ខេត្តព្រះសីហនុ ៖ ឪពុកកុមារីរងគ្រោះលើករណីរំលោភផ្លូវភេទ ដែលជនល្មើសជាអតីតមន្ត្រីនគរបាលនៃស្នងការដ្ឋានខេត្តព្រះសីហនុ ឈ្មោះ កង សុផាត ចាប់រំលោភ បានអះអាងថា កូនស្រីគាត់ ត្រូវជនល្មើសខាងលើចាប់រំលោភពេលទើបមានអាយុ ១១ឆ្នាំ។ អាណាព្យាបាលរូបនេះ ឲ្យដឹងថា គិតមកដល់ពេលនេះមានរយៈពេលជាង ៨ឆ្នាំហើយ ប៉ុន្តែសមត្ថកិច្ចពាក់ព័ន្ធ នៅមិនទាន់ចាប់បានជនល្មើសយកមកផ្តន្ទាទោស ដើម្បីផ្តល់យុត្តិធ៌មជូនគ្រួសារគាត់នៅឡើយទេ។
ផ្តើមពីបញ្ហានេះ ឪពុកកុមារីរងគ្រោះ គឺលោក យ៉ុង ប៊ុនលី មានទីលំនៅក្នុងក្រុងព្រះសីហនុ បានសំណូមពរដល់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និង សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ជាភរិយា ជួយស្វែងរកយុត្តិធម៌ ជាពិសេសជួយអន្តរាគមន៍ទៅថ្នាក់ដឹកនាំស្ថាប័នពាក់ព័ន្ធក្រោមឱវាទ ឲ្យជួយតាមចាប់ជនល្មើសមកផ្តន្ទាទោសតាមច្បាប់។ ជាងនេះទៀត ក៏បានស្នើឲ្យជួយរឹបអូសយកទ្រព្យសម្បត្តិមានដូចជា ៖ ផ្ទះ និងដីធ្លីជាដើម របស់ជនល្មើសឈ្មោះ កង សុផាត ដើម្បីយកមកសំណងជំងឺចិត្តចំនួន ៤០លានរៀល ឲ្យស្របតាមសាលដីកាស្ថាពរ របស់តុលាការកំពូល បានកាត់ក្តីផ្តល់ជូនគ្រួសារលោក។
ឪពុកកុមារីរងគ្រោះ លោក យ៉ុង ប៊ុនលី បានផ្តល់សម្ភាសដល់អ្នកយកព័ត៌មានគេហទំព័រ CEN.COM.KH ប្រចាំខេត្តព្រះសីហនុ កាលពីព្រឹកថ្ងៃចន្ទ ទី២៦ ខែមីនា ឆ្នាំ២០១៨ថា រូបគាត់ក៏ដូចជាកូនស្រី បានទន្ទឹងរង់ចាំយុត្តិធម៌អស់រយៈពេលជាង៨ឆ្នាំមកហើយ នៅឡើយមិនទាន់ទទួលបានយុត្តិធ៌មទេ ហើយជនល្មើសនៅមានសេរីភាពដើរហើរក្រៅសំណាញ់ច្បាប់នៅឡើយ។
អាណាព្យាបាលរូបនេះ បានឲ្យដឹងថា កូនស្រីគាត់ដែលកាលណោះទើបមានអាយុ ១១ឆ្នាំ ត្រូវឈ្មោះ កង សុផាត ជាអតីតមន្ត្រីនគរបាល នៃស្នងការដ្ឋាននគរបាលខេត្តព្រះសីហនុ ចាប់រំលោភ កាលពីថ្ងៃទី១៥ ខែសីហា ឆ្នាំ២០១០។ លោកថា គិតមកដល់ថ្ងៃទី២៦ ខែមីនា ឆ្នាំ២០១៨ ជនល្មើសនៅមានសេរីភាពក្រៅសំណាញ់ច្បាប់នៅឡើយទេ ទោះបីតុលាការកំពូល សម្រេចសាលដីកាកាលពីថ្ងៃទី១៧ ខែតុលា ឆ្នាំ២០១៦ ឲ្យជនល្មើសឈ្មោះ កង សុផាត ជាប់គុគ ៥ឆ្នាំ និងពិន័យប្រាក់ ៤០លានរៀលបែបណាក្តី។
ឪពុកកុមារីរងគ្រោះដែលមានសម្បុរខ្មៅ និងរាងកាយស្គមស្គាំង បានលើកដៃសំពះអំពាវនាវដល់ សម្តេចនាយករដ្ឋមន្ត្រី ហ៊ុន សែន និងសម្តេច ប៊ុន រ៉ានី ព្រមទាំងស្ថាប័នអនុវត្តច្បាប់ពាក់ព័ន្ធ ឲ្យជួយអន្តរាគមន៍ទៅស្ថាប័នជំនាញពាក់ព័ន្ធ ឲ្យតាមចាប់ជនល្មើសមកដាក់ពន្ធនាគារ និងជួយរឹបអូសទ្រព្យសម្បត្តិជនល្មើសមានផ្ទះ និងដីធ្លីជាដើម ដើម្បីផ្តល់សំណងជំងឺចិត្តជូនកូនស្រីគាត់ដោយអនុគ្រោះផង។
លោក យ៉ុង ប៊ុនលី ក៏បានសំណូមពរដល់ ឯកឧត្តម ឱម យ៉ិនទៀង ប្រធានអង្គភាពប្រឆាំងអំពើពុករលួយ និងសម្តេចក្រឡាហោម ស ខេង រដ្ឋមន្ត្រីក្រសួងមហាផ្ទៃ ពិសេសសម្តេចនាយករដ្ឋមន្ត្រី ហ៊ុន សែន ឲ្យជួយបើកការស៊ើបអង្កេតវែករកមុខបុគ្គលជាប់ពាក់ព័ន្ធ ឬអ្នកជួយរត់ការឲ្យជនល្មើសឈ្មោះ កង សុផាត ឲ្យរួចផុតពីការឃុំខ្លួននៅក្នុងអំឡុងពេលកម្លាំងកងរាជអាវុធហត្ថខេត្តព្រះសីហនុ ចាប់បញ្ជូនខ្លួនជនល្មើសរូបនេះ ទៅកាន់សាលាដំបូងខេត្តព្រះសីហនុ ប៉ុន្តែត្រូវបានដោះលែងឲ្យមានសេរីភាពវិញ។
សំណុំរឿងនេះ មន្ត្រីអង្គការការពារសិទ្ធិមនុស្សប្រចាំខេត្តព្រះសីហនុ មានអង្គការលីកាដូ (LICADHO) និងសមាគមអាដហុក (ADHOC) ជាដើម មានចម្ងល់ថា បទល្មើសព្រហ្មទណ្ឌរំលោភផ្លូវភេទអនីតិជនមួយករណីនេះ ហេតុអ្វីបានជាសាលាដំបូងខេត្តព្រះសីហនុ អាចអនុញ្ញាតឲ្យជនល្មើសឈ្មោះ កង សុផាត រួចផុតពីការផ្ដន្ទាទោស និងរស់នៅក្រៅមន្ទីរឃុំឃាំងបានទៅវិញ ព្រោះជនល្មើសរូបនេះត្រូវកម្លាំងសមត្ថកិច្ចចាប់បញ្ជូនខ្លួនមកបង្ហាញខ្លួននៅចំពោះមុខសាលាដំបូង កាលពីឆ្នាំ ២០១០ ទៅហើយនោះ។
ទាក់ទិនបញ្ហានេះ អ្នកស្រី ជាប សុធារី អ្នកសម្របសម្រួលសមាគមអាដហុក (ADHOC) ប្រចាំខេត្តព្រះសីហនុ មានមន្ទិលថា ទំនងជាសំណុំរឿងនេះ អាចមានជាប់ពាក់ព័ន្ធមានអ្នករត់ការ ឈានដល់ផ្តល់សំណូកពុករលួយនៅប្រព័ន្ធតុលាការក្នុងអំឡុងពេលនោះ គឺកាលពីឆ្នាំ២០១០ ក៏ថាបាន ទើបជនល្មើសឈ្មោះ កង សុផាត មិនត្រូវបានសាលាដំបូងខេត្តព្រះសីហនុ ចាប់ឃុំខ្លួន។
អ្នកស្រី ជាប សុធារី ចាត់ទុកដំណើរការក្តីរឿងព្រហ្មទណ្ឌរំលោភផ្លូវភេទអនីតិជនមួយករណីនេះ ថាមានភាពអយុត្តិធម៌ ចំពោះកុមារីរងគ្រោះបំផុត ហើយក៏ជាសំណុំរឿងក្តីមួយក្នុងចំណោមសំណុំរឿងអយុត្តិធម៌ច្រើនទៀត ដែលសាធារណៈរិះគន់ និងចោទប្រព័ន្ធតុលាការនៅខេត្តព្រះសីហនុ កាលណោះថា មិនមានឯករាជ្យ ពុករលួយ និងកាត់ក្តីមិនយុត្តិធម៌ជាដើម។
បញ្ហានេះដែរ កាលពីឆ្នាំ២០១៦ ក្រសួងមហាផ្ទៃ បានសម្រេចអនុវត្តវិន័យចំពោះអនុសេនីយ៍ទោ កង សុផាត មានតួនាទីនាយរងផ្នែកព័ត៌មានលើវិស័យសេដ្ឋកិច្ច វប្បធម៌ អប់រំ និងសង្គម នៃការិយាល័យសន្តិសុខផ្ទៃក្នុង ចំណុះស្នងការដ្ឋាននគរបាលខេត្តព្រះសីហនុ ដោយដកហូតមុខតំណែង ឋានន្តរស័ក្តិ និងបណ្ដេញផុតចេញពីក្របខ័ណ្ឌមន្ត្រីនគរបាលជាតិ។
ឯកសារច្បាប់មួយចំនួនបង្ហាញថា សំណុំរឿងព្រហ្មទណ្ឌរំលោភសេពសន្ថវៈអនីតិជន ប្រព្រឹត្តនៅក្រុងព្រះសីហនុ កាលពីថ្ងៃទី១៥ ខែសីហា ឆ្នាំ២០១០។ តុលាការកំពូល បានប្រកាសសាលក្រមកាត់ឲ្យជនត្រូវចោទឈ្មោះ កង សុផាត ជាអតីតមន្ត្រីនគរបាលនៃស្នង ការដ្ឋាននគរបាលខេត្តព្រះសីហនុ មានទោសជាប់ពន្ធនាគាររយៈពេល ៥ឆ្នាំ និងពិន័យប្រាក់ ៤០លានរៀល ទៅឲ្យកុមារីរងគ្រោះ។
ចំណែក តំណាងអយ្យការអមសាលាដំបូងខេត្តព្រះសីហនុ លោក ហួត វិចិត្រ កាលពីថ្ងៃទី២៣ ខែវិច្ឆិកា ឆ្នាំ២០១៦ ក៏បានចេញដីកាបង្គាប់មន្ត្រីនគរបាលយុត្តិធម៌ឲ្យតាមចាប់ខ្លួនឈ្មោះ កង សុផាត យកមកឃុំខ្លួនក្នុងពន្ធនាគារខេត្តព្រះសីហនុ ពីបទរំលោភសេពសន្ថវៈដែលជាបទល្មើសព្រហ្មទណ្ឌ មានចែងឲ្យផ្ដន្ទាទោសតាមបញ្ញត្តិមាត្រា៥ នៃច្បាប់ស្ដីពីស្ថានទម្ងន់ទោសនៃបទឧក្រិដ្ឋ។
ដីកាបង្គាប់ឲ្យចាប់ខ្លួនឈ្មោះ កង សុផាត បានបង្ហាញថា សាលដីកាព្រហ្មទណ្ឌលេខ៣៦៤ ចុះថ្ងៃទី១៧ ខែតុលា ឆ្នាំ២០១៦ របស់តុលាការកំពូល បានចូលជាស្ថាពររួចហើយ ក៏ប៉ុន្តែមកទល់ពេលនេះ ជនល្មើសរស់នៅសុខស្រួលធម្មតា ដែលបញ្ហានេះ ក្រុមមន្ត្រីសិទ្ធិមនុស្សចាត់ទុកថា វប្បធម៌និទ្ទណ្ឌភាព ឬភាពគ្មានទោសពៃរ៍នៅតែកើតមាននៅក្នុងសង្គមកម្ពុជា។
ដោយឡែក លោក ជួន ណារិន្ទ ស្នងការនគរបាលខេត្តព្រះសីហនុ ធ្លាប់មានប្រសាសន៍ថា រាល់ថ្ងៃនេះ ជនល្មើសឈ្មោះ កង សុផាត ដែលជាអតីតជាមន្ត្រីនគរបាលខេត្តនេះ មិនមានវត្តមាននៅក្នុងខេត្តព្រះសីហនុទៀតទេ ហើយកម្លាំងជំនាញស្ថាប័នលោកបានបន្តឃ្លាំមើល និងចុះស្រាវជ្រាវមុខសញ្ញានេះដោយយកចិត្តទុកដាក់ ព្រោះមានដីកាឲ្យនាំខ្លួន ឃុំខ្លួនជនល្មើសឈ្មោះ កង សុផាត ពីតុលាការលើសំណុំរឿងនេះរួចហើយ។
លោក ជួន ណារិន្ទ សង្កត់ធ្ងន់ថា កម្លាំងជំនាញរបស់លោក បានតាមដាន និងស្រាវជ្រាវរកចាប់ខ្លួនជនល្មើសឈ្មោះ កង សុផាត ជាប្រចាំ តាមសាលក្រមតុលាការកំពូល ដែលកាត់ទោសឲ្យជាប់ពន្ធនាគាររយៈពេល ៥ឆ្នាំ និងពិន័យជាប្រាក់ ៤០លានរៀល មិនធ្វេសប្រហែសនោះទេ៕ ដែន សីមា
