បន្ទាយមានជ័យ ៖ ក្រុមប្រាសាទនៅតំបន់បន្ទាយឆ្មារទទួលបានការជួសជុល, សង្គ្រោះនិងធ្វើផ្លូវចូលជាបន្តបន្ទាប់ពីសប្បុរសជនឯកជននិងពីរដ្ឋ ។ ប៉ុន្តែមិនមានមូលនិធីពីអង្គការ សមាគមក្រៅរដ្ឋាភិបាលឬដៃគូអភិវឌ្ឍន៍ដូចមុនទេ។
លោក ហន រិដ្ឋា អនុប្រធាននាយកដ្ឋានគាំពារនិងអភិរក្សសំណង់បុរាណ នៃក្រសួងវប្បធម៍និងវិចិត្រសិល្បៈ បានប្រាប់ឲ្យដឹងនៅថ្ងៃទី២៥ ខែមីនា ថា ៖ កន្លងមកដំណើរការអភិរក្ស និងអភិវឌ្ឍន៍ប្រាសាទមានការជួសជុល ថែទាំ សង្គ្រោះ សម្អាតស្មៅ ព្រៃ … នៅប្រាសាទនានា យើងមានមូលនិធិពីប្រទេសជាមិត្ត មូលនិធិពហុភាគី ឯកតោភាគី ពីដៃគូអភិវឌ្ឍន៍មានអង្គការ សមគមនានាជាច្រើន។
ប៉ុន្តែ មួយរយ:ចុងក្រោយនេះ ពុំមានទៀតទេ។ មានតែសប្បុរសជនឯកជនដូចជា លោកស្រី ម៉ៅ ម៉ាល័យ កែ គឹមយ៉ាន បានជួយថវិកានិងកម្លាំងរបស់មន្ត្រីរាជការ កងកម្លាំង មហាជនយ៉ាងច្រើនសន្ធឹកលើការជួសជុលប្រាសាទបន្ទាយឆ្មារ និងការកាប់ឆ្ការព្រៃ ស្មៅបន្លារ ស្តារពើក (ល្បាប់ភក់) នៅទីនោះ។
ហើយថ្មីៗនេះ បានសម្រួលថ្ម និងជួសជុល អភិវឌ្ឍន៍និងអភិរក្សត្រង់រូបអវតារលោកិស្វរ: បានសហការនឹងក្រុមការងា រនៃនាយកដ្ឋានគាំពារនិងអភិរក្សសំណង់បុរាណនៃក្រសួងវប្បធម៍និងវិចិត្រសិល្ប: ជួសជុលរោងទងខាងត្បូងឈៀងខាងលិចជាប់នឹងជញ្ជាំងមានរូបចម្លាក់អវតាលោកិស្វរះ ។ ក្នុងនោះ លោកជំទាវ ក៏បានទិញថ្មបាយក្រៀមថ្មីជាច្រើនដុំសម្រាប់បម្រើអោយការងារជួសជុលនេះដែរ។
ជាងនេះទៅទៀត ឥឡូវនេះ លោកស្រីក៏នឹងជួយកសាងបន្ទប់ទឹកនិងបង្គន់ថ្មស្តង់ដារចំនួន៨បន្ទប់ថែមទៀតផងដែរ ។ លោកបន្តថា ៖ ក្នុងនាមក្រសួងវប្បធម៍និងវិចិត្រសិល្ប: លោកសូមឯកភាព ថ្លែងអំណរគុណនិងកោតសរសើរចំពោះសន្តានចិត្តសប្បុរសនេះរបស់លោកស្រីម៉ៅ ម៉ាល័យ កែ គឹមយ៉ាន ។
លោក និយាយដែរថា ៖ ចំណែកថវិការដ្ឋវិញ តាមរយ:ក្រសួងវប្បធម៌និងវិចិត្រសិល្ប: និងពីថវិកាលក់សំបុត្រជូនភ្ញៀវទេសចរបរទេសចូលប្រាសាទតំបន់អង្គរ បានយកទៅប្រើប្រាស់សម្រាប់សង្គ្រោះ ទល់ទ្រ បង់លេខដុំថ្មចម្លាក់នានា។ ដូចជាប្រាសាទបន្ទាយឆ្មារនៅឃុំបន្ទាយឆ្មារ, ប្រាសាទបន្ទាយទ័ព ក្នុងស្រុកថ្មពួកខេត្តបន្ទាយមានជ័យ ក៏ទទួលបានគម្រោងនេះដែរ ។
ចំណែកលោក ម៉ៅ ស៊ី ប្រធានសហគមន៍ទេសចរណ៍ប្រាសាទបន្ទាយឆ្មារប្រាប់ថ្ងៃទី២៥មីនាថា ៖ មួយរយះចុងក្រោយនេះ ក្រុមប្រាសាទនៅតំបន់បន្ទាយឆ្មារបានទទួលការជួសជុល សម្រួលថ្ម សម្អាតព្រៃ បរិស្ថាន អនាម័យ ធ្វើផ្លូវចូល ស្តារពើកក្នុងកស្សិណ ដាក់ភ្លើងបំភ្លឺ។ល។
លោកបន្តថា ៖ ក្នុងនោះក្រុមករងារនៃប្រាសាទបន្ទាយឆ្មារ នៅឃុំបន្ទាយឆ្មារ ក្នុងឆ្នាំ២០១៧-២០១៨ ទទួលបានថវិការាប់ម៉ឺនដុល្លារ ពីលោកស្រី ម៉ៅ ម៉ាល័យ កែ គឹមយ៉ាន និងកម្លាំងចម្រុះចូលរួមជួយសម្រាប់ប្រើប្រាស់ក្នុងគម្រោងការសម្អាតពើកត្រឹមនៅកស្សិណប្រាសាទ , កាប់ឆ្ការ សម្អាត សម្រួលព្រៃ ស្មៅ បន្លា, កសាងផ្លូវខាងក្នុងប្រាសាទនិងផ្លូវព័ទ្ធជុំវិញកស្សិណខាងក្រៅទំហំរាប់មឹុនម៉ែត្រ ក្រឡា។ ក៏បានរៀបសម្រួលដុំថ្មជាផ្លូវជូនភ្ញៀវ នៅត្រង់កន្លែងឡើងមើលចម្លាក់ឬថ្មប្រាសាទ។ បានជួយដាំនិងប៉ភ្លឺភ្លើងសូឡា ១១១ដើម។ បានជួសជុលផ្លូវចូលក្នុង។
ក្រៅពីនោះ លោកស្រីម៉ៅ ម៉ាល័យ កែ គឹមយ៉ាន ក៏ផ្តល់ថវិកាដល់សម្រាប់ជួសជុល កសាងថ្មីនូវ ផ្លូវក្រាលដីនិងក្រាលគ្រួសចូលប្រាសាទរណបជុំវិញប្រាសាទបន្ទាយឆ្មារគឺ ១-ប្រាសាទសំណាងតាសុខ, ប្រាសាទចិញ្ចឹមត្រី ប្រាសាទយាយជូ ប្រាសាទយាយគុំ ប្រាសាទតាណែម ប្រាសាទតាប្លាំង ប្រាសាទតាអ៊ឹម ប្រាសាទតាព្រហ្ម ។
ពោលគឺកន្លងមក ផ្លូវចូលប្រាសាទទាំងនោះ ជាផ្លូវរទេះ ផ្លូវថ្មើរព្រៃ ហើយជាទូទៅមិនអាចធ្វើដំណើរបានឡើយនៅរដូវវស្សា ហើយ ឥឡូវនេះ ក្រុមការងារសហភាពសហព័ន្ធកម្ពុជា (សសយក) ខេត្តបន្ទាយមានជ័យ ក៏បាននឹងកំពុងរៀបបណ្តាញភ្លើងអគ្គីសនីជុំវិញផ្លូវនៃប្រាសាទផងដែរ៕ ដោយ ៖ បន្ទាយ