ស្ត្រីចំណាស់នៅចិនម្នាក់ បានសងសឹងនឹងគ្រូទាយព្រោះតែគ្រូរូបនេះបានទស្សន៍ទាយថា គាត់នឹងស្លាប់នៅឆ្នាំ ២០១៧ ប៉ុន្តែការពិតគាត់ពុំបានស្លាប់សោះ។ ហេតុការណ៍នេះបានកើតឡើងនៅក្រុងលូយ៉ាង ខេត្តហឺណាន ប្រទេសចិន គ្រាដែលស្ត្រីត្រកូលវ៉ាង អាយុ ៧០ឆ្នាំ កាលពីឆ្នាំទៅមិញ បានទៅជួបគ្រូទស្សន៍ទាយ ហើយគ្រូរូបនោះបានប្រាប់ថា គាត់ពុំមានជីវិតឆ្លងចូលឆ្នាំ ២០១៨ឡើយ ។
ក្រោយពីឮគ្រូទាយបែបនេះ ការរស់នៅរបស់អ្នកស្រីវ៉ាងការរស់នៅពេញមួយឆ្នាំ ២០១៧ គឺជាឋាននរកមួយពិតប្រាកដ ព្រោះថា គាត់តែងតែខ្វាយខ្វល់នឹងត្រៀមស្មារតីសម្រាប់ “ការលាចាកលោក” របស់ខ្លួន។ គាត់គេងពុំឆ្ងាញ់ដេកមិនស្រណុក អារម្មណ៍អាប់អួរលែងមានស្នាមញញឹមពេញ១ឆ្នាំ ២០១៧ ។
អ្នកស្រីវ៉ាង ឲ្យដឹងទៀតថា តាំងពីជួបគ្រូទាយនោះមកពេលវេលា១ថ្ងៃ នៃជីវិតពិតជាសុបិន្តដ៏អាក្រក់ ព្រោះក្នុងអារម្មណ៍តែងគិតថា ថ្ងៃនេះប្រហែលជា… វេលាចុងក្រោយរបស់ខ្លួនទេដឹង ។
ក្នុងជីវភាពដូចពោលខាងលើទោះយ៉ាងណាឆ្នាំ ២០១៧ បានកន្លងផុតហើយគាត់ពុំមានបញ្ហាអ្វីទាំងអស់ ។ យ៉ាងនេះគួរណាស់គាត់ត្រូវសប្បាយរីករាយដោយសារការទស្សន៍ទាយពុំបានក្លាយជារឿងពិត ។ ផ្ទុយទៅវិញគាត់បែរជាចងកំហឹងយ៉ាងខ្លាំងជាមួយគ្រូទាយរូបនោះដែលនាំឲ្យគាត់រងទុក្ខវេទនាពេញមួយឆ្នាំ២០១៧។
សប្តាហ៍មុននេះ អ្នកស្រីវ៉ាងបានជួបគ្រូទាយខាងលើដោយចៃដន្យនៅក្នុងឧទ្យានមួយ ។ កំហឹងដែលផ្ទុកពេញឱរ៉ាអំឡុងពេល១ឆ្នាំកន្លងមកបាន “ផ្ទុះឡើង” គាត់ស្ទុះទៅវាយលុកលើគ្រូទាយរូបនេះព្រមទាំងវាយកម្ទេចនូវអ្វីៗទាំងអស់ដែលគ្រូទាយនេះយកតាមខ្លួន រហូតទល់ពេលដែលប៉ូលិសមកដល់កន្លែងកើតហេតុទើបបង្អាក់បានសកម្មភាពសងសឹករបស់អ្នកស្រីវ៉ាង។
យ៉ាងនេះក្តីអ្នកស្រីវ៉ាងពុំត្រូវរងការពិន័យដោយវាយប្រហារលើជនដទៃទេ ។ ពេលដឹងឮរឿងនេះប៉ូលិស បានបង្ខំឲ្យគ្រូទាយ “មហាឆុត” រូបនេះ ត្រូវសុំទោសអ្នកស្រីវ៉ាងចំពោះការទស្សន៍ទាយផ្តេសផ្តាសបង្កឲ្យមានភាពតានតឹងដល់ជីវិតរបស់អ្នកដទៃ៕ ចន្ទ្រា
