កណ្ដាល ៖ ម្នាក់ស្លាប់ភ្លាមៗនៅកន្លែងកើតហេតុនិងម្នាក់ទៀតទទួលរងរបួសធ្ងន់ក្នុងហេតុការណ៍គ្រោះថ្នាក់ចរាចររវាងរថយន្ដមួយគ្រឿងបើកវ៉ាជែងមិនប្រយ័ត្នបុកម៉ូតូពីក្រោយកាលពីវេលាម៉ោង១៧និង៣០នាទី ថ្ងៃទី២៨ ខែមីនា ឆ្នាំ២០១៨ លើផ្លូវជាតិលេខ៦ ត្រង់ចន្លោះគីឡូមែត្រលេខ៣៤-៣៥ ស្ថិតក្នុងភូមិវត្តចាស់ ឃុំព្រែកដំបង ស្រុកមុខកំពូល ខេត្តកណ្តាល ។
មន្ដ្រីនគរបាលចរាចរណ៍ស្រុកមុខកំពូលបានឲ្យដឹងថា ជនរងគ្រោះស្លាប់ឈ្មោះ ឈួន វី ភេទប្រុស អាយុ៣៧ឆ្នាំ ជិះម៉ូតូម៉ាកហុងដាឌ្រីម ធុន១២៥ ពណ៌ខ្មៅ ស៊េរីឆ្នាំ២០១៨ ពាក់ស្លាកលេខភ្នំពេញ1GU-0119 មានអ្នករួមដំណើរជាមួយម្នាក់ឈ្មោះ ប៉ុក ខន ភេទប្រុស អាយុ៣៨ឆ្នាំ ទទួលរងរបួសធ្ងន់ ។ ជនរងគ្រោះទាំង២នាក់មានទីលំនៅភូមិចំបក់ធំ សង្កាត់ព្រែកព្នៅ ខណ្ឌព្រែកព្នៅ រាជធានីភ្នំពេញ ។ ចំណែករថយន្ដបង្កម៉ាកហ៊ីយ៉ាន់ដាយ ពណ៌ស ពាក់ស្លាកលេខ បន្ទាយមានជ័យ3A-0591 បើកបរដោយជនមិនស្គាល់អត្ដសញ្ញាណ រត់គេចបាត់ស្រមោល ។ នៅមុនពេលកើតហេតុ ជនរងគ្រោះទាំង២នាក់ជិះម៉ូតូតាមបណ្ដោយផ្លូវជាតិលេខ៦ ក្នុងទិសដៅពីត្បូងទៅជើង លុះមកដល់ចំណុចកើតហេតុ ស្រាប់តែរថយន្ដបង្កម៉ាកហ៊ីយ៉ាន់ដាយបានបើកបរក្នុងល្បឿនលឿនវ៉ាជែងរថយន្ដមួយមួយគ្រឿងបើកនៅខាងមុខដោយមិនមើលពីស្ថានភាពផ្លូវនិងប្រុងប្រយ័ត្នជ្រុលទៅបុកម៉ូតូជនរងគ្រោះពីក្រោយពេញមួយទំហឹង បណ្ដាលឲ្យជនរងគ្រោះជាអ្នកឌុបស្លាប់ភ្លាមៗនៅកន្លែងកើតហេតុ រីឯអ្នករួមដំណើរម្នាក់ទៀតទទួលរងរបួសធ្ងន់ ។ ចំណែកអ្នកបើកបររថយន្ដបានទុករថយន្ដរបស់ខ្លួនចោល រួចរត់គេចខ្លួនបាត់៕ ដោយ ៖ បញ្ញាស័ក្តិ
