ភ្នំពេញ ៖ នគរបាលខេត្តតាកែវ ចំនួន៨នាក់រួមទាំងលោកស្នងការរង ឡាយ ណារិទ្ធ ត្រូវបាននាយកដ្ឋាននគរបាលព្រហ្មទណ្ឌ ក្រសួងមហាផ្ទៃ កោះហៅ មកសួរនាំពាក់ព័ន្ធនឹងសំណុំរឿងស្ដ្រីស្អាតមេម៉ាយកូន៣ ចងកសម្លាប់ខ្លួន។
នាយឧត្តមសេនីយ៍សន្ដិបណ្ឌិត នេត សាវឿន អគ្គស្នងការនគរបាលជាតិ បានថ្លែងនៅព្រឹកថ្ងៃទី២៩ ខែមីនា ឆ្នាំ២០១៨នេះឲ្យដឹងថា នគរបាលខេត្តតាកែវ ចំនួន៨នាក់នោះ ត្រូវបានគេហៅមកសួរនាំ ដើម្បីពិនិត្យពាក់ព័ន្ធ នឹងកន្លែងកើតហេតុឡើងវិញ ។
ការកោះហៅមន្ដ្រីនគរបាលខេត្តតាកែវ ចំនួន៨នាក់ មកសួរនាំករណីស្ដ្រីស្អាត ឈ្មោះ ចែវ សុវឌ្ឍនា អាយ៣៦ឆ្នាំ ត្រូវបានគេប្រទះឃើញដោយចងកសម្លាប់ខ្លួន កាលពីចុងខែមករាកន្លងទៅ នៅក្នុងផ្ទះជួលស្ថិតនៅក្រុងដូនកែវ ខេត្តតាកែវ។
លោកស្នងការរងនគរបាលខេត្តតាកែវ ឡាយ ណារិទ្ធ ត្រូវបងបង្កើតរបស់លោក ឡាយ វណ្ណៈ អភិបាលខេត្តតាកែវ ដែលត្រូវបានប្រមុខរដ្ឋស្ដីទីសម្តេចសាយ ឈុំ ចេញព្រះរាជក្រឹត្យបញ្ចប់មុខតំណែង កាលពីថ្មីៗនេះ។
មន្ដ្រីនគរបាលនាយកដ្ឋានព្រហ្មទណ្ឌ បានប្រាប់ឲ្យដឹងថា គិតត្រឹមវេលាម៉ោង១១ព្រឹកថ្ងៃទី២៩ខែមីនានេះ មន្ដ្រីនគរបាលទាំង៨រូប កំពុងស្ថិតក្រោមការសួរនាំនៅឡើយ ពាក់ព័ន្ធករណីមួយនេះ។
សូមបញ្ជាក់ថា អ្នកស្រី ចែវ សុវឌ្ឍនា អាយុ៣៦ឆ្នាំ ដែលមានកូន៣នាក់ ត្រូវបានគេប្រទះឃើញចងកក្នុងបន្ទប់ដេក ផ្ទះជួលរបស់ខ្លួន ក្នុងភូមិផ្សារតាកោរ សង្កាត់រការក្នុង ក្រុងដូនកែវ ខេត្តតាកែវ កាលពីល្ងាចថ្ងៃទី២៦ ខែមករា ឆ្នាំ២០១៨ ដែលត្រូវបានសមត្ថកិច្ចដាក់ការសង្ស័យថា មានវិបត្តិស្នេហា ប៉ុន្តែមជ្ឈដ្ឋានមួយចំនួនបានបញ្ជាក់ថា មិនមែនជាករណីចងកសម្លាប់ខ្លួននោះទេ គឺជាករណីឃាតកម្ម៕ ដោយ ៖ បញ្ញាស័ក្តិ