ភ្នំពេញ ៖ មណ្ឌលសុខភាពចំនួន ៥ ទទួលបានការវាយតម្លៃជាប់ចំណាត់ថ្នាក់ជាតិពីលេខ១-៥ និងមណ្ឌលសុខភាពចំនួន ១៧ ទទួលបានការវាយតម្លៃជាប់ចំណាត់ថ្នាក់ខេត្តលេខ១សម្រាប់ខេត្តនីមួយៗ។
សន្និបាតសុខាភិបាលលើកទី៣៩ បានដំណើរការបើកនៅព្រឹកថ្ងៃទី២៦ខែមីនាឆ្នាំ២០១៨ក្រោមអធិបតីភាពលោកសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល ដោយមានការអញ្ជើញចូលរួមពីសំណាក់ ថ្នាក់ដឹកនាំក្រសួង អភិបាល-រងនៃរាជធានី-ខេត្តទាំង២៥ មន្ត្រីសុខាភិបាលជាន់ខ្ពស់និងមន្ត្រីតាមនាយកដ្ឋាននៃក្រសួងសុខាភិបាល លោក-លោកស្រីប្រធានមន្ទីរសុខាភិបាលខេត្តទាំង២៥ មន្ត្រី-បុគ្គលិកសុខាភិបាលនៅតាមមណ្ឌលសុខភាពដែលទទួលបានការលើកសរសើរនិងរង្វាន់មកពីខេត្តទាំង២៥ និងតំណាងមកពីបណ្តាមន្ទីរ-ក្រសួងនានា សរុបមានចំនួន៥១៥នាក់។
ថ្លែងក្នុងឱកាសដ៏វិសេសវិសាលនេះ លោករដ្ឋមន្ត្រីក្រសួងសុខាភិបាលបានថ្លែងកោតសរសើរដល់ការខិតខំប្រឹងប្រែងក្នុងការកែលម្អគុណភាពសេវានៅតាមមូលដ្ឋានសុខាភិបាលសាធារណៈទាំងអស់ ជាពិសេសសូមចូលរួមអបអរសាទរចំពោះជ័យលាភីថ្នាក់ជាតិលំដាប់ថ្នាក់លេខ១-៥ និងលេខ១ថ្នាក់ខេត្តចំនួន១៧ខេត្តដែលបានចូលរួមកែលម្អគុណភាពសេវានៅមណ្ឌលសុខភាពបានល្អប្រសើរ។ លោករដ្ឋមន្ត្រីក៏បានក្រើនរំលឹកឲ្យបន្តការយកចិត្តទុកដាក់លើកកម្ពស់គុណភាពសេវា អនុវត្តក្រមសីលធ៌មវិជ្ជាជីវ:ត្រឹមត្រូវ បម្រើប្រជាជនឲ្យបានល្អ ជាពិសេសព្យាយាមអនុវត្តគោលនយោបាយរបស់សម្តេចតេជោនាយករដ្ឋមន្ត្រីសម្រាប់កម្មករ-ការិនី ទាំងក្នុងនិងក្រៅប្រព័ន្ធ ព្រមទាំងមន្ត្រីសាធារណៈ អតីតយុទ្ធជន និវត្តន៍ជន ជនចាស់ជរាគ្មានទីពឹង និងជនក្រីក្រ ដោយរដ្ឋជាអ្នកចេញថ្លៃជួស តាមរយ:កម្មវិធី ប.ស.ស. និងមូលនិធិសមធ៌ម។ លោករដ្ឋមន្ត្រីក៏បានផ្តល់កិត្តិយសជូនពានរង្វាន់ ប័ណ្ណសរសើរ និងរង្វាន់ជាទូរទស្សន៍ជូនដល់ជ័យលាភីមានដូចខាងក្រោមនេះ។
លោស្រីវេជ្ជបណ្ឌិត ឱ វណ្ណឌីន អគ្គនាយកបច្ចេកទេសសុខាភិបាល និងជាអ្នកនាំពាក្យក្រសួងសុខាភិបាលនៃព្រះរាជាណាចក្រកម្ពុជា បានបញ្ជាក់ថា មណ្ឌលសុខភាពដែលទទួលបាននូវការលើកសរសើរនិងរង្វាន់មានដូចខាងក្រោមនេះ ៖
ក. ចំណាត់ថ្នាក់ជាតិ ៖
១. លេខ១ គឺមណ្ឌលសុខភាព ចារឈូក ស្រុកអង្គរជុំ ខេត្តសៀមរាប ទទួលបានពានរង្វាន់ ប័ណ្ណសរសើរ និងទូរទស្សន៌១គ្រឿង
២. លេខ២ គឺមណ្ឌលសុខភាព បួរ ស្រុកសំពៅលូន ខេត្តបាត់ដំបង ទទួលបានប័ណ្ណសរសើរ និងទូរទស្សន៍១គ្រឿង
៣. លេខ៣ គឺមណ្ឌលសុខភាព ភិចុង ស្រុកបរកែវ ខេត្តរតនគីរី ទទួលបានប័ណ្ណសរសើរ និងទូរទស្សន៍១គ្រឿង
៤. លេខ៤ គឺមណ្ឌលសុខភាព បឹងបត់កណ្តោល ស្រុកបាកាន ខេត្តពោធិសាត់ ទទួលបានប័ណ្ណសរសើរ និងទូរទស្សន៍១គ្រឿង
៥. លេខ៥ គឺមណ្ឌលសុខភាព ព្រៃព្នៅ ស្រុកពារាំង ខេត្តព្រៃវែង ទទួលបានប័ណ្ណសរសើរ និងទូរទស្សន៍១គ្រឿង ។
ខ. ចំណាត់ថ្នាក់ខេត្តដែលទទួលបានលេខ១ក្នុងខេត្ត ទទួលបានប័ណ្ណសរសើរ គឺ៖
១. មណ្ឌលសុខភាព ចក្រីទីង ស្រុកកំពត ខេត្តកំពត
២. មណ្ឌលសុខភាព ផ្អាវ ស្រុកអន្លង់វែង ខេត្តឧត្តរមានជ័យ
៣. មណ្ឌលសុខភាព ស្អាង ស្រុកត្បែងមានជ័យ ខេត្តព្រះវិហារ
៤. មណ្ឌលសុខភាព សែប ស្រុកកំពង់ត្រឡាច ខេត្តកញពង់ឆ្នាំង
៥. មណ្ឌលសុខភាព គោគងួន ស្រុកកំពង់ធំ ខេត្តកំពង់ធំ
៦. មណ្ឌលសុខភាព សំបួរ ស្រុកដូនកែវ ខេត្តតាកែវ
៧. មណ្ឌលសុខភាព ស្លា ស្រុកមេមត់ ខេត្តត្បូងឃ្មុំ
៨. មណ្ឌលសុខភាព ស្វាយមាស ស្រុកចំការលើ ខេត្តកំពង់ចាម
៩. មណ្ឌលសុខភាព បុស្បូវ ស្រុកព្រះនេត្រព្រះ ខេត្តបន្ទាយមានជ័យ
១០. មណ្ឌលសុខភាព ស្រែក្រសាំង ស្រុកស្ទឹងត្រែង ខេត្តស្ទឹងត្រែង
១១. មណ្ឌលសុខភាព អូរច្រា ស្រុកប៉ៃលិន ខេត្តប៉ៃលិន
១២. មណ្ឌលសុខភាព វាលអង្គពពេល ស្រុកគងពិសី ខេត្តកំពង់ស្ពឺ
១៣. មណ្ឌលសុខភាព ក្រង់តេះ សែនមនោរម្យ ខេត្តមណ្ឌលគីរី
១៤. មណ្ឌលសុខភាព ដូង ស្រុករមាសហែក ខេត្តស្វាយរៀង
១៥. មណ្ឌលសុខភាព ចំបក់ ស្រុកឆ្លូង ខេត្តក្រចេះ
១៦. មណ្ឌលសុខភាព អូរក្រសារ ស្រុកកែប ខេត្តកែប
១៧. មណ្ឌលសុខភាព ទឹកថ្លា ខណ្ឌសែនសុខ រាជធានីភ្នំពេញ។
ខេត្ត ៣ ដែលបានស្នើសុំមិនចូលរួមក្នុងការប្រឡងប្រណាំង គឺ ខេត្តព្រះសីហនុ ខេត្តកោះកុង និងខេត្តកណ្តាល ៕ ដោយ ៖ បញ្ញាស័ក្តិ
