សហរដ្ឋអាមេរិច និងសហភាពអឺរ៉ុបបានរួមដៃគ្នា បណ្តេញអ្នកការទូតរុស្ស៊ីជាច្រើននាក់ចេញ ដើម្បីរួមគ្នាឆ្លើយតបទៅនឹងសកម្មភាពបំពុលអតីតអ្នកស៊ើបការណ៍របស់អង់គ្លេស ដែលអង់គ្លេសសន្និដ្ឋានថា ប្រទេសរុស្ស៊ីជាអ្នកនៅពីក្រោយ។ នេះបើតាមការចេញផ្សាយរបស់ BBC នៅព្រឹកថ្ងៃអង្គារនេះ។
ប្រទេសជាង ២០បានចូលរួមជាមួយនឹងចក្រភពអង់គ្លេស ដោយបានធ្វើការបណ្តេញអ្នកកាទូតរុស្ស៊ីច្រើនជាង ១០០នាក់ចេញពីប្រទេស។
ចំណែកប្រទេសរុស្ស៊ីវិញ ប្តេជ្ញាថានឹងធ្វើការសងសឹកចំពោះទង្វើរបស់អាមេរិច និងប្រទេសអឺរ៉ុប។
ជាមួយគ្នានេះដែរ រុស្សីបានបដិសេធនា ខ្លួនជាប់ពាក់ព័ន្ធទៅនឹងការវាយប្រហារលើ អតីតអ្នកស៊ើបការណ៍ឲ្យអង់គ្លេស ដែលជាជនជាតិរុស្សី ឈ្មោះ Sergei Skripal និងកូនស្រីរបស់គាត់ឈ្មោះ Yulia។ អ្នកទាំងពីរត្រូវបានគេដាក់ថ្នាំបំពុល នៅក្នុងទឹកដីប្រទេសអង់គ្លេស ហើយបច្ចុប្បន្នកំពុងស្ថិតនៅក្នុងស្ថានភាពធ្ងន់ធ្ងរ ប៉ុន្តែស្ថានភាពស្ថិតក្នុងស្ថានភាពនឹងនរ នៅក្នុងមន្ទីរពេទ្យ។
មេដឹកនាំសហភាពអឺរ៉ុប កាលពីសប្តាហ៍មុន បានបញ្ជាក់ថា រុស្ស៊ីទំនងជាអ្នកនៅពីក្រោយការវាយប្រហារដោយថ្នាំបំពុលនោះ។
នាយករដ្ឋមន្ត្រីអង់គ្លេស អ្នកស្រី Theresa May បានថ្លែងថា “របបប្រធានាធិបតី ពូទីន កំពុងធ្វើសកម្មភាពឈ្លានពានប្រឆាំងនឹងតម្លៃ និងផលប្រយោជន៍រួមរបស់ពួកយើង”៕ សុភ័ក្ត្រ