ព្រះវិហារ ៖ មេទ័ពតំបន់ព្រះវិហារ បានថ្លែងថា តំបន់ព្រំដែនកម្ពុជាថៃ ដែលកាលពីមុខធ្លាប់តែឮស្នូរគ្រាប់កាំភ្លើងនោះ ឥឡូវនេះបានកែប្រែ ទៅជាព្រំដែនមានសន្តិភាព បានន័យថា កងកម្លាំងកងទ័ព ប្រជាពលរដ្ឋ មានភាពសប្បាយរីករាយ ជាមួយនឹងការប្រកបរបរអាជីវកម្ម បានយ៉ាងរលូន ដែលរួមមាន ទាំងហេដ្ឋារចនាសម្ព័ន្ធរូបវ័ន្ត ដែលសម្តេចតេជោ សម្តេចកិត្តិព្រឹទ្ធបណ្ឌិត បានផ្តល់ជូននូវជម្រក ផ្ទះ លំនៅឋាន មណ្ឌលសុខភាព សាលារៀន ដីស្រែចម្ការ ដល់កងទ័ព និងបានកាត់បន្ថយភាពក្រីក្រមួយកម្រិតធំផងដែរ។
ជាក់ស្តែង ប្រធានក្រុមប្រឹក្សារាជធានីភ្នំពេញ លោកម៉ប់ សារិន ប្រធានក្រុមប្រឹក្សារាជធានីភ្នំពេញ នៅព្រឹកថ្ងៃទី២៩ មីនានេះបានដឹកនាំប្រតិភូសាលាខណ្ឌទាំង១២ មកដល់តំបន់ប្រាសាទព្រះវិហារ ដើម្បីនាំយកអំណោយ ជាគ្រឿងឧបភោគ បរិភោគ និងថវិកា របស់សម្តេចតេជោ ហ៊ុន សែន នាយករដ្ឋមន្ត្រី នៃកម្ពុជា និងសម្តេចកិត្តិព្រឹទ្ធបណ្ឌិត មកចែកជូនមន្ត្រីយោធា ដែលកំពុងឈរជើងការពារទឹកដី នៅតំបន់សមរភូមិប្រាសាទព្រះវិហារ ដែលបានចងសម្ព័ន្ធភាពរវាងសមរភូមិជួរមុខ និងសមរភូមិខាងក្រោយជាច្រើនឆ្នាំកន្លងមកនេះ។ ពិធីចែកជូនមន្ត្រីនាយទាហាន ពលទាហាន បានធ្វើឡើង នៅទីបញ្ជាការកងពលតូចអន្តរាគមន៍លេខ៣ ស្ថិតនៅតំបន់អូរជុញ ភូមិសែនរុងរឿង ឃុំទឹកក្រហម ស្រុកជាំក្សាន្ត ខេត្តព្រះវិហារ ដោយមានការទទួលស្វាគមន៍គណៈប្រតិភូ ពីសំណាក់នាយឧត្តមសេនីយ៍ អគ្គបញ្ជាការរង នៃកងយោធពលខេមរភូមិន្ទ លោកឧត្តមសេនីយ៍ឯក ស្រី ឌឹក មេបញ្ជាការកងពលធំអន្តរាគមន៍លេខ៣ ព្រមទាំងមន្ត្រីយោធាជាន់ខ្ពស់ជាច្រើនរូបផ្សេងទៀត។
លោកឧត្តមសេនីយ៍ឯក ស្រី ឌឹក មេបញ្ជាការកងពលធំអន្តរាគមន៍លេខ៣ បានថ្លែង ចាប់ពីឆ្នាំ២០០៨ រហូតដល់ឆ្នាំ២០១៨ កងពលធំអន្តរាគមន៍លេខ៣ បានធ្វើខួប១០ឆ្នាំ នៃការឈររបស់កងទ័ព នៅតំបន់ព្រំដែនកម្ពុជាថៃ ក៏ដូចជា ខួប១០ឆ្នាំ នៃការបង្កើតកងពលធំអន្តរាគមន៍លេខ៣ ក្រោមអធិបតីភាពសម្តេចតេជោ ហ៊ុន សែន នាយករដ្ឋមន្ត្រីកម្ពុជា ។
លោកឧត្តមសេនីយ៍ឯក ក៏បានជម្រាបជូនផងដែរ អំពីស្ថានភាពជីវភាព របស់កងទ័ពជួរមុខ ទិសព្រំដែនកម្ពុជាថៃ ដោយក្នុងរយៈពេល៥ឆ្នាំចុងក្រោយនេះ ក្រោមការដឹកនាំរបស់សម្តេចតេជោ នាយករដ្ឋមន្ត្រី ការទំនាក់ទំនង និងកិច្ចសហប្រតិបត្តិការ រវាងកម្ពុជានិងថៃ មានសុខសន្តិភាព តាមខ្សែបន្ទាត់ព្រំដែន មានភាពល្អប្រសើរ។
លោក មេបញ្ជាការ បានបញ្ជាក់ថា “ចំពោះជីវភាពកងទ័ព បានពិនិត្យឃើញថា ចាប់ពីឆ្នាំ២០០៨មក ក្នុងពេលដែលថៃ បានធ្វើការឈ្លានពាន តំបន់វត្តកែវសិក្ខាគិរីស្វារៈ និងតំបន់ប្រាសាទព្រះវិហារ គឺក្នុងចន្លោះពីឆ្នាំ២០០៨ រហូតដល់ឆ្នាំ២០១២ គឺជីវភាពរបស់កងទ័ព គឺវាលំបាកណាស់ ដោយដៃម្ខាង ការពារទប់ទល់សត្រូវ ការពារបូរណភាពទឹកដី និងដៃម្ខាងទៀត រួមចំណែកកសាងកម្លាំង និងជំរំបន្ទាយ ទៅតាមអនុសាសន៍របស់ប្រមុខរាជរដ្ឋាភិបាល របស់អគ្គបញ្ជាការ ក៏ដូចជា ក្រសួងការពារផងដែរ និងមួយផ្នែកទៀត គឺជួយគ្រួសារកងទ័ព ដែលនៅជួរខាងក្រោម”។ លោក បានបញ្ជាក់ថា យើងបានពិនិត្យឃើញថា ក្នុងស្ថានភាពរយៈពេល១៥ឆ្នាំ ចុងក្រោយនេះ នៅតាមព្រំដែន មានភាពល្អប្រសើរណាស់ បានន័យថា យើងបានអនុវត្តន៍ នូវយុទ្ធសាស្ត្របី និងសកម្មភាព១០ និងបទបញ្ជាទាំង១១ របស់សម្តេចតេជោហ៊ុន សែន ដោយទទួលបាននូវជោគជ័យ”។
លោកបានបន្ថែមថា បច្ចុប្បន្ននេះ “យើងបានកែប្រែតំបន់ព្រំដែន ទៅជាព្រំដែនមានសន្តិភាព ហើយបានកែប្រែ ពីព្រំដែនមួយ ដែលមានការផ្ទុះអាវុធ ស្នូរគ្រាប់កាំភ្លើង ទៅជាសំឡេងតូរ្យតន្ត្រី នៅតាមទីវត្តអារ៉ាម មានសំឡេងសូត្រធម៌ គឺបានន័យថា ទាំងកងកម្លាំងកងទ័ព និងប្រជាពលរដ្ឋ មានភាពសប្បាយរីករាយយ៉ាងខ្លាំង” ។
លោកក៏បានថ្លែងរំលឹកឡើងវិញ នូវគុណូបក្ការៈ និងដឹងគុណ អរគុណ ចំពោះសម្តេចតេជោ សម្តេចកិត្តិព្រឹទ្ធបណ្ឌិត តែងយកចិត្តទុកដាក់ ដែលបានផ្តល់នូវអ្វីៗទាំងអស់ រាប់តាំងពីជំរំជម្រក ផ្ទះ លំនៅឋាន គ្រួសារកងទ័ព ដីធ្លី មណ្ឌលសុខភាព សាលារៀន ដីស្រែចម្ការ ត្រូវបានផ្តល់ជូនដល់កងទ័ព ហើយនាពេលបច្ចុប្បន្ននេះ បងប្អូនកងទ័ព កំពុងប្រកបរបរអាជីវកម្មរបស់ខ្លួន ហើយបានកាត់បន្ថយ ភាពក្រីក្រ បានមួយចំនួនធំផងដែរ។
លោកឧត្តមសេនីយ៍ឯក ស្រី ឌឹក បានបញ្ជាក់អំពីចំណងសម្ព័ន្ធមេត្រីភាព រវាងសាលារាជធានីភ្នំពេញ ជាមួយនឹងកងពលធំអន្តរាគមន៍លេខ៣ យើងឃើញថា បើគិតពីប្រវត្តិរបស់រាជធានីភ្នំពេញ និងថ្នាក់ដឹកនាំរបស់រាជធានីភ្នំពេញ មន្ត្រី មន្ទីរជុំវិញរាជធានីភ្នំពេញ គឺមានរយៈពេល១៦ឆ្នាំហើយ ។
លោកបានថ្លែងថា ថ្នាក់ដឹកនាំរបស់រាជធានីភ្នំពេញ មន្ត្រី មន្ទីរជុំវិញរាជធានីភ្នំពេញ និងប្រជាពលរដ្ឋនៅរាជធានីភ្នំពេញ បានរួមចំណែកជួយអភិវឌ្ឍន៍តំបន់ព្រះវិហារ ជាពិសេសប្រាសាទព្រះវិហារ រាប់តាំងពីឆ្នាំ២០០២មកម្ល៉េះ ដែលបានផ្តល់ជូនឧបត្ថម្ភដល់កងទ័ពនៅសមរភូមិមុខ ថ្វីត្បិតតែជំនាន់នោះ មិនទាន់មានសង្គ្រាម ប៉ុន្តែការលំបាកផ្លូវគមនាគមន៍ ការលំបាកហេដ្ឋារចនាសម្ព័ន្ធផ្សេងៗមិនទាន់មានការអភិវឌ្ឍ ។ លោកបន្តថា នៅក្រោយឆ្នាំ២០០៨ សត្រូវថៃដែលបានឈ្លានពានតំបន់ប្រាសាទព្រះវិហារ គឺសាលារាជធានីភ្នំពេញ បានជួយឧបត្ថម្ភសមរភូមិមុខទិសប្រាសាទព្រះវិហារមុនគេ ជាពិសេសប្រជាពលរដ្ឋនៅរាជធានីភ្នំពេញ បានមកដល់ទីនេះតែម្តង និងបានឡើងដល់ខ្សែត្រៀមជាមួយនឹងថ្នាក់ដឹកនាំមួយចំនួន ហើយគិតមកដល់ពេលសម្ព័ន្ធមេត្រីភាពរវាងកងពលធំអន្តរាគមន៍លេខ៣និងសាលារាជធានីភ្នំពេញ មានរយៈពេល៦ឆ្នាំហើយ៕ ដោយ ៖ កូឡាប