នេះជាខណៈពេលដ៏មហាសែនរន្ធត់មួយ ដែលស្ត្រីវ័យក្មេងម្នាក់ បានត្រូវផ្លោងលើអាកាស និងធ្លាក់ដេកស្តូកស្តឹងនៅលើដងផ្លូវ បន្ទាប់ពីនាងត្រូវបានរថយន្ត១គ្រឿងបើកលឿនដូចហោះ មកបុកពីក្រោយយ៉ាងពេញទំហឹងដ៏ខ្លាំងក្លា ខណៈនាងកំពុងឈប់រង់ចាំភ្លើងស្តុបនៅផ្លូវប្រសព្វដាច់ស្រយាលមួយកន្លែងនៃជាយក្រុងបាងកក ប្រទេសថៃ ។
យោងតាមប្រភពព័ត៌មានមួយរបស់ថៃ បានឲ្យដឹងថា ហេតុការណ៍គ្រោះថ្នាក់ចរាចរណ៍ដ៏សាហាវនេះ បានកើតឡើងនៅវេលាម៉ោង ២ និង ៣០ នាទី រសៀលថ្ងៃទី៣ ខែកុម្ភៈ ឆ្នាំ២០១៧ នៅពេលដែលនារីជិះម៉ូតូស្កូបពី១គ្រឿង កំពុងឈប់រង់ចាំភ្លើងស្តុប ធ្វើដំណើរទៅកាន់ផ្ទះរបស់នាង និងត្រូវរថយន្ត Nissan ទំនើប១គ្រឿងដែលបើកបោះពួយយ៉ាងលឿន មកបុកពីក្រោយយ៉ាងពេញទំហឹង ។
តាមរយៈវីដេអូឃ្លីប បានបង្ហាញឲ្យឃើញមនុស្សប្រុសៗ១ក្រុមឈប់ម៉ូតូឈរជជែកជុំៗគ្នា នៅចំណុចភ្លើងស្តុបនោះ ខណៈនារីរងគ្រោះក៏កំពុងឈប់រង់ចាំភ្លើងស្តុបក្បែរនោះផងដែរ ។ ប៉ុន្តែ ភ្លាមៗនោះ ស្រាប់តែរថយន្តបង្កខាងលើបានបើកបោះពួយយ៉ាងលឿន មកបុកពីក្រោយបណ្តាលឲ្យនាងហោះផ្លោងទៅលើលើអាកាសយ៉ាងសាហាវគួរឲ្យស្លុតរន្ធត់បំផុត ។ ខណៈពេលនោះ មួកសុវត្ថិភាព និងម៉ូតូរបស់នាង បានខ្ទាតចេញដាច់ដោយឡែកពីគ្នារាប់ម៉ែត្រ រីឯនាងបានធ្លាក់ទៅនឹងដីដេកស្តូកស្តឹង ដែលធ្វើឲ្យយើងឃើញហើយស្លុតរន្ធត់ គិតថានាងប្រាកដជាគ្មានសង្ឃឹមនៅរស់រានមានជីវិតឡើយ ។
ក្រោយហេតុការណ៍នេះបានកើតឡើង សាក្សីនៅកន្លែងកើតហេតុក៏បានខ្នះខ្នែងហៅរថយន្តសង្គ្រោះបន្ទាន់ ដឹកទៅសង្គ្រោះជាបន្ទាន់នៅមន្ទីរពេទ្យ Nong Bua Lamphu ជាមួយរបួសធ្ងន់ធ្ងរសន្លប់ស្តូកស្តឹង ។
ចំណែកអ្នកបើករថយន្តបង្ក ត្រូវបានស្គាល់មានឈ្មោះថា Wanpasorn Lalakul ។ នាងបាននិយាយថា នាង និងស្វាមី បានកំពុងធ្វើដំណើរវិលត្រឡប់ទៅផ្ទះវិញពី Udon Thani ។ ប៉ុន្តែ នៅពេលហេតុការណ៍ដ៏រន្ធត់បានកើតឡើង ដោយសារតែរថយន្តរបស់ពួកគេជាន់ហ្វ្រាំងពុំស៊ី ។
នារីរងគ្រោះដែលត្រូវបានស្គាល់មានឈ្មោះថា Pattapon Poynuk អាយុ ២៣ ឆ្នាំ គឺជាគិលានុបដ្ឋាយិកា ។ ទោះយ៉ាងណា ក្រុមគ្រូពេទ្យបានបញ្ជាក់ថា ស្ថានភាពរបួសរបស់អ្នកជំងឺនៅពេលនេះ បានល្អប្រសើរឡើងវិញហើយ បន្ទាប់ពីសម្រាកព្យាបាលអស់រយៈពេលជាង១ខែ ៕ ចន្ទី
