ភ្នំពេញ ៖ ស្ត្រីជនជាតិឥណ្ឌូណេស៊ីម្នាក់ត្រូវបានជនជាត់អាមេរិកកាំងច្របាច់កសម្លាប់រហូតធំក្លិនស្អុយទើបដឹងបង្កជាការភ្ញាក់ផ្អើលដល់ភ្ញៀវដែលចូលទៅស្នាក់នៅក្នុងសណ្ឋាគារនិងប្រជាពលរដ្ឋរស់នៅជិតខាង។
ហេតុការណ៍នេះបានបង្កអោយមានការភ្ញាក់ផ្អើលឡើងកាលពីវេលាម៉ោង៤រសៀលថ្ងៃអាទិត្យ ៩កើត ខែចេត្រ ឆ្នាំរកា នព្វស័ក ព.ស២៥៦១ ត្រូវនឹងថ្ងៃទី២៥ ខែមីនា ឆ្នាំ២០១៨ ស្ថិតនៅក្នុងបន្ទប់លេខ៤០៨ ជាន់ទី៤ នៃសណ្ឋាគារហូម ថោនទីតាំងលេខ៣៥អឺ០ ផ្លូវលេខ១៧២ ក្រុម១៩ ភូមិ៥ សង្កាត់ជ័យជំនះ ខណ្ឌដូនពេញ ។
មន្ត្រីមានសមត្ថកិច្ចបានអោយដឹងថា សាកសពស្ត្រីរងគ្រោះឈ្មោះ ENEN CAHYTI អាយុ៤៨ឆ្នាំ ជនជាតិឥណ្ឌូណេស៊ី កាន់អត្តសញ្ញាប័ណ្ណ NIK ៣១៧៤០៩៥២០៩ ៧០០០១៧,ប័ណ្ណពិនិត្យសុខភាពរបស់ឈ្មោះ ENEN CAHYTI ចំនួនមួយសន្លឹកនិងកាតអេធីអឹម ចំនួន៣ ស្នាក់នៅទីតាំងកើតហេតុខាងលើ ។
ចំណែកជនសង្ស័យ ឈ្មោះ FATEEN BILAL ABDUL ភេទប្រុស ៦៧ឆ្នាំ ជនជាតិអាមេរិក កាន់លិខិតឆ្លងដែនលេខ ៥៦១៤៨០៦៦ ស្នាក់នៅជាមួយជនរងគ្រោះទីតាំងកើតហេតុខាងលើ (រត់គេចខ្លួនបាត់) ។
ប្រភពព័ត៌មានពីបុគ្គលិកសណ្ឋាគារម្នាក់ឈ្មោះស៊ាង ដារ៉ា ភេទប្រុស អាយុ២១ឆ្នាំ បានប្រាប់សមត្ថកិច្ចមូលដ្ឋានថា នៅថ្ងៃទី១៩ ខែមីនា ឆ្នាំ២០១៨ វេលាម៉ោង៧ព្រឹកមានជនបរទេស២នាក់(ស្ត្រីរងគ្រោះនិងជនសង្ស័យ) ដោយប្រុស ឈ្មោះ FATEEN BILAL ABDUL ភេទប្រុស ៦៧ឆ្នាំ ជនជាតិអាមេរិក កាន់លិខិតឆ្លងដែនលេខ ៥៦១៤៨០៦៦ និងស្ត្រីរងគ្រោះ បានមកជួលស្នាក់នៅទីតាំងកើតហេតុខាងលើ ។ ហើយម្ចាស់សណ្ឋាគារបានហ្វូតូកូពីតែលិខិតឆ្លងដែនលេខ របស់ជនសង្ស័យទុក ហើយជនសង្ស័យក៏មិនដែលហូបអាហារក្នុងសណ្ឋាគារទេ គឺចេញទៅខាងក្រៅរហូត ។លុះនៅថ្ងៃកើតហេតុខាងលើវេលាម៉ោង៤រសៀល បុគ្គលិកសណ្ឋាគារឈ្មោះ ស៊ឹម ហេង ភេទប្រុសបានចុះពីលើមកដល់ជាន់ទី៤ ស្រាប់តែធុំក្លិនស្អុយចេញពីបន្ទប់លេខ៤០៨ ហើយប្រអប់សោរខាងក្រៅឃើញមានគ្របគំរបដែកពីលើ និងចាក់សោរថ្មីពីលើសោរទា្វររបស់សណ្ឋាគារមិនឲ្យចាក់កើត រួចក៏នាំគ្នាគាស់មើលទើបដឹងថា មានមនុស្សស្លាប់ឡើងជះក្លិនស្អុយ ហើយក៏រាយការណ៍ប្រាប់ទៅសមត្ថកិច្ចមូលដ្ឋានតែម្តង ។
ប្រភពព័ត៌មានបានបន្តថាក្រោយពេលមានហេតុការណ៍ដូច្នេះសមត្ថកិច្ចមូលដ្ឋានសហការជាមួយសមត្ថកិច្ចជំនាញខាងកោសល្យវិច្ឆ័យរាជធានីភ្នំពេញ ធ្វើការត្រួតពិនិត្យ ដោយយោងតាមការសន្និដ្ឋានរបស់លោកវេជ្ជបណ្ឌិត នង សុវណ្ណរ័ត្ន គ្រូពេទ្យសាលាដំបូងរាជធានីភ្នំពេញថា ជនរងគ្រោះស្លាប់ដោយសារការច្របាច់ក បច្ចុប្បន្នសពត្រូវបានសមត្ថកិច្ចយកទៅតម្តល់ទុកនៅវត្តស្ទឹងមានជ័យ៕ ដោយ ៖ បញ្ញាស័ក្តិ