រដ្ឋាភិបាលម៉ាឡេស៊ីបានស្នើច្បាប់ថ្មីមួយ ដើម្បីប្រឆាំងទៅនឹងការចេញផ្សាយព័ត៌មានមិនពិត ដោយអ្នកប្រព្រឹត្តអាចប្រឈមនឹងការជាប់ពន្ធធនាគាររហូតដល់ ១០ឆ្នាំ។ នេះបើតាមការចេញផ្សាយរបស់ BBC កាលពីថ្ងៃច័ន្ទម្សិលមិញនេះ។
បើតាមច្បាប់ប្រឆាំងនឹងព័ត៌មានក្លែងក្លាយ អ្នកធ្វើខុសអាចប្រឈមនឹងគុក ឬក៏ការផាកពិន័យចំនួន ១២៨.០០០ដុល្លាអាមេរិច ឬក៏ត្រូវជាប់គុកផង និងត្រូវផាកពិន័យផង។
ច្បាប់ថ្មីនេះកំពុងស្ថិតនៅក្នុងរដ្ឋសភាម៉ាឡេស៊ីកាលពីថ្ងៃច័ន្ទ។ ការស្នើច្បាប់នេះរបស់រដ្ឋាភិបាល បានកើតឡើងមុនពេលការបោះឆ្នោត ដែលនឹងចូលមកដល់ក្នុងរយៈពេលប៉ុន្មានសប្តាហ៍ខាងមុខនេះ។
អ្នករិះគន់បានហៅការស្នើច្បាប់ថ្មីរបស់រដ្ឋាភិបាលថា ជាការប៉ុនប៉ងដោយអាជ្ញាធរ ក្នុងការបង្ក្រាបទៅនឹងមតិផ្ទុយនឹងរដ្ឋាភិបាល។
បើតាមសេចក្តីស្នើច្បាប់ដដែល ពាក្យថាព័ត៌មានក្លែងក្លាយមានន័យថា ជាព័ត៌មាន ទិន្នន័យ និងរបាយការណ៍ ដែលមិនពិតទាំងស្រុង ឬមួយផ្នែក។
អ្នកសរសេរថ្លុក អ្នកប្រើប្រាស់បណ្តាញសង្គម… ក៏នឹងត្រូវប្រឈមនឹងច្បាប់នេះផងដែរ៕ សុភ័ក្ត្រ
