ខេត្តស្វាយរៀង ៖ នាព្រឹកថ្ងៃអង្គារ ១១កើត ខែចេត្រ ឆ្នាំរកា នព្វស័ក ព.ស ២៥៦១ ត្រូវនឹងថ្ងៃទី២៧ ខែមីនា ឆ្នាំ២០១៨នេះ នៅសាលប្រជុំសាលាខេត្តស្វាយរៀង មានរៀបចំកិច្ចប្រជុំបូកសរុបលទ្ធផលការងារប្រចាំត្រីមាសទី១ និងលើកទិសដៅការងារត្រីមាសទី២ ឆ្នាំ២០១៨ របស់រដ្ឋបាលខេត្ត ក្រោមអធិបតីភាពលោក ម៉ែន វិបុល អភិបាល នៃគណៈអភិបាលខេត្តស្វាយរៀង ។
ក្នុងកិច្ចប្រជុំនេះ មានការអញ្ជើញចូលរួមពីសំណាក់អស់លោកជាអភិបាលរងខេត្ត លោកនាយក នាយករងរដ្ឋបាលសាលាខេត្ត លោកសាកលវិទ្យាធិការសាកលវិទ្យាល័យស្វាយរៀង លោកតំណាងសាលាដំបូងខេត្ត លោកស្នងការនគរបាលខេត្ត លោកមេបញ្ជាការរងតំបន់ប្រតិបត្តិសឹករងស្វាយរៀង លោកមេបញ្ជាការរងកងរាជអាវុធហត្ថខេត្ត លោក លោកស្រីប្រធានមន្ទីរ-អង្គភាពនានាជុំវិញខេត្ត លោកអភិបាលក្រុង ស្រុក លោក លោកស្រីនាយកទីចាត់ការ/ប្រធានអង្គភាពសាលាខេត្ត ប្រធានច្រកទ្វារព្រំដែន និងមន្ត្រីពាក់ព័ន្ធមួយចំនួន ។
មានប្រសាសន៍ក្នុងឱកាសនោះ លោកអភិបាលខេត្ត ក៏បានសម្ដែងនូវការកោតសរសើរ និងថ្លែងអំណរគុណ ដល់គ្រប់បណ្ដាមន្ទីរ-អង្គភាព ក្រុង ស្រុក មន្ត្រីរាជការ និងកងកម្លាំងប្រដាប់អាវុធទាំងអស់ ដែលបានសហការយ៉ាងសកម្មចូលរួមចំណែកជាមួយរដ្ឋបាលខេត្តក្នុងកិច្ចអភិវឌ្ឍន៍មូលដ្ឋាន ការផ្ដល់សេវាសាធារណៈ និងការថែរក្សាសន្តិសុខ សុវត្ថិភាព សណ្ដាប់ធ្នាប់សាធារណៈបានល្អប្រសើរ ព្រមទាំងបាទដោះស្រាយបញ្ហា ឆ្លើយតបនឹងតម្រូវការជាក់ស្ដែងរបស់ប្រជាពលរដ្ឋ ប្រកបដោយប្រសិទ្ធភាព នៅក្នុងត្រីមាសទី១ ឆ្នាំ២០១៨នេះ ។
ទន្ទឹមនេះ លោកអភិបាលខេត្ត ក៏បានធ្វើការផ្ដាំផ្ញើដល់មន្ទីរអង្គភាព រដ្ឋបាលក្រុង ស្រុក កងកម្លាំងប្រដាប់អាវុធ និងអ្នកពាក់ព័ន្ធទាំងអស់ ឲ្យបន្តយកចិត្តទុកដាក់នូវកិច្ចការសំខាន់ៗមួយចំនួន ដើម្បីថែរក្សានូវសន្តិសុខសុវត្ថិភាព សណ្ដាប់ធ្នាប់សាធារណៈ ព្រមទាំងបម្រើផលប្រយោជន៍ សេចក្ដីត្រូវការ និងសំណើ សំណូមរបស់ប្រជាពលរដ្ឋនៅមូលដ្ឋាន ឲ្យបានកាន់តែល្អប្រសើរថែមទៀតនៅក្នុងត្រីមាសទី២ ឆ្នាំ២០១៨ ជាពិសេសការសហការរៀបចំការងារសំខាន់ៗមួយចំនួន តួយ៉ាងកម្មវិធីសង្ក្រាន្តស្វាយរៀង ដើម្បីអបអរសាទរបុណ្យចូលឆ្នាំថ្មី ប្រពៃណីជាតិខ្មែរ និងព្រះរាជពិធីច្រត់ព្រះនង្គ័ល ជាដើម ដោយឡែក មន្ទី-អង្គភាព និងក្រុង ស្រុកពាក់ព័ន្ធ ត្រូវរៀបចំកែលម្អសោភ័ណភាពទាំងខាងមុខ និងក្នុងអង្គភាពរបស់ខ្លួនឲ្យបានស្អាតល្អ រៀបការ៉ូឡានៅតាមបណ្ដាផ្លូវសំខាន់ៗ និងគ្រប់មន្ទីរ-អង្គភាព ពិនិត្យទីតាំងក្នុងក្រុងស្វាយរៀងសម្រាប់ដំឡើងបង្គន់អនាម័យសាធារណៈ លាបថ្នាំលម្អនៅតាមបុកឌៀរផ្លូវ ដើមឈើ និងគំនូសចរាចរណ៍ ណែនាំឲ្យបងប្អូនប្រជាពលរដ្ឋលើកទង់ជាតិឲ្យបានគ្រប់ខ្នងផ្ទះ រៀបចំសណ្ដាប់ធ្នាប់នៅតាមទីប្រជុំជនឲ្យមានសណ្ដាប់ធ្នាប់ ចៀសវាងកើតមានសំណង់អនាធិបតេយ្យ រំលោភដីចំណីផ្លូវដែលធ្វើឲ្យប៉ះពាល់សោភ័ណភាព ៕ វ៉ៃកូ