ខេត្តកំពង់ស្ពឺ ៖ សិក្ខាកាមអន្តរជាតិបានហ្វឹកហ្វឺនជំនាញបោសសម្អាតមីន និងកម្ទេចយុទ្ធភណ្ឌមិនទាន់ផ្ទុះ ថ្នាក់អាស៊ាន និងថ្នាក់តំបន់ ចំនួន១៨រូប មកពី៩ប្រទេស បានអនុវត្តជាក់ស្តែងនៃការកម្ទេចគ្រាប់។
ក្នុងពិធីកម្ទេចគ្រាប់ និងយុទ្ធភណ្ឌមិនទាន់ផ្ទុះ នៅសាលាហ្វឹកហ្វឺនកងកម្លាំងរក្សាសន្តិភាពពហុជាតិ ខេត្តកំពង់ស្ពឺ នា ថ្ងៃទី២៦ មីនា ឆ្នាំ២០១៨លោក ឧត្តមសេនីយ៍ឯក កែន សូសាវឿន អគ្គនាយករងមជ្ឈមណ្ឌលជាតិរក្សាសន្តិភាព តំណាងអោយ លោក នាយឧត្តមសេនីយ៍ សែម សុវណ្ណនី បានថ្លែងថា “ក្រោយពីសិក្ខាកាម អន្តរជាតិថ្នាក់អាស៊ាន និងថ្នាក់តំបន់ បានហ្វឹកហ្វឺន ២សប្តាហ៍កន្លងមកនេះ គឺពួកគាត់បានអនុវត្តជាក់ស្តែង ដោយធ្វើបានជោគជ័យនៃការកម្ទេចគ្រាប់មិនទាន់ផ្ទុះនេះ”។ លោក បន្តថា ការកម្ទេចគ្រាប់ថ្ងៃនេះ គឺបំផ្ទុះគ្រាប់ចំនួនបីរណ្តៅ ដែលមានគ្រាប់ ប្រភេទធន់ធ្ងន់ និងប្រភេទធន់ស្រាល ប្រមាណជិត១០០គ្រាប់។
លោក បញ្ជាក់ថា វគ្គហ្វឹកហ្វឺនគ្រូបង្គោលជំនាញបោសសម្អាតមីន ថ្នាក់អាស៊ាន និងតំបន់ គឺមានរយៈពេល១៩ថ្ងៃ ចាប់ផ្តើម ពីថ្ងៃទី១២ ដល់ថ្ងៃទី៣០ ខែមីនា ឆ្នាំ២០១៨ ដែលមានបំណងផ្តល់ការគាំទ្រប្រតិបត្តិការរក្សាសន្តិភាព អង្គការសហប្រជាជាតិ និងអនុវត្តតាមរូបមន្តរបស់ UNMAS និងបទពិសោធន៍ជាក់ស្តែង ដែលបានដកស្រង់ផ្ទាល់ពីតំបន់ បេសកកម្ម មកធ្វើសក្ខីកម្ម សម្រាប់អនុវត្តទាំងនៅក្នុង និងក្រៅប្រទេស”។
លោក កែន សូសាវឿន ថ្លែងថា សិក្ខាកាម១៨រូបមកពីចំនួន៩ប្រទេសនោះ រួមមាន កូឡំប៊ី ម៉ុងហ្គោលី ចិន ភូមា វៀតណាម ថៃ ម៉ាឡេស៊ី ឥណ្ឌូនេស៊ី និងហ្វីលីពីន ជាមួយគ្នាសិក្ខាកាមកម្លាំងមួកខៀវកម្ពុជាចំនួន១០រូបផងដែរដែលបានចូលរួមក្នុងវគ្គហ្វឺកហ្វឺននេះ ដែលសរុបចំនួន២៨ នាក់។ ចំពោះគ្រូត្រូវបង្ហាត់ គឺមានមកពី បារាំង អាមេរិក អង្គការសហប្រជាជាតិ អាជ្ញាធរមីនកម្ពុជា មជ្ឈមណ្ឌលតំបន់អាស៊ានសម្រាប់សកម្មភាពមីន គណៈកម្មាធិការកាកបាតក្រហមអន្តរជាតិ និងមជ្ឈមណ្ឌលជាតិរក្សាសន្តិភាព។
កាលពីពេលកន្លងទៅ លោក ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ ថ្លែងថា គ្រាប់មីននិងសំណល់ជាតិផ្ទុះពីសង្គ្រាម នៅតែជាបញ្ហាប្រឈមខ្ពស់ សម្រាប់បេសកកម្មអង្គការសហប្រជាជាតិ ប្រជាជនដែលរស់នៅតំបន់នោះ និងបណ្តាប្រទេសនានា ដែលបន្តមានជម្លោះប្រដាប់អាវុធ សម្បូរទៅដោយគ្រាប់កែច្នៃ ដែលឆក់យកអាយុជីវិត បង្ក ពិការភាព និងបង្អាក់ដល់ការអភិវឌ្ឍន៍ប្រទេស។ លោក បន្តថា វគ្គហ្វឹកហ្វឺននាពេលនេះ គឺពិតជានាំមកនូវពុទ្ធិថ្មីៗថែមទៀត សម្រាប់បង្កើននូវសមត្ថភាព ជូនដល់កម្លាំងមួកខៀវ ដែលមានជំនាញផ្នែកដោះមីននិងសំណល់សង្គ្រាម ក្នុងការសម្រេចបេសកកម្មទាំងថ្នាក់ជាតិ និងសហប្រជា ជាតិ៕ ដោយ ៖ បញ្ញាស័ក្តិ