ខេត្តព្រះសីហនុ៖ កម្លាំងកងរាជអាវុធហត្ថខេត្តព្រះសីហនុ កាលពីព្រឹកថ្ងៃពុធ ទី២៨ ខែមីនា ឆ្នាំ២០១៨ បានបញ្ជូនជនសង្ស័យពាក់ព័ន្ធបទល្មើសគ្រឿងញៀនចំនួន ៨នាក់ ក្នុងនោះមានស្ត្រី ២នាក់ បញ្ជូនទៅកាន់សាលាដំបូងខេត្តព្រះសីហនុ ដើម្បីផ្តន្ទាទោស តាមនីតិវិធីច្បាប់ បន្ទាប់ពីកម្លាំងជំនាញបានចុះបង្ក្រាប និងចាប់ជនសង្ស័យបានជាបន្តបន្ទាប់ ក្នុងករណីបទល្មើសផ្សេងៗគ្នា។ មន្ត្រីកងរាជ អាវុធ ហត្ថខេត្តព្រះសីហនុ បានឲ្យដឹងថា ករណីទី១ បង្ក្រាបបាន នៅថ្ងៃទី២៥ ខែមីនា ឆ្នាំ២០១៨ នៅចំណុច ហ្គេមបាញ់ត្រីឡាយអិន ស្ថិត នៅក្រុម១៤ ភូមិ៤ សង្កាត់៤ ក្រុងព្រះសីហនុ ដោយឃាត់ខ្លួនជនសង្ស័យបានម្នាក់ ឈ្មោះ ស៊ីម រី ភេទស្រី អាយុ ២៧ឆ្នាំ មុខរបរមិនពិតប្រាកដ មានស្រុកកំណើត ឃុំព្រែកពោធិ៍ ស្រុកស្រីសន្ធរ ខេត្តកំពង់ចាម។ បច្ចុប្បន្ននេះ មានទីលំនៅ ក្រុម១៧ ភូមិ៣ សង្កាត់៤ ក្រុងព្រះសីហនុ ដោយដកហូតបានភស្តុតាង ឬសម្ភារៈមួយចំនួនរួមមាន៖ ១-ម្សៅសថ្លា ៣០កញ្ចប់ (ថ្លឹងទាំងសម្បក ២,៦១ក្រាម) ២-លុយខ្មែរ ៨០០០០រៀល។
ករណីទី២ នៅថ្ងៃដ៏ដែល កម្លាំងជំនាញ បានចុះបង្ក្រាប នៅចំណុច ក្រោយកាល់តិច សាលាឆទានស្ថិតនៅភូមិ៣ សង្កាត់២ ក្រុងព្រះសីហនុ ឃាត់ខ្លួនជនសង្ស័យបានម្នាក់ឈ្មោះ ប៉ុល ពិសី ភេទស្រី អាយុ ២៦ឆ្នាំ មុខរបរលក់ដូរ ស្រុកកំណើត ភូមិស្ងួនពេជ្រ ស្រុកអង្គស្នួល ខេត្តកណ្តាល។ បច្ចុប្បន្នមានទីលំនៅ ភូមិទួលទទឹង ឃុំទទួលទទឹង ស្រុកព្រៃនប់ ខេត្តព្រះសីហនុ ដោយដកហូតបាន៖ ម្សៅសថ្លា ១កញ្ចប់ (ថ្លឹងទាំងសម្បក ២,៦២ក្រាម)។
ករណីទី៣ ថ្ងៃទី២៦ ខែមីនា ឆ្នាំ២០១៨ កម្លាំងការិយាល័យបទល្មើសគ្រឿងញុៀន ខេត្តព្រះសីហនុ សហការជាមួយការិយាល័យជួញដូរគ្រឿងញៀន អាវុធហត្ថផ្ទៃប្រទេស និងអាវុធហត្ថខណ្ឌពោធិ៍សែនជ័យ បានបន្តចុះបង្គ្រាបករណីជួញដូរគ្រឿងញៀន នៅចំណុច ភូមិត្រពាំងឈូក សង្កាត់កន្ទោក ខណ្ឌពោធិ៍សែនជ័យ រាជធានីភ្នំពេញឃាត់ខ្លួនជនសង្ស័យ បានចំនួន ៦នាក់ មានឈ្មោះ៖
១-ឈ្មោះ សុខ គឹមសៀន ភេទប្រុស អាយុ ២២ឆ្នាំ មុខរបរ អ្នកយកលុយតុងស្នូកឃើ ទីកន្លែងកំណើត ភូមិពើក ឃុំពើក ស្រុកអង្គស្នួល ខេត្តកណ្តាល មានទីលំនៅ ភូមិត្រពាំងឈូក សង្កាត់កន្ទោក ខណ្ឌពោធិ៍សែនជ័យ រាជធានីភ្នំពេញ។
២-ឈ្មោះ ភ័ណ្ឌ ឃីម ភេទប្រុស អាយុ ១៦ឆ្នាំ មុខរបរមិនពិតប្រាកដ ទីកន្លែងកំណើត ខេត្តកំពង់ចាម មានទីលំនៅ ភូមិបឹងធំ ខណ្ឌដង្កោរ រាជធានីភ្នំពេញ។
៣-ឈ្មោះ ជា យូ សែប ភេទប្រុស អាយុ ២១ឆ្នាំ មុខរបរជាងកាត់សក់ ទីកន្លែងកំណើត និងបច្ចុបប្បន្ននៅភូមិភ្លើងឆេះរទេះសង្កាត់ភ្លើងឆេះរទេះខណ្ឌដង្កោរ រាជធានីភ្នំពេញ។
៤-ឈ្មោះ សុខ សុផត្តណា ភេទប្រុស អាយុ ១៥ឆ្នាំ មុខរបរសិស្ស ទីកន្លែងកំណើត ខេត្តសៀមរាម មានទីលំនៅ ភូមិបឹងធំ សង្កាត់ បឹងធំ ខណ្ឌដង្កោរ រាជធានីភ្នំពេញ។
៥-ឈ្មោះ ដួង វាសនា ភេទប្រុស អាយុ ២៤ឆ្នាំ មុខរបរមិនពិតប្រាកដ ទីកន្លែងកំណើត ភូមិខ្លែងគង់ ឃុំបឹងដោល ស្រុកព្រះស្តេច ខេត្តព្រៃវែង មានទីលំនៅ ភូមិត្រពាំងឈូក សង្កាត់កន្ទោកខណ្ឌពោធិ៍សែនជ័យ រាជធានីភ្នំពេញ។
៦-ឈ្មោះ គង់ កេន ភេទប្រុស អាយុ ៣៦ឆ្នាំ មុខរបរមិនពិតប្រាកដ ទីកន្លែងកំណើត និងបច្ចុប្បន្ននៅភូមិត្រពាំងឈូក សង្កាត់កន្ទោក ខណ្ឌពោធិ៍សែនជ័យ រាជធានីភ្នំពេញ។
ការឃាត់ខ្លួននេះ កម្លាំងជំនាញកងរាជអាវុធហត្ថ បានដកហូត៖
១-ម្សៅសថ្លា ៤កញ្ចប់ (ថ្លឹងទាំងសម្បក ៣៨.២៩ក្រាម)
២-ទូរស័ព្ទ ៣គ្រឿង៕ ដែន សីមា