តារាកុនស៊ិចអាមេរិចម្នាក់ឈ្មោះ Stormy Daniels បាននិយាយថា នាងត្រូវបានគេគំរាមកំហែងកុំឲ្យនិយាយរឿងអ្វីទាំងអស់ពីទំនាក់ ទំនងស្នេហាជាមួយនឹងប្រធានាធិបតីអាមេរិច ដូណាល់ ត្រាំ។ នេះបើតាមការចេញផ្សាយរបស់ BBC នៅរសៀលថ្ងៃច័ន្ទ ទី ២៦នេះ។
តារាកុនជ្រូកនេះ បានថ្លែងប្រាប់សារព័ត៌មាន CBS ថាមានបុរសម្នាក់បានដើរមកជិតគាត់ នៅកន្លែងចតឡានក្នុងទីក្រុង Las Vegas កាលពីឆ្នាំ ២០១១ ហើយជនចម្លែករូបនោះបានប្រាប់នាងថា “ទុកឲ្យលោក ត្រាំ នៅម្នាក់ឯងទៅ។ បំភ្លេចរឿងដែលបានកើតឡើងចោល។”
នាងបន្តទៀតថា ក្រោយពេលនិយាយប្រាប់នាងឲ្យរក្សាភាពស្ងៀមស្ងាត់ជុំវិញរឿងជាមួយ ដូណាល់ ត្រាំ បុរសរូបនោះបាន បានដើរក្រវ៉ែល និងមើលកូនស្រីរបស់នាង ដោយនិយាយថា “ក្មេងតូចនេះស្អាត មែន។ នាងនឹងគួរឲ្យអាណិតណាស់ ប្រសិនមានរឿងអ្វីកើតឡើងចំពោះម្តាយនាង”។
ទោះយ៉ាងណា លោក ត្រាំ បដិសេធថា គាត់ពុំមានទំនាក់ទំនងស្នេហាជាមួយនឹងតារាខាងលើ។
តារាអាសអាភាសដដែលបានថ្លែងក្នុងបទសម្ភាសន៍ថា នាងធ្លាប់បានរួមភេទជាមួយនឹងលោក ត្រាំ តែម្តងគត់ នៅក្នុងសណ្ឋាគារមួយ ក្នុងកំឡុងព្រឹត្តិការណ៍កីឡាវាយកូនហ្គោល ក្នុងរដ្ឋកាលីហ្វញ៉ាកាលពីខែ កក្កដា ឆ្នាំ ២០០៦។
រហូតមកដល់ពេលនេះ លោក ប្រធានាធិបតីអាមេរិច ដូណាល់ ត្រាំ មិនទាន់បានធ្វើការឆ្លើយតបនោះទេជុំវិញការចោទប្រកាន់ចុងក្រោយនេះ។
សូមបញ្ជាក់ថា មុនពេលបោះឆ្នោតប្រធានាធិបតីអាមេរិច ក្នុងឆ្នាំ ២០១៦ មានតារាជាច្រើន បានចេញមុខអះអាងពីទំនាក់ទំនងស្នេហារបស់ពួកគេ ជាមួយនឹងលោក។ តារាជាច្រើនក៏បានចេញមុខអះអាងថា ពួកគេត្រូវបានផ្តល់លុយឲ្យ ដើម្បីឲ្យកុំឲ្យពួកគេបកអាក្រាតទំនាក់ទំនងស្នេហាជាមួយនឹងលោក ត្រាំ៕ សុភ័ក្ត្រ