បន្ទាយមានជ័យ ៖ គ្រោះថ្នាក់ចរាចរណ៍ រថយន្តកាមរីនិងហាយឡែនឌ័របុកគ្នាលើផ្លូវជាតិលេខ៥៨ នៅព្រំដែនថ្មពួក ស្លាប់៣ របួស៤នាក់ ក្នុងនោះមានមនុស្សស្រីវ័យចំណាស់២នាក់ ក្មេងប្រុស១នាក់ និង របួសធ្ងន់៤នាក់ ។
ហេតុការណ៍កើតឡើងកាលពីម៉ោង១១ ថ្ងៃត្រង់ ថ្ងៃទី២៦ ខែមីនា ឆ្នាំ២០១៨ លើបណ្ដោយផ្លូវលេខ៥៨ កៀកនឹងព្រំដែនកម្ពុជា-ថៃ ស្ថិតនៅភូមិ ក្ដិបថ្ម ឃុំគោករមៀត ស្រុកថ្មពួក បន្ទាយមានជ័យ។
លោកអនុសេនីយ៍ ពុត ហោ នាយប៉ុស្តិ៍នគរបាលព្រំដែនក្តឹបថ្ម នៃនគរបាលការពារព្រំដែនលេខ៨០៧ -ថ្មពួកអោយដឹងថា ៖ រថយន្តបង្កគ្រោះថ្នាក់ ម៉ាកតូយ៉ូតាហាយឡែនឌ័រគ្មានស្លាកលេខ បើកបរពីត្បូងទៅជើង បានបុកគ្នាត្រង់ផ្លូវកោងខ្ពស់ និងរថយន្តតូចម៉ាកតូយ៉ូតាកាមរី ពាក់ស្លាកលេខកំពត 2A ០២៨៦ ពណ៌ស្លាបក្អែក ដែលបើកបរច្រាសទិសពីជើងទៅត្បូង។
រថយន្តកាមរីបុកចំចំហៀងរថយន្តហាយឡែនឌ័របណ្តាលអោយប៉ើងធ្លាក់ចុះពីថ្នល់ដ៏ខ្ពស់ ហើយខ្លួនឯងក៏ខូចខាតខ្ទេចដែរ។ លោក បន្តថា ជនរងគ្រោះខាងរថយន្តហាយឡែនឌ័រ រួមមាន ៖ ១- សឿន សាមឿន ភេទប្រុស រងរបួសធ្ងន់ លំនៅក្រុងប៉ោយប៉ែត ។ ២- ឈ្មោះ អៀង សារិន ភេទស្រី ចំណាស់ បានស្លាប់។ ៣- ដើង ភេទស្រី ស្លាប់ ។ ៤-ឈ្មោះ ពេជ្រ ចារ៉ាត់ ភេទប្រុស អាយុ១០ឆ្នាំ បានស្លាប់។ ៤- លោកហ៊ុយ ឆៀរ ភេទប្រុសរបួសធ្ងន់ ។ ៥-ឈ្មោះ ពេជ្រ ចារិទ្ធិ ភេទប្រុសអាយុ១ខួបកន្លះ របួសធ្ងន់។
ជនរងគ្រោះទាំងខាងលើ មានលំនៅភូមិ/ឃុំចម្ការហ្លួង ស្រុកស្រែអំបិល ខេត្តកោះកុង។ លោកបន្តថា ៖ ចំណែកខាងរថយន្តកាមរី អ្នកបើកបរនិងអ្នករួមដំណើរមិនទាន់ក្តាប់បានអត្តសញ្ញាណនៅឡើយទេ ក៏រត់គេចខ្លួនបាត់។
លោក ញាន ឡាញ់ មេបញ្ជាការរងនគរបាលការពារព្រំដែនគោលវរសេនាតូចលេខ៨០៧ អោយដឹងថា ៖ សមត្ថកិច្ចនគរបាលនិងអ្នកស្រុកបានខិតខំសង្គ្រោះជនរងគ្រោះនាំទៅកាន់មន្ទីរពេទ្យ ហើយសពរង់ចាំសាច់ញាតិមកទទួលយកទៅធ្វើបុណ្យតាមប្រពៃណី៕ ដោយ ៖ បន្ទាយ