សៀមរាប ៖ «បេីមានសង្គ្រាមគឺគ្មាន ស្នាមញញឹម គ្មានមិត្តភក្រ គ្មានវប្បធម៌និងគ្មានធម្មជាតិ» នេះជាការលេីកឡើងរបស់ លោក បណ្ឌិតសភាចារ្យ សុខ ទូច ប្រធានរាជបណ្ឌិត្យសភាកម្ពុជា នៅក្នុងពិធី ប្រកាសបិទ ទិវាចម្លាក់ឈើពិភពលោក ស្តីពី « ជីវិត» 2018 World Wood Day Life កាលពីពេលថ្មីៗនេះ នៅ លេីទឹកដីសៀមរាបអង្គរ ខេត្តសៀរាប ដែលបានរៀបចំដោយរាជបណ្ឌិត្យសភាកម្ពុជា ក្រោមការឧបត្ថម្ភដោយមូលនិធិអង្គការសង្គមវប្បធម៌ឈើអន្តរជាតិ ដោយមានអ្នកចូលរួមប្រមាណជាង ៥៥០នាក់បានអញ្ជេីញពីបណ្តាប្រទេសនានាចំនួន១០០។
ការលេីកឡើងនេះ វាមានអត្ថន័យដ៏ជ្រាលជ្រៅណាស់ដែលវាបានឆ្លុះបញ្ចាំងពីការអប់រំ ការផ្សព្វផ្សាយ លេីកកម្ពស់ការស្រលាញ់ដេីមឈើ លេីកកម្ពស់មេត្រីភាពបរិស្ថាន ជីវវត្ថុ និងការបណ្តុះស្មារតីរបស់មនុស្សពីជំនាន់មួយទៅជំនាន់ឱ្យចេះស្រលាញ់ព្រៃឈើ។ ទាំងអស់នេះវាបានចងភ្ជាប់ទៅនឹង មនុស្សអាចកែច្នៃអ្វីៗតាមរយៈចម្លាក់ឈើ អាចឆ្លាក់ឈើជារូប មនុស្សដែលប្រកបដោយស្នាមញញឹមបានគ្រប់ពេល សម្រាប់អ្នកជំនាន់ក្រោយ មិនថាជាតិសាសន៍ណា ពណ៌សម្បុរណានោះទេ ហើយមនុស្សអាចប្រេី ប្រាស់ឈើដើម្បីកែច្នៃធម្មជាតិមកវប្បធម៌បាន។ ដូច្នេះមនុស្សមិនត្រូវបំផ្លាញព្រៃឈើនោះទេ ធម្មជាតិនិងវប្បធម៌ត្រូវតែរក្សាបានជាមួយគ្នានៅជុំវិញពិភពលោក។
ដូច្នេះបេីមានសង្គ្រាម ធម្មជាតិក៏ត្រូវរលាយ វប្បធម៌នៃការកែច្នៃក៏គ្មាន ស្នាមញញឹមក៏គ្មានមិត្តភក្រ បងប្អូនក៏មិនមានដែរ។
លោក បណ្ឌិតសភាចារ្យបានបន្ថែមថា ៖ កម្ពុជាស្រឡាញ់ធម្មជាតិ កម្ពុជាមានសន្តិភាព ទេីប មានការរៀបចំព្រឹត្តិការណ៍នេះឡេីងប្រកបដោយជោគជ័យនិងមានការទទួលស្គាល់ពីបណ្តាប្រទេសលើពិភពលោក ហើយឯកឧត្តមបណ្ឌិតសភាចារ្យ ក៏បានសង្កត់ធ្ងន់ថា កម្ពុជាមិនបានបំផ្លាញបរិស្ថានដូចប្រទេស មហាអំណាចដែលមានឧស្សាហកម្មធំៗនោះដែរ គឺផ្ទុយទៅវិញ កម្ពុជាមានតែឧស្សាហកម្មគ្មានផ្សែងប៉ុណ្ណោះគឺវិស័យទេសចរណ៍ ហើយវាបានផ្ទុយស្រឡះពីមតិមួយចំនួនបាននឹងកំពុងបន្ទុះបង្អាប់កម្ពុជានៅលើឆាកអន្តរជាតិពីការបំផ្លាញបរិស្ថាន ព្រៃឈើ។
មិនតែប៉ុណ្ណោះលោក បានបន្តថា ៖ នៅថ្ងៃទី ១៨ ខែឧសភា ខាងមុខនេះ ក្រោមអធិបតីដ៏ខ្ពង់ខ្ពស់បំផុតរបស់សម្តេចអគ្គមហាសេនាបតី តេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា រាជបណ្ឌិត្យសភាកម្ពុជា តាមរយៈឧទ្យានតេជោសែនឬស្សីត្រឹប ដែលស្ថិតក្នុងស្រុកឆែបនៃខេត្តព្រះវិហារ មានគម្រោងដាំកូនឈើលើផ្ទៃដីប្រមាណ៥០ ហិចតា ក្នុងចំណោមផ្ទៃដី ជាង ១មុឺន១ពាន់ ហិចតា ដែលក្នុងនោះមានចំនួន១មុឺនដើមក្រោមជំនួយពី មូលនិធិអង្គការសង្គមវប្បធម៌ឈើពិភពលោក។
ទាំងអស់នេះវាជាការខិតខំប្រឹងប្រែងរបស់កម្ពុជា ពីព្រោះកម្ពុជាត្រូវការសន្តិភាព គឺមិនត្រូវការសង្គ្រាម ពីព្រោះកម្ពុជាបានឆ្អែតនឹងសង្គ្រាមជាច្រេីនឆ្នាំមកហើយ ហើយកម្ពុជាក៏ត្រូវរក្សាបាននូវបរិស្ថាន ព្រៃឈើ និងដើម្បីស្នាមញញឹមយ៉ាងដូច្នោះដែរ៕ ដោយ ៖ បញ្ញាស័ក្តិ