ខេត្តព្រះសីហនុ ៖ ប្រជាពលរដ្ឋចំនួន ៤២គ្រួសារ ចោទឈ្មោះ សុខ ប៊ុន ថាបានប៉ុនប៉ងចូលទៅរំលោភយកដីធ្លី របស់ពួកគាត់ធ្លាប់កាន់កាប់យូរឆ្នាំ មានទីតាំង នៅភូមិព្រែកស្វាយ សង្កាត់កោះរ៉ុង ក្រុង-ខេត្តព្រះសីហនុ។ ករណីនេះ ក្រុមប្រជាពលរដ្ឋ ក៏បានដាក់ពាក្យបណ្តឹងសុំអន្តរាគមន៍ ទៅសាលាសង្កាត់កោះរ៉ុង និងសាលាខេត្តព្រះសីហនុ ស្នើឲ្យជួយអន្តរាគមន៍ទៅឈ្មោះ សុខ ប៊ុន និងមន្ត្រីក្រុមការងារក្រសួងរៀបចំដែនដីនគរូបនីយកម្ម និងសំណង់មួយចំនួន ដឹកនាំដោយ លោក សួន សូផា ថា បានលួចចូលមកវាស់វែងចំណែកដី របស់ពួកគាត់កំពុងរស់នៅ កាលពីថ្ងៃទី២២ ខែមីនា ឆ្នាំ២០១៨ នៅចំណុចពយតាផេង -ពយអាពត និងថ្មជញ្ជាំង ស្ថិតនៅភូមិព្រែកស្វាយ សង្កាត់កោះរ៉ុង ក្រុង.-ខេត្តព្រះសីហនុ ដោតពលរដ្ឋពួកគាត់មិនបានដឹងខ្លួនជាមុន។
តំណាប្រជាពលរដ្ឋ ៤២គ្រួសារ បានអះអាងថា ពួកគាត់មានកិច្ចសន្យាផ្ទេរសិទ្ធិកាន់កាប់ដីលេខ ២៥របសរ ចុះថ្ងៃទី១៨ ខែមីនា ឆ្នាំ ២០១៣ និងពាក្យស្នើសុំកាន់កាប់ប្រើប្រាស់ដីលេខ ១៨៨ របករ ចុះថ្ងៃទី៦ ខែតុលា ឆ្នាំ២០០៨ ចុះហត្ថលេខាដោយ លោក អ៊ួង និត អតីតចៅសង្កាត់កោះរ៉ុង។ សាលាកប័ត្រព័ត៌មាន ចុះថ្ងៃទី១២ ខែ សីហា ឆ្នាំ២០១៥ និងអត្តសញ្ញាណប័ណ្ណសញ្ជាតិខ្មែរ។
ក្រុមប្រជាពលរដ្ឋ បានឲ្យដឹងទៀតថា ពួកគាត់បានមករស់នៅលើកោះរ៉ង ទីតាំងដែលត្រូវឈ្មួញ និងមន្ត្រីមួយចំនួនឃុបឃិតប៉ងរំលោភយកនៅទីតាំងខាងលើនេះ តាំងពីអាយុ ១៥ឆ្នាំ ពោលគឺនៅក្នុងសម័យសង្គមរាស្ត្រនិយម ដោយប្រកបរបរធ្វើចំការ ដើម្បីចិញ្ចឹមជីវិត ដោតបានដាំដំណាំមួយចំនួនមានដូចជា៖ ដំណាំដូង ខ្នុរ និងស្វាយចន្ទីរជាដើម។ ក្រុមប្រជាពលរដ្ឋបន្តថា ក្រោយសម័យសង្គ្រាម ឆ្នាំ១៩៧៩ ពួកគាត់បានមករស់នៅ និងកាន់កាប់ដីចំការរៀងៗខ្លួន ជាបន្តបន្ទាប់ រហូតមកដល់បច្ចុប្បន្ននេះ។ ហើយថា ការរស់នៅនេះ មានការទទួលស្គាល់ពីអាជ្ញាធរមូលដ្ឋានភូមិ-សង្កាត់ និងក្រុង ជាពិសេសត្រូវបានស្ថាប័នជំនាញ នៃក្រុមការងារថ្នាក់ជាតិ មានក្រសួងរៀបចំដែនដីនគរូបនីយកម្ម និងសំណង់ បានចុះវាស់វែងចំណែកក្បាលដី ត្រៀមចេញបណ្ណកម្មសិទ្ធិ និងបានប្រកាសបិទផ្សាយទិន្នន័យក្បាលដីជាសាធារណៈ នូវឯកសារសូរិយោដី ប្លង់សុរិយោដី និងបញ្ជីឈ្មោះអ្នកកាន់កាប់ដី ដែលក្រុមការងារបច្ចេកទេស បានចុះបញ្ជីដីធ្លី និងបានចុះវាស់វែងប្រមូលទិន្នន័យក្បាលដីរួចរាល់ ស្របតាមនីតិវិធីច្បាប់ ដោយមន្ត្រីជំនាញបានទុកពេល ១៥ថ្ងៃ សម្រាប់ឲ្យអ្នកពាក់ព័ន្ធធ្វើការតវ៉ា គឺចាប់ពីថ្ងៃទី១៤ ខែកក្កដា ឆ្នាំ២០១៧ ដល់ថ្ងៃទី២៨ ខែកក្កដា ឆ្នាំ២០១៧កន្លងទៅ។ តំណាងប្រជាពលរដ្ឋទាំង ៤២គ្រួសារ បានបង្ហាញការភ្ញាក់ផ្អើល ដោយសារកាលពីថ្ងៃទី២២ ខែមីនា ឆ្នាំ២០១៨ ថ្មីៗនេះ លោក សុខ ប៊ុន និងក្រុមការងារក្រសួងដែនដីដឹកនាំដោយ លោក សួន សូផា និងមន្ត្រីខិលខូចមួយចំនួនទៀត បានឃុបឃិតចូល មកលួចវាស់បរិវេណដី របស់ពួកគាត់ ដោយប្រើម៉ាស៊ីន GPS ចុចនៅលើទីតាំងដី ដែលពួកគាត់កំពុងរស់នៅ និងកាន់កាប់អាស្រ័យផលជាបន្តបន្ទាប់រហូតមកដល់ពេលនេះ។
ប្រជាពលរដ្ឋ បានអះអាងថា សកម្មភាពចុះលួចចុចវាស់ដី ដែលលោក សុខ ប៊ុន និងបក្សពួក បានធ្វើខាងលើនេះ គឺមិនមានអាជ្ញាធរមូលដ្ឋានដឹងឮ ឬមានកិច្ចសហការចូលរួមពីអាជ្ញាធរជំនាញមូលដ្ឋានខេត្តព្រះសីហនុនោះទេ ដោយបានអនុវត្តខុសច្បាប់ទាំងស្រុង។ ផ្តើមពីបញ្ហានេះ ប្រជាពលរដ្ឋមួយចំនួន ក្នុងចំណោមពលរដ្ឋទាំង ៤២គ្រួសារ មានការភ្ញាក់ផ្អើល ហើយបានលើគ្នាមកសួរនាំ លោក សុខ ប៊ុន និងក្រុមការងារ។ ខណៈនោះ លោក សុខ ប៊ុន ដែលមានផ្ទះរស់នៅជាអចិន្ត្រៃយ៍នៅទីក្រុងភ្នំពេញ បាននិយាយថា ដីរបស់គាត់ នៅក្នុងតំបន់ខាងលើនេះ មានចំនួន ៥២៥ហិកតា។ យ៉ាងនេះក្តី ក្រុមប្រជាពលរដ្ឋ បានចោទ លោក សុខ ប៊ុន និងបក្សពួក ដែលបានចូលមកលួចវាស់ដីប្រជាពលរដ្ឋពួកគាត់ ថាធ្វើឡើងដោយគ្មានឯកសារណាមួយបង្ហាញពីសិទ្ធិកាន់កាប់ដីធ្លីនៅចំណុច ពយតាផេង ពយអាពត និងចំណុចថ្មជញ្ជាំង មានទីតាំងស្ថិតនៅភូមិព្រែកស្វាយ សង្កាត់កោះរ៉ុង ក្រុង-ខេត្តព្រះសីហនុនោះទេ។
បច្ចុប្បន្ននេះ ប្រជាពលរដ្ឋ ដែលចោទ លោក សុខ ប៊ុន និងបក្សពួក ថា បានរំលោភបំពានដីធ្លីទាំង ៤២គ្រួសារ បានដាក់ពាក្យបណ្តឹងចូលមកសាលាសង្កាត់កោះរ៉ុង និងសាលាខេត្តព្រះសីហនុ រួចរាល់ហើយ កាលពីថ្ងៃទី២៦ ខែមីនា ឆ្នាំ២០១៨នេះ ដើម្បីស្នើសុំជួយរកយុត្តិធម៌ និងស្នើជួយពន្លឿនចេញបណ្ណកម្មសិទ្ធិជូនពួកគាត់ ឲ្យបានឆាប់ ដើម្បីឲ្យពួកគាត់បានរស់នៅស្របច្បាប់ ដោយគ្មានការភិតភ័យ ឬប៉ុនប៉ងរំលោភបំពានពីសំណាក់បុគ្គណាមួយកើតឡើងនាថ្ងៃខាងមុខទៀត។ ទោះយ៉ាងណា ប្រជាពលរដ្ឋទាំង ៤២គ្រួសារ រស់នៅលើកោះរ៉ុង បានឲ្យដឹងថា គិតមកត្រឹមថ្ងៃទី២៨ ខែមីនា ឆ្នាំ២០១៨ រដ្ឋបាលខេត្តព្រះសីហនុ នៅមិនទសន់លើកយកកង្វល់ របស់ពួកគាត់ លើករណីសង្ស័យ លោក សុខ ប៊ុន ប៉ុនប៉ងចូលទៅរំលោភយកដីលំនៅដ្ឋាន និងដីចំការនៅលើកោះរ៉ុង នៅឡើយទេ។
ទាក់ទិនការចោទខាងលើនេះ អ្នកយកព័ត៌មានគេហទំព័រ CEN.COM.KH ប្រចាំខេត្តព្រះសីហនុ មិនទាន់អាចទាក់ទង លោកឧកញ៉ា សុខ ប៊ុន ដើម្បីស្នើសុំបំភ្លឺជុំវិញការចោទប្រកាន់ របស់ប្រជាពលរដ្ឋទាំង ៤២គ្រួសាររស់នៅលើកោះរ៉ុង ដែលចោទថា បានប៉ុនប៉ងរំលោភយកដីធ្លី របស់ពួកគាត់បានទេ នៅព្រឹកថ្ងៃពុធ ទី២៨ ខែមីនា ឆ្នាំ២០១៨។ ប៉ុន្តែយោងតាមឯកសារ ឬសេចក្តីជូនដំណឹង ចុះថ្ងៃទី២១ ខែមីនា ឆ្នាំ២០១៨ របស់ ក្រសួងរៀបចំដែនដី នគរូបនីយកម្ម និងសំណង់ ផ្ញើជូន អភិបាលខេត្តព្រះសីហនុ បានជម្រាបថា ក្រសួងបានឯកភាពជាគោលការណ៍បង្កើតក្រុមការងារចុះពិនិត្យវាស់វែងក្បាលដីទំហំ ៥២៥០.០០០ម៉ែត្រការ៉េ របស់ឈ្មោះ សុខ ប៊ុន ស្ថិតនៅភូមិព្រែកស្វាយ សង្កាត់កោះរ៉ុង ក្រុង-ខេត្តព្រះសីហនុ ហើយស្នើឲ្យ រដ្ឋបាលខេត្ត ចាត់មន្ត្រីជំនាញពាក់ព័ន្ធឲ្យចូលរួមអនុវត្តការងារខាងលើនេះឲ្យបានរលូន។ ចំពោះសំណើខាងលើនេះ ក្រសួងរៀបចំដែនដី បានចាត់ឲ្យ លោក សួន សូផា ដឹកនាំក្រុមការងារចុះសហការអនុវត្តការវាស់វែងដីជាមួយអាជ្ញាធរពាក់ព័ន្ធខេត្ត នៅថ្ងៃទី២២ ខែមីនា ឆ្នាំ២០១៨ ឲ្យទទួលបានជោគជ័យ។ គួររំលឹកថា លោកឧកញ៉ា សុខ ប៊ុន អគ្គនាយក្រុមហ៊ុនសុខប៊ុនគ្រុប កាលពីថ្ងៃទី១៨ ខែកក្កដា ឆ្នាំ២០១៥ ធ្លាប់ត្រូវបានតុលាការសាលាដំបូងរាជធានីភ្នំពេញ ចាប់ដាក់គុកម្តងរួចមកហើយ ពីបទហិង្សា ដោយចេតនាមានស្ថានទម្ងន់ទោស ទៅលើកញ្ញា ឯក សុជាតា ហៅកញ្ញា សាសា ដោយលោក សុខ ប៊ុន រួមគ្នាជាមួយអង្គរក្ស បានវាយទាត់ធាក់ទៅលើអតីតពិធីការីនីទូរទស្សន៍ CTN គឺ កញ្ញា សាសា យ៉ាង សាហាវឃោរឃៅ នៅក្នុងភោជនីយដ្ឋានមួយកន្លែងក្នុងរាជធានីភ្នំពេញ៕ ដែន សីមា