កណ្តាល ៖ នគរបាលស្រុកស្អាង បានឲ្យដឹងថា មានករណីជាងផ្ទះម្នាក់បាក់អន្ទាធ្លាក់ បណ្តាលអោយស្លាប់ និងរបួសម្នាក់ នៅចំណុចភូមិព្រែកអំបិលឃុំ ព្រែកអំបិល ស្រុកស្អាង ខេត្តកណ្តាល ថ្ងៃទី ២៦ ខែមីនា ឆ្នាំ២០១៨ វេលាម៉ោង ៧ព្រឹក។
ជនរងគ្រោះ២នាក់ គឺឈ្មោះសាក់ ពូនភេទប្រុសអាយុ៤៨ឆ្នាំ ជនជាតិខ្មែរ មុខរបរជាងសំណង់ មានទីលំនៅភូមិព្រែកថ្មីឃុំ ព្រែកអំបិល ស្រុកស្អាង ខេត្ត កណ្តាល ស្លាប់ និងឈ្មោះ ហេង ឡា ភេទ ប្រុស អាយុ ៥៤ ឆ្នាំជនជាតិខ្មែរ មុខរបរជាងសំណង់របួសស្រាល។
នៅថ្ងៃកើតហេតុ ឈ្មោះសាក់ ពូនបានមកធ្វើជាងផ្ទះអោយម្ចាស់ផ្ទះឈ្មោះហាយ ងុយភេទប្រុសអាយុ៥៨ឆ្នាំមានទីលំនៅភូមិ ឃុំ កើតហេតុខាងលើ ។ពេលមកដល់កន្លែងធ្វើផ្ទះឈ្មោះសាក់ ពូន និង ឈ្មោះ ហេង ឡា អាយុ ៥៤ ឆ្នាំ ជាមេជាង ក៏ឡើងលើអន្ទារៀបឥដ្ឋកម្ពស់៣ម៉ែត្រ ថែមទាំងលើកដុំឥដ្ឋដាក់លើអន្ទាជាច្រើនដុំទៀត ។ ពេលកំពុងរៀបឥដ្ឋស្រាប់តែបាក់អន្ទា ធ្លាក់ចុះមកក្រោមទាំងឥដ្ឋទាំងមនុស្ស បណ្ដាលដុំឥដ្ឋទាំងនោះធ្លាក់សង្កត់លើឈ្មោះសាក់ ពូន ត្រូវមុខនិងក្បាល បណ្ដាលឲ្យស្លាប់ភ្លាមៗ នៅកន្លែងកើត ហេតុ ។ ចំណែកឈ្មោះហេង ឡា ត្រូវរបួសត្រឹមចង្កេះចុះក្រោម ហើយអ្នកជិតខាង បានយកទៅព្យាបាលនៅមន្ទីរពេទ្យឯកជន ។
ក្រោយពីទទួលបានព័ត៌មានកម្លាំងប៉ុស្តិ៍នគរបាលរដ្ឋបាលព្រែកអំបិល និងជំនាញពិនិត្យហេតុស្រុកស្អាងសហការណ៍ជាមួយលោកមេឃុំ-មេភូមិ ពិនិត្យសពមានស្លាកស្នាមផុងលើផ្ទៃមុខ និងស្នាមជាំលើដើមទ្រូងដោយសាដុំឥដ្ឋសង្កត់ ក្រៅពីនេះពុំមានស្លាកស្នាមអ្វីឡើយ។ ក្រោយពិនិត្យនឹងតាមសំដីម្ចាស់ផ្ទះនឹងអ្នកជិតខាងបំភ្លឺ ជនរងគ្រោះពិតជាធ្លាក់លើអន្ទាស្លាប់ពិតប្រាកដមែន។
ក្រោយពិនិត្យរួចសពបានប្រគល់អោយក្រុមគ្រួសារយកទៅធ្វើបុណ្យតាមប្រពៃណី៕ ដោយ ៖ បញ្ញាស័ក្តិ