះ បានប្រាប់បងស្រីរបស់ខ្លួន ហើយដើរសំដៅទៅផ្ទះ របស់ប្តី ដោយមិនបានយកទូរស័ព្ទដៃទៅជាមួយទេ ហើយពេលទៅដល់ផ្ទះនាងឃើញប្តីរបស់នាងនៅផ្ទះ ក៏ដើរចូលទៅក្នុងបន្ទប់ ហើយប្តីក៏ចូលទៅតាមក្រោយ ហើយបិទទ្វារសួរនាងថា នាងមានទាក់ទងប្រុសផ្សេងទៀតឬ? ស្ត្រីរងគ្រោះនិយាយថា នាងមិនបានឆ្លើយតបប្តីទេ ដោយនៅស្ងៀម ក្រោយមកប្តីក៏ដាល់ចំមុខនាង ទាត់ធាក់នាងដួលដេកនៅលើដី។ ក្រោយមក ស្ត្រីរងគ្រោះ បានប្រាប់ប្តីនាងថា មិនបានទាក់ទងជាមួយនរណាទេដោយប្រាប់ថា បុរសដែលប្តី នាងប្រច័ណ្ឌនោះ ជាអ្នកជិតខាងផ្ទះនាងទេ ប៉ុន្ដែប្តីរបស់នាងនៅតែមិនស្តាប់ ហើយបានយកខ្សែក្រវ៉ាត់វាយវាត់មកលើខ្លួនប្រាណនាង ហើយនាងបានយកដៃទៅរងការពារខ្លួន ក៏ត្រូវរបួសដៃថែមទៀត។ ស្ត្រីរងគ្រោះ បានឲ្យដឹងទៀតថា ក្រោយមកទៀត ប្តីនាងក៏បានទៅយកប៉ែលចូកដី មកវាយសំពងលើខ្លួននាងទៀត នៅពេលនាងដួលដេកនៅលើដី និងបានគំរាមបង្ខំនាងឲ្យក្រោកពីដួលនៅលើដីហើយបន្តវាយនាងថែមទៀត។ ស្ត្រីរងគ្រោះ ឲ្យដឹងថា នាងបានស្រែកយំ និងដង្ហើយហៅឲ្យអ្នកជិតខាងជួយ ប៉ុន្តែគ្មានអ្នកណាម្នាក់ជួយគាត់ឡើយ ព្រោះប្តីនាងចាក់សោរបន្ទប់វាយនាងនៅក្នុងផ្ទះ។ ស្ត្រីរងគ្រោះ ឲ្យដឹងថា ក្រោយពីប្តីបានវាយធ្វើបាបនាងអស់ចិត្ត បុរសជាប្តី ក៏ទៅមុជទឹកស្លៀកពាក់ចេញទៅក្រៅ ដោយប្រាប់នាងឲ្យរៀបចំផ្ទះឲ្យស្អាត បើគេត្រឡប់មកវិញឃើញនៅដដែលនឹងវាយនាងថែមទៀត។ ងាកមកបងស្រីស្ត្រីរងគ្រោះ នៅពេលបាត់ប្អូនស្រីយូរ មិនឃើញត្រឡប់ទៅផ្ទះវិញ ក៏ប្រើប្អូនស្រីម្នាក់ទៀត ឲ្យទៅមើលនាង ប៉ុន្តែពេលប្អូនស្រីមកដល់ឃើញបងស្រីជាំមុខអង្គុយយំ ហើយក្រោយមកបានដឹងថាប្តីវាយធ្វើបាប នាងក៏ដឹកបងស្រីទៅផ្ទះវិញ។ បងស្រី និងឪពុកនាងបានឃើញស្ថានភាពកូនស្រីធ្ងន់ធ្ងរពេក ក៏ប្រញាប់បញ្ជូននាងទៅមន្ទីរបង្អែកខេត្តព្រះសីហនុ ដើម្បីទទួលការព្យាបាល។
ទាក់ទិនបញ្ហានេះ អ្នកស្រី ជាប សុធារី មន្ត្រីសម្របសម្រួលសមាគមអាដហុក(ADHOC) មានប្រសាសន៍ថា យោងតាមក្រមព្រហ្មទណ្ឌឆ្នាំ២០១០ មាត្រា២២២ អំពើហិង្សាប្រព្រឹត្តដោយសហព័ទ្ធ ឬអនីតិសង្វាសជន (ពាក្យថាសហព័ទ្ធ សំដៅប្តីប្រពន្ធដែលមានសំបុត្រអាពាហ៍ពិពាហ៍។ អនីតិសង្វាសជន សំដៅការរស់នៅជាមួយគ្នាជាប្តីប្រពន្ធ តែមិនចុះសំបុត្រអាពាហ៍ពិពាហ៍ ) នឹងត្រូវផ្តន្ទាទោសជនប្រព្រឹត្តឲ្យជាប់ពន្ធនាគារពី ២ឆ្នាំដល់ ៥ឆ្នាំ និងពិន័យជាប្រាក់ពី បួនលានរៀល ទៅដប់លានរៀល។
អ្នកស្រីបន្តថា អំពើហិង្សានេះ ខាងសមាគមអាដហុក និងអង្គការលីកាដូ ដែលជាអង្គការក្នុងស្រុកធ្វើការងារការពារសិទ្ធិមនុស្ស មានទីតាំងក្នុងខេត្តព្រះសីហនុ បានស្នើសុំឲ្យសមត្ថកិច្ចនរបាល និងលោកអយ្យការអមសាលាដំបូងខេត្តព្រះសីហនុ បន្តនីតិវិធីចាត់វិធាន ការជាបន្ទាន់តាមផ្លូវច្បាប់ ដើម្បីឈានដល់នាំខ្លួនជនប្រព្រឹត្តបទល្មើស មកផ្តន្ទាទោសតាមផ្លុវច្បាប់។
អ្នកស្រីបន្តថា អំពើហិង្សាក្នុងគ្រួសារនេះ ជាអំពើខុសច្បាប់ ដូចជាបទល្មើសព្រហ្មទណ្ឌផ្សេងទៀតដែរ។ ដូច្នេះយើងត្រូវរួមគ្នាទប់ស្កាត់ កុំឲ្យមានអំពើហិង្សាក្នុងគ្រួសារតទៅទៀត ក៏ដូចជាយើងទាំងអស់គ្នា បានរួមគ្នាលើកស្ទួយសិទ្ធិស្ត្រី និងលើកស្ទួយសេដ្ឋកិច្ចគ្រួសារផងដែរ៕ ដោយ ៖ សុធារី